Search form

Luk 3

E Ioanes la tahalo la vuluhi eia soko la valolo tetala

(Matiu 3:1-12; Mark 1:1-8; Ioanes 1:19-28)

1E Taibirias, eia pou la mulugaluga tegiteu e Rom la leavala savulusa gete lima, te la imamala moli alele, e Pontias Pailat eia mamuga te la gale e Iudea, me e Herod eia pou la mulugaluga oio e Galilea. E tabarala tai e Pilip, eia mamuga te la gale isahari mai e Ituria me Trekonaitis, me e Laisenias eia la mulugaluga te la gale e Abilini. 2Te la imamala alele, e Anas mira me Kepas, egira pou la mulugaluga tegiteu e pris. Tio te la imamala ale, la vikararala te La Uru eia guvi tavu e Ioanes, e latule Sekaraia, oio te la tia la hohoi. 3Eia goio hiliti, eia tuga goio te la maututula tomi hagagavi la lalu e Iordan, eia valolo la valalua me hatavivile veia egite ge vulo la gabutatalala tegiteu tavu La Uru, eia ge vuhi egiteu veia La Uru ge vimavulaha egiteu te la iruru tegite mai ele. 4Mai la merera te la bilalaha e Aisaia te La Buk Tabu Ale Pala, eia kekesia maie:

La golu la tahalo isasa tatola te la hohoi,

eia tatola maie:

Amuto ge ili paa la gauru te La Uru,

amuto ge vimatata tomi la gauru tetala.

5Oli robo la malululu tomi,

ge oli taro tai la popoiti tomi.

Ale tomi ale makoko, vimatatea.

La gauru ale popopo, ge lamo paea.

6La valalua te la maututula tomi,

egite ge hilo la vimahuli te La Uru soio tegiteu.

7Goio, la valalua me hatavivile usu pepeho gomai te Ioanes veia eia ge vuhi egiteu. Eala moli eia ge veia giteu maie “Amutou la valalua me hatavivile, la vulovulo mutou kama kokora sesele, amuto veia ge hele taro la igototolola ale tivura pepeho te La Uru ale ge sibitala robo amutou, amuto veia ge hele taroa mai e taive eia hele taro la hohoi ale tululu. 8Amuto veia ge kai taro la iruru, ge vulo halaba, ia? Ioge, taritigi amuto ge tau la vavua mutou ge koramuli la tahalo ale vulo halabati. Umala amuto ge gabua te la tia mutou maie veia ‘Amiteu e tutubule Abraham’, la vuhula eau vei seselea mutou, ale eme e tubule Abraham, eia kama ge sulime, La Tahalo Uru eia koramulia ge visibitala e tutubule Abraham isahari tegiteu la uatati aleie, otalo te la magasale! 9La Uru eia tau lalahatia la pemu soio te la vuhu la obobu tomi, mai egite kama ge vua tigi, eia ge tolo taro tomi egiteu, ge pigi egiteu soio te la havi.”

10Tio, la valalua me hatavivilele, egite karutu sesele la merera te Ioanes ele, egite goio tahia mago “Amite ge igo sesele la rova, veia La Uru ge vimahuli amiteu e?”

11Goio, e Ioanes kolia giteu mago “Mai isasa tamutou tahola ilua la kulikuli, taritigi veia eia ge abiale tabarala ale savelea isa, mai tai la ilali, ge igoa mai tai ele.”

12Goio, isahari tegiteu la tahalo la giligi la takes, egite guvi te Ioanes veia ge vuhi, egite goio veiala mago “Tahalo uru, amite ge igo sesele la rova gageie?”

13Tio, e Ioanes goio kolia soio tegiteu mago “Umala amuto ge vikara suku egiteu la valalua la piligi la takes ale uru, amuto ge tau molia mai ale egiteu e Rom toitia mutou.”

14Goio, egiteu la valalua la vaubi tai isahari, egite goio tahi e Ioanes mago “Me amiteu, amite ge igo mave?”

Goio, e Ioanes goio kolia soio tegiteu mago “Umala amuto ge vagari tavu egiteu la valalua me hatavivile, veia ge pakali la uati tegiteu mai ele. Umala tai veia amuto ge kaua giteu la iruru ale egite kama igoa, veia ge viligi egiteu kara ale egite ge pigi la uati soio tamutou. Taritigi veia amuto ge sagege moli te la mapa mutou.”

15Tio, e Ioanes valolo egiteu mai ele, la valalua me hatavivile gabutatala papai veia e Ioanes soioge e Kraist. 16Eala moli e Ioanes goio putu olia giteu la vikararala maie “Ale eau vuvuhi moli le amutou la lalu, eala moli ale ge mulimuli taku, la vagagarila tetala muga taku. Eau togo pepehoa, eau kama koramulia ge tuga hagagavi soio te la balila. Eia ge vuvuhi le amutou La Kalulu La Marokala, la kalulu mutou ge tivura mai la havi. 17Eia raragiti veia ge hilovi la vulovulo la valalua me hatavivile tomi, veia egiteu ale taritigi, eia ge puli egiteu hagagavi soio te la balila, eala moli egiteu ale kama kokora, eia ge pigi egiteu sotalo te la havi ale la kaluvula ge ouka.”

18Tio, e Ioanes valolo legiteu la vikararala usu lou mai tai ele, veia ge valolo raragi legiteu te la guluvi te Kraist.

E Herod vagoilo e Ioanes te la luma la kilisi

19Eala moli e Ioanes igo totolo e Herod te la iruru ale eia igoa soio te Herodias, e rutule tabarala, me te la iruru tomi ale eia igigoa. 20Tio e Herod goio tau polo lou la iruru tetala isa lou, ale eia vagoilo e Ioanes te la luma la kilisi.

E Ioanes vuhi e Iesus

(Matiu 3:13-17; Mark 1:9-11)

21Te la imamala ale, la valalua me hatavivile usu egiteu goio te Ioanes, veia eia ge vuhi egiteu, me e Iesus tai goio ge vuhi. Eia vuhi kaluvuti, eia goio kaka, la ilo la lage goio kope, 22La Kalulu La Marokala goio lovo sotalo tetala mai sesele la malu la uku. Tio la golu La Tahalo Uru tola loata te la mori maie mago “Eme e Latugu la riau, eau sagege pepeho sesele leme.”

La isaisa giteu e tutubule Iesus

(Matiu 1:1-17)

23E Iesus soko la igogolu la valolo tetala, la leavala tetala soioge savulu tolu, la valalua me hatavivile gabutatala mai ele veia eia e latule Iosep. Me la hilile Iesus ale egite gabutatala mai ele veia eia loio te la hilile Iosep, etato rovia maie:

E Iosep, e tamala e Heli;

24e Heli, e tamala e Matat;

e Matat, e tamala e Levi;

e Levi, e tamala e Melkai;

e Melkai, e tamala e Ianai;

e Ianai, e tamala e Iosep;

25e Iosep, e tamala e Matataias;

e Matataias, e tamala e Amos;

e Amos, e tamala e Nahum;

e Nahum, e tamala e Eslai;

e Eslai, e tamala e Nagai;

26e Nagai, e tamala e Meat;

e Meat, e tamala e Matataias;

e Matataias, e tamala e Semen;

e Semen, e tamala e Iosek;

e Iosek, e tamala e Ioda;

27e Ioda, e tamala e Ioanan;

e Ioanan, e tamala e Resa;

e Resa, e tamala e Serababel;

e Serababel, e tamala e Sialtiel;

e Sialtiel, e tamala e Nerai;

28e Nerai, e tamala e Melkai;

e Melkai, e tamala e Adai;

e Adai, e tamala e Kosam;

e Kosam, e tamala e Elmadam;

e Elmadam, e tamala e Ero;

29e Ero, e tamala e Iosua;

e Iosua, e tamala e Lieser;

e Lieser, e tamala e Iorim;

e Iorim, e tamala e Matat;

e Matat, e tamala e Levi;

30e Levi, e tamala e Simion;

e Simion, e tamala e Iuda;

e Iuda, e tamala e Iosep;

e Iosep, e tamala e Ionam;

e Ionam, e tamala e Liakim;

31e Liakim, e tamala e Melea;

e Melea, e tamala e Mena;

e Mena, e tamala e Matata;

e Matata, e tamala e Netan;

e Netan, e tamala e Devit;

32e Devit, e tamala e Iesi;

e Iesi, e tamala e Obed;

e Obed, e tamala e Boas;

e Boas, e tamala e Salmon;

e Salmon, e tamala e Nason;

33e Nason, e tamala e Aminadab;

e Aminadab, e tamala e Admin;

e Admin, e tamala e Anai;

e Anai, e tamala e Hesron;

e Hesron, e tamala e Peres;

e Peres, e tamala e Iuda;

34e Iuda, e tamala e Iakob;

e Iakob, e tamala e Isak;

e Isak, e tamala e Abraham;

e Abraham, e tamala e Tera;

e Tera, e tamala e Nehor;

35e Nehor, e tamala e Serak;

e Serak, e tamala e Reu;

e Reu, e tamala e Pelek;

e Pelek, e tamala e Bera;

e Bera, e tamala e Sela;

36e Sela, e tamala e Kenan;

e Kenan, e tamala e Arpaksat;

e Arpaksat, e tamala e Sem;

e Sem, e tamala e Noa;

e Noa, e tamala e Lemek;

37e Lemek, e tamala e Metusala;

e Metusala, e tamala e Enok;

e Enok, e tamala e Iared;

e Iared, e tamala e Mahalil;

e Mahalil, e tamala e Kenan;

38e Kenan, e tamala e Nos;

e Nos, e tamala e Set;

e Set, e tamala e Adam;

e Adam, eia e latu La Tahalo Uru.

La Buk Tabu ale halaba te la valolo ale taritigi te Iesus Kraist

© 1983, Wycliffe Bible Translators, Inc. All rights reserved. More Info | Version Index