Search form

Xalaumoo Zaj Nkauj 5

Tus hluas nraug hais

1Kuv tus muam npaws, kuv tus nkauj nyab,

kuv los rau hauv kuv lub vaj lawm nav.

Kuv sau zog kuv tej roj tsw qab

thiab tej txuj lom,

kuv noj kuv li tsev ntab thiab zib ntab,

kuv haus kuv li cawv txiv hmab

thiab kuv li kua mis.

Yeluxalees tej ntxhais hais

Ob tug kwvluag 'e, neb cia li noj cia li haus,

ob tug uas sib nyiam 'e,

neb cia li haus kom pov khawv nkaus.

Zaj Nkauj Plaub

Tus hluas nkauj hais

2Kuv tsaug zog lawm

tiamsis lub siab ras dhuj dheev.

Kuv hnov tus uas kuv ntxim siab

khob hu hais tias,

“Leej muam npaws, tus uas kuv nyiam,

kuv tus nquab taug,

kuv tus uas zoo nkauj tshaj plaws,

qheb qhov rooj rau kuv,

rau qhov kuv lub taubhau ntub lwg ntsuav,

thiab kuv tej plaubhau

ntub nag tshauv tsaus ntuj nti.”

Tus hluas nkauj hais

3Kuv twb hle tsho lawm,

ua li cas tseem yuav kom kuv

rov muab los hnav?

Kuv twb ntxuav kotaw lawm,

ua li cas yuav kom kuv

rov muab ua khub dua thiab?

4Tus uas kuv ntxim siab

cev nws txhais tes ntawm qhov rooj los,

kuv lub siab qaug lias rau nws.

5Kuv sawv tsees mus qheb qhov rooj

rau tus uas ntxim kuv siab,

kuv txhais tes lo roj tsw qab nrog tawv,

kuv cov ntiv tes kuj nrog roj tsw qab

rau thaum kuv tuav tus las rooj.

6Kuv qheb qhov rooj

rau tus uas ntxim kuv siab,

tiamsis tus uas ntxim kuv siab

tig kiag rov qab lawm.

Thaum nws hais lus rau kuv xwb,b

kuv yeej poob siab lawm.

Kuv nrhiav nws tiamsis nrhiav tsis pom,

kuv hu nws los nws tsis teb li.

7Cov uas faj xwm ntsib kuv rau thaum

lawv tabtom taug kev hauv lub nroog.

Lawv txawm ntaus kuv,

muab kuv ntaus mob thiab to,

lawv txeeb kuv daim ntaub kauv lawm,

yog lawv cov uas zov ntsa loog.

8Yeluxalees tej ntxhais 'e,

thov nej cog lus cia tias

yog nej ntsib kuv tus uas ntxim siab

nej yuav hais rau nws tias

kuv nyiam nws mob kuv siab kawg.

Yeluxalees tej ntxhais hais

9Tus uas zoo nkauj tshaj plaws

ib tsoom hluas nkauj huvsi 'e,

tus uas ntxim koj siab

zoo dua li luag lwm tus lov?

Tus uas ntxim koj siab

zoo dua li luag lwm tus npaum li cas

es koj yuav kom peb cog lus li ntawd?

Tus hluas nkauj hais

10Tus uas kuv ntxim siab

zoo nraug plhu tshiab liab ploog,

ib vam leej nws yog tus zoo tshaj plaws.

11Nws cov plaubhau yog tseem kub,

nws cov plaubhau caws vos,

thiab dub yam li uab lag.

12Nws qhov muag zoo tam tus nquab taug

uas nyob ntawm ntug hav dej da kua mis,

zoo yam nkaus li qe zeb hlaws

khawm rau hauv lub tais.c

13Nws ob lub plhu zoo yam nkaus li

thaj uas cog txuj lom tsw qab

ntxiag thoob plaws.

Nws daim tawv ncauj zoo yam nkaus li

tej paj lilij uas roj tsw qab nrog ntsuj ntsuav.

14Nws txhais npab ntug ntoob,

yog npab kub uas muaj

tej qe zeb hlaws muaj nqes ntsia lo rau.

Nws lub cev zoo yam li kaus ntxhw uas muab

qe zeb phaithu tsamxem teem rau.

15Nws txhais ceg yog ncej zeb dawb

uas txawb saum lub taw kub.

Nws lub cev ntaj ntsug

zoo yam nkaus li Lenpanoo,

zoo nraug li tej ntoo ciab.

16Tej lus uas nws hais qab zib kawg,

nws lub zeej txhiaj

ntxim nyiam kawg nkaus li.

Yeluxalees tej ntxhais 'e,

no yog tus uas kuv ntxim siab

thiab yog kuv tus phoojywg.

Vajtswv Txojlus - lus Hmoob Dawb - txhais tshiab xyoo 2004

Text Copyright © 2004 Thailand Bible Society

Quotations of the White Hmong Holy Bible Standard Version, in any form, must obtain written permission from Thailand Bible Society if the quoted material is inclusive of at least 1,000 verses, or a copy of any book wholly or partially which amounts to 50 percent of the book quoted. For any long quotation, notice of copyright must appear as follows: Text Copyright © 2004 Thailand Bible Society. Used by permission.

More Info | Version Index