Search form

Ntawv Nkauj 33

Qhuas tus uas tsim

1Nej cov uas ncaj ncees 'e,

cia li zoo siab rau Yawmsaub,

Tsim nyog cov uas lub siab ncaj qhuas nws.

2Cia li ntaus nkauj nog ncas me

qhuas Yawmsaub,

cia li ntaus nkauj nog ncas loj

hu suab zoo rau nws.

3Cia li hu zaj nkauj tshiab qhuas nws,

cia li ntaus nkauj nog ncas zoo zoo

thiab qw nrov,

4rau qhov Yawmsaub tej lus ncaj ncees,

thiab txhua yam haujlwm uas nws ua

tso siab tau.

5Nws nyiam txojkev ncaj ncees

thiab qhov uas ua ncaj,

Yawmsaub txojkev hlub uas ruaj khov

puv nkaus lub ntiajteb.

6Yawmsaub hais lus xwb tsim tau lub ntuj,

thiab tej pa uas tawm hauv nws qhov ncauj

tsim txhua yam saum nruab ntug.

7Nws sau zog tej dej hiavtxwv los

ntim ua ib hnab,

thiab khaws dej hauv nruab tiv txwv cia

rau hauv lub txhab.

8Cia lub ntiajteb huvsi paub ntshai Yawmsaub,

cia ib tsoom neeg thoob qab ntuj

hwm nws heev.

9Nws hais xwb, ces lub ntiajteb cia li muaj,

nws hais lus xwb, txawm tshwm los.

10Yawmsaub muab tej uas

ib tsoom tebchaws xav cia rhuav pov tseg,

nws ua rau tej uas ib tsoom neeg npaj cia

ua tsis tau kom tiav.

11Tej uas Yawmsaub npaj cia

yuav nyob mus ib txhis,

tej uas nws xav cia hauv lub siab

yuav nyob mus rau txhua tiam neeg.

12Lub tebchaws uas lawv tus Vajtswv

yog Yawmsaub yuav tau nyob kaj siab lug.

Lawv yog haiv neeg uas Yawmsaub

xaiv cia ua nws li qub txeeg qub teg.

13Yawmsaub nyob saum ntuj ntsia ntsoov tuaj,

nws saib pom ib tsoom neeg.

14Nws nyob saum nws lub zwm txwv

ntsia ntsoov rau txhua tus

uas nyob hauv lub ntiajteb.

15Nws yog tus uas tsim lawv txhua tus lub siab,

thiab tshuaj saib txhua yam uas lawv ua huvsi.

16Tus vajntxwv yuav dim

tsis yog vim nws muaj tub rog coob,

tus tub rog yuav dim

tsis yog vim nws muaj zog heev.

17Qhov uas vam tias tus nees ua rog

yuav pab kov yeej tsis muaj qabhau,

nees lub zog loj kuj pab tsis tau kom dim.

18Yawmsaub lub qhov muag saib ntsoov

cov uas paub ntshai nws,

thiab cov uas vam ntsoov

nws txojkev hlub uas ruaj khov,

19mas nws yuav cawm lawv tus ntsuj plig dim

hauv txojkev tuag,

thiab pub lawv muaj txojsia nyob

rau thaum muaj kev tshaib nqhis.

20Peb tus ntsuj plig tos rawv Yawmsaub,

nws yog txojkev pab peb

thiab yog daim phiaj hlau thaiv peb.

21Peb zoo siab xyiv fab rau nws,

rau qhov peb vam khom nws lub npe

uas dawb huv.

22Au Yawmsaub, thov koj txojkev hlub

uas ruaj khov nrog nraim peb,

raws li peb muaj siab vam rau hauv koj.

Vajtswv Txojlus - lus Hmoob Dawb - txhais tshiab xyoo 2004

Text Copyright © 2004 Thailand Bible Society

Quotations of the White Hmong Holy Bible Standard Version, in any form, must obtain written permission from Thailand Bible Society if the quoted material is inclusive of at least 1,000 verses, or a copy of any book wholly or partially which amounts to 50 percent of the book quoted. For any long quotation, notice of copyright must appear as follows: Text Copyright © 2004 Thailand Bible Society. Used by permission.

More Info | Version Index