Search form

Mikha 1

Quaj ntsuag Xamali thiab Yeluxalees

1No yog tej lus uas Yawmsaub hais tuaj rau Mikha uas yog neeg hauv lub moos Maulese rau thaum Yauthas, Aha thiab Hexekhiya ua vajntxwv kav Yuda tebchaws, yog tej lus uas Mikha pom txog Xamali thiab Yeluxalees.

2Ib tsoom neeg txhua tus 'e,

cia li tig ntsej mloog,

lub qab ntuj 'e thiab txhua yam

uas nyob hauv cia li mloog.

Cia Vajtswv Yawmsaub ua timkhawv kom nej,

yog tus Tswva uas hais

hauv nws lub tuam tsev dawb huv tuaj.

3Saib nawj, Yawmsaub tawm hauv nws lub chaw los,

nws yuav nqes los tsuj mus los

saum tej chaw siab hauv lub ntiajteb.

4Tej roob yuav yaj tag rau hauv nws qab

thiab tej hav yuav tawg pes rhe,

yam nkaus li ciab ntab yaj ntawm hluavtaws

thiab yam li tej dej

uas ntws ntawm tej toj ntxhab los.

5Tej xwm txheej no huvsi

yog tim Yakhauj tej kev fav xeeb

thiab tim Yixayee caj ces tej kev txhaum txim.

Yakhauj tej kev fav xeeb yog dabtsi?

Tsis yog lub nroog Xamali lov?

Yuda caj ces lub chaw siab teev dab yog dabtsi?

Tsis yog lub nroog Yeluxalees lov?

6“Vim li no kuv yuav ua rau Xamali pob

ua tej niag pawg ciaj hav nroj,

yuav ua chaw cog vaj txiv hmab.

Kuv yuav muab tej pob zeb uas tsim lub nroog ntawd

nchuav rau hauv tej khuab ha,

mas yuav pom tej taw uas tiag lub nroog.

7Tej dab mlom huvsi hauv lub nroog ntawd

yuav raug muab tsoo ua tej dwb daim.

Tej uas muab xyeem rau hauv tej tsev dab

yuav raug muab hlawv pov tseg,

thiab kuv yuav muab tej dab mlom

ua kom piam tag huvsi.

Tej dab mlom ntawd yog Xamali muab

cov nqe ua poj muag cev sau zog yuav los,

mas yuav rov mus ua nqe ntiav poj muag cev.”

8Vim li no kuv yuav quaj ntsuag thiab quaj nyiav,

kuv yuav mus mus los los

liab qab tsuas tsis rau khau.

Kuv yuav quaj ntsuag yam li hma nqov ntuj,

thiab kuv yuav quaj lwj siab ntsuav

yam li noog ntxhuav.

9Xamali tej kiav txhab kho tsis tau li

thiab kis tuaj txog Yuda lawm,

twb los txog ntawm kuv haiv neeg lub rooj loog,

uas yog Yeluxalees ntag.

10Tsis txhob piav zaj no rau hauv lub moos Ka,b

tsis txhob quaj kiag li.

Cia li da luj luam rau hauv tej hmoov av

ntawm lub moos Npe Le‑ala.c

11Cov neeg hauv lub moos Safid cia li taug

nej txojkev liab qab tsuas thiab txaj muag.

Cov neeg hauv lub moos Xanae tsis tawm los.

Lub moos Npe‑exee quaj nyiav,

nej thiaj tsis tau chaw cawm siav

rau qhov ntawd lawm.

12Cov neeg hauv lub moos Malauf

tos qhov zoo qhuav siab qhawv,

vim yog Yawmsaub tso tej xwm txheej phem

los txog ntawm rooj loog Yeluxalees lawm.

13Cov neeg hauv lub moos Lakhi 'e,g

cia li muab nees nruab rau tej tsheb ua rog.

Nej xub ua txhaum thiaj coj kev txhaum los

rau hauv Xi‑oo tus ntxhais,h

rau qhov Yixayee tej kev fav xeeb

muaj nyob hauv nej nruab nrab.

14Vim li no nej yuav muab tshav ntuj

xa lub moos Mauleseka mus,

thiab lub moos Axiji tej vaj tse

yuav tsis ua chaw vam khom

rau Yixayee tej vajntxwv.

15Cov neeg hauv lub moos Malesa 'e,j

kuv yuav coj tus uas kov yeej los ntaus nej.

Tus uas yog Yixayee lub koob meejk

yuav los rau hauv lub moos Adulas.

16Cia li chais nej cov plaubhau kom do cuas

quaj ntsuag nej tej menyuam

uas nej nyiam kawg.

Cia li ua rau nej do hau ib yam li dav noj twm,

rau qhov lawv yuav ncaim nej

mus poob tebchaws.

Vajtswv Txojlus - lus Hmoob Dawb - txhais tshiab xyoo 2004

Text Copyright © 2004 Thailand Bible Society

Quotations of the White Hmong Holy Bible Standard Version, in any form, must obtain written permission from Thailand Bible Society if the quoted material is inclusive of at least 1,000 verses, or a copy of any book wholly or partially which amounts to 50 percent of the book quoted. For any long quotation, notice of copyright must appear as follows: Text Copyright © 2004 Thailand Bible Society. Used by permission.

More Info | Version Index