Search form

Yaxaya int

Phau Yaxaya no yog Yaxaya uas ua xibhwb cev Vajtswv lus sau cia. Yaxaya nyob hauv lub nroog Yeluxalees ncua sijhawm uas Uxiya, Yauthas, Aha, Hexekhiya thiab Manaxe ua vajntxwv kav Yuda tebchaws, yog kwvlam xyoo 750‑681 ua ntej Yexus. Ncua sijhawm ntawd xibhwb Amauj thiab xibhwb Hauxeya thiab xibhwb Mikha kuj cev Vajtswv lus thiab.

Tshooj 1‑35 yog hais rau thaum cov Axilia tabtom ntaus yeej Yixayee tebchaws, tiamsis Yuda tebchaws tseem nyob thaj yeeb. Tiamsis Vajtswv tseem yuav txiav txim rau cov Yuda thiab, vim lawv xyaum tsis ncaj thiab lawv lam ntseeg Vajtswv xwb. Yaxaya qhia kom lawv tso siab rau Vajtswv tsis txhob tso siab rau neeg thiab hais txog Davi li ib tug caj ces uas yuav los ua lawv tus Cawmseej.

Tshooj 36‑39 yog hais txog thaum Hexekhiya ua vajntxwv kav Yuda, cov Axilia tuaj ntaus lub nroog Yeluxalees, tiamsis Vajtswv ua rau lawv swb thim rov qab, yog xyoo 701.

Tshooj 40‑66 yog Yaxaya hais txog ib puas xyoo tom hauv ntej uas cov neeg Yuda raug cov Npanpiloo ntes coj mus nyob hauv Npanpiloo tebchaws. Nws hais tej lus nplij siab thiab qhia hais tias Vajtswv yuav ua ib yam tshiab thiab pub lawv rov vam meej li qub. Nws qhia kom lawv tsis txhob tso Vajtswv tseg mus pe luag tej dab mas Vajtswv yuav foom koob hmoov rau lawv.

Yaxaya kuj hais txog Vajtswv tus tub qhe uas yuav coj kev thaj yeeb thiab kev kaj siab lug rau lub ntiajteb. Tus tub qhe ntawd yog tus Mexiyas (lossis tus Cawmseej) uas Phau Tshiab hu ua tus Khetos, yog tus Tswv Yexus ntag.

Vajtswv Txojlus - lus Hmoob Dawb - txhais tshiab xyoo 2004

Text Copyright © 2004 Thailand Bible Society

Quotations of the White Hmong Holy Bible Standard Version, in any form, must obtain written permission from Thailand Bible Society if the quoted material is inclusive of at least 1,000 verses, or a copy of any book wholly or partially which amounts to 50 percent of the book quoted. For any long quotation, notice of copyright must appear as follows: Text Copyright © 2004 Thailand Bible Society. Used by permission.

More Info | Version Index