Search form

Ntawv Nkauj 74

Thov Vajtswv pab nws haiv neeg dim yeeb ncuab

Zaj nkauj Maxakhic uas Axas sau.

1Au Vajtswv, ua cas koj muab peb

laim pov tseg ib txhis?

Ua cas koj yuav npau taws vog

rau cov yaj uas nyob hauv koj tshav zaub?

2Thov nco txog koj cov neeg

uas koj tau thaum ub los lawm,

lawv yog cov uas koj twb txhiv los

ua ib haiv neeg ua koj qub txeeg qub teg.

Thov nco txog lub roob Xi‑oo

uas yog lub chaw uas koj txeev nyob.

3Thov koj txhais kotaw mus ncig

lub chaw uas pob tag ib txhis.

Yeeb ncuab tau muab txhua yam

hauv lub chaw pe Vajtswv ua puam tsuaj tag.

4Koj cov tshawj chim qw zoo siab

hauv nruab nrab koj lub tsev dawb huv,

lawv tau tsa lawv tus chij rau hauv.

5Saib mas lawv zoo yam nkaus li

cov uas tsa taus yuav ntov tsob ntoo lawm.d

6Tej txiag ntoo uas muab sais zoo nkauj

lawv kuj xuas taus xuas rauj

tsoo pob tag huvsi.

7Lawv muab hluavtaws hlawv lub chaw pe koj

kub hnyiab tag rau hauv av,

lawv ua rau lub chaw uas koj lub npe nyob

qias tsis huv.

8Lawv lub siab xav tias,

“Peb yuav kov yeej hlo luag huvsi.”

Lawv muab Vajtswv tej chaw dawb huv

txhua lub hauv lub tebchaws hlawv huvsi.

9Peb tsis pom txujci phimhwj dabtsi li,

tsis muaj ib tug xibhwb cev Vajtswv lus lawm,

peb cov tsis muaj leejtwg paub

xyov ntev li cas.

10Au Vajtswv, cov tshawj chim

yuav luag koj ntev li cas?

Yeeb ncuab yuav thuam koj lub npe

mus ib txhis li lov?

11Ua cas koj yuav nkaum koj txhais tes?

Cia li xyab koj txhais tes xis ntawm koj lub cev

tuaj ua kom lawv puam tsuaj.e

12Txawm li ntawd los Vajtswv

uas yog kuv tus vajntxwv

muaj nyob thaum ub los lawm,

nws twb coj txojkev cawm dim

rau hauv lub ntiajteb lawm.

13Koj siv koj lub hwjchim cais dej hiavtxwv.

Koj tsoo tej zaj taubhau hauv dej hiavtxwv.

14Koj tsoo zaj Leviathasf cov taubhau

thiab muab nws rau tej tsiaj qus

hauv tebchaws moj sab qhua noj.

15Koj qheb hauv dej hauv hav.

Koj ua rau tej dej cag uas ntws ib txhis

qhuav tag.

16Nruab hnub los yog koj li,

hmo ntuj los yog koj li.

Koj tsim lub hli thiab tsim lub hnub

nyob ruaj chaw.

17Koj tu ciam huvsi rau lub ntiajteb nyob.

Koj tsim muaj caij kub caij no.

18Au Yawmsaub, thov nco txog qhov no tias

cov yeeb ncuab tau luag koj

thiab cov neeg ruam

tau hais lus phem li cas rau koj lub npe.

19Tsis txhob muab tus nquab taugg

cwb rau tsiaj qus,

thov koj pheej nco ntsoov

koj cov neeg pluag txojsia mus ib txhis.

20Thov saib rau koj tej lus cog tseg,

rau qhov tej chaw tsaus ntuj

hauv lub tebchaws

mas txojkev ua nruj ua tsiv

muaj nyob puv nkaus.

21Thov nco ntsoov cov uas raug luag tsuj

tau txaj muag.

Cia cov neeg pluag thiab cov txom nyem

qhuas koj lub npe.

22Au Vajtswv, cia li sawv tsees,

hais koj tshaj plaub.

Thov nco ntsoov tias cov neeg ruam

luag koj tas hnub tas hmo li cas.

23Tsis txhob tsis nco qab

koj cov tshawj chim lub suab nrov,

yog lub suab ua nqaj ua nqug

uas cov tawm tsam koj pheej qw tsis tu li.

Vajtswv Txojlus - lus Hmoob Dawb - txhais tshiab xyoo 2004

Text Copyright © 2004 Thailand Bible Society

Quotations of the White Hmong Holy Bible Standard Version, in any form, must obtain written permission from Thailand Bible Society if the quoted material is inclusive of at least 1,000 verses, or a copy of any book wholly or partially which amounts to 50 percent of the book quoted. For any long quotation, notice of copyright must appear as follows: Text Copyright © 2004 Thailand Bible Society. Used by permission.

More Info | Version Index