Search form

Rom 16

E Pol laharoa giteu e Rom

1Eau masaga amuto ge veiale hatavile gatou uru e Pibi la haro sesele taku soio tetala ale eia ge guvi tamutou ele. Eia igogolu vagari sesele te la visuli soio te la lotu oio la mautu e Senkria. 2Eia ge guvi tamutou, amuto ge rara tavu seselea te la isa La Uru, mai la vulovulo gatou ale te Kraist, amuto ge suli tigi tatahoa, la vuhula eia suli pepehoau me la valalua me hatavivile usu tai.

3Amuto ge veiale Priska mira me Kuila la haro taku soio tegirua, egira vaigogolu vikapopo leau te la valolo te Kraist Iesus. 4Egira pala tomo tavuau, ale pala egite la valalua la gima lao toleau. La valalua la maligoma usu tai la dinau uru tegirua, la vuhula egira suli pepeho egiteu te la valolo te Kraist. 5Eau laharo taia giteu la valalua me hatavivile la lotu ale lotulotu oio te la luma tegirua.

Amuto ge veiale Pinitas la haro sesele taku soio tetala tai, eia e vikilipi taku sesele. Eia la muluga la tahalo sesele oio la gale Esia ale vulo halaba soio te Kraist, ale eau valolo egiteu pala.

6Amuto ge toi la haro tai soio te Maria, eia la tavile isasa, eia igogolu vagari tamutou ele.

7Amuto ge veiale Adronaikas mira me Iunias la haro sesele taku soio tegirua. Amiteu la maratatila isa moli, amite pala pou vikapopo te la luma la kilisi. Egira muga sesele tamiteu la bilalaha te Kraist te la vulovulo giruale, egira vulo halaba pala, eau mulimuli tegirua.

8Amuto ge vei taiale Amplietas la haro sesele taku soio tetala. Eau masaga pepeho eia, eia isasa e tabaragu sesele te La Uru.

9Amuto ge vei taiale Banas la haro taku soio tetala. Eia vikapopo letatou te la valolo te Kraist, egira me tabaragu uru e Stekis, amuto ge laharoa girua.

10Amuto ge veiale Pelis tai la haro sesele taku soio tetala. Eia la tahalo sesele te Kraist, etato tomi rovitia la vulovulola. Laharo taia giteu la karakara te Aristobulas.

11Amuto ge veiale Herodion la haro taku soio tetala. Eia la tau Iuda mai eau. Amuto ge laharo taia giteu la karakara te Nasisas, egiteu ale tautaulailo te La Uru.

12Amuto ge laharoale Traipina mira me Traiposa, egirua la tavile iluale, egira igogolu vagari tai te La Uru. Amuto ge laharo taiale Pesis, eia la tavile la igogolu tai isale te La Uru, eia e hatavilegu sesele.

13Amuto ge veiale Rupas la haro taku soio tetala, eia la tahalo sesele te la igogolu te Kraist. Amuto ge laharoa girua me tilala, eia mai e tila milua sesele.

14Amuto ge toi la haro sesele taku soio tegiteu aleie: e Asinkritas, e Pligon, e Hermes, e Patrobas, e Hemas, me egiteu e tabarabara gatou tomi ale pou vikapopo legiteu ele.

15Amuto ge vei taiale Pilologas la haro taku, egite me Iulia, me Nerias, egira me hatavilela, me Olimpas, me egiteu la valalua me hatavivile tomi te Kraist ale oio tegiteu ele.

16Amuto tomi ge visagege baoli mai la vulovulo gatou ale te Kraist. Egiteu la lotu tomi te Kraist te la gale ale omai, egite veia mutou e Rom la haro sesele.

La valalua isahari, egite igo gegeru la lotu te Kraist

17Eau kaka vagari amutou e tabarabaragu veia amuto ge mata rara tegiteu la valalua ale ge vipou marapa amutou veia amuto kamati ge mulimuli tigi la merera te Kraist ale amite tovo le amutou oio vola. Umala amuto ge hagagavi tegiteu ele. 18Egiteu ale maie, egite kama vauru e Iesus Kraist, egite vauru moli egiteu. La vikararala tegiteu ale malama, eia tutugolo egiteu la valalua me hatavivile ale kama gabutatala tigi. 19La maututula tomi lolotia veia amutou omai la mautu e Rom tilimuli tatahoti la merera te Kraist, eala eau sagege pepeho le amutou. Eala moli eau karasuku amutou veia amuto ge rovi tataho la gauru ale taritigi, eala moli umala la vulovulo ale kama kokora eia ge oio bakisi tamutou. 20Mai ge mai ele, eia kama ge tabaa, La Tahalo Uru ge pigi e Satan sotalo te la vaha mutou, amuto ge soa kurua. Amuto ge igoa te la vagagarila te La Tahalo Uru ale vimalilo la tia gatou. La gilogo uru te Iesus, La Uru gatou, eia ge pou tamutou.

La valalua isahari toi tai la haro soio tegiteu e Rom

21E Timoti, ale igogolu vikapopo leau, eia toi la haro soio tamutou. Tio e Lusias, e Ieson, e Sosipata, egiteu e tabarabaragu la tau Iuda tomi omai, egite tai laharoa mutou.

22Me eau, e Tetias, eau ale kekesi la merera te Pol te la letale, eau toi la haro sesele soio tamutou te la isa La Uru.

23E Gaias tai veia mutou la haro. Eia vibaumuliau oio te la luma tetala, me amite lotu tai oio tetala.

E Rastas, ale vibaumuli la uati te gavman omai, egira me tabara gatou e Kuotas, egira veia mutou la haro.

[ 24La gilogo te Iesus Kraist, La Uru gatou, eia ge pou tamutou, eala moli ele.]

Etato ge vei tataho sesele La Tahalo Uru

25Etato ge vaisale La Tahalo Uru maie: Eia vagari, eia koramulia ge vimagiri vagari amutou, mai te la valolo taku ale eau valoloti le amutou ovola, mai la valolo te Iesus Kraist. Mai ale igoie eia veipalatia la merera ale tabuli kokovu, alaurati te baruata kara igoie, 26me igoie etato matagagati ovola, mai la merera tegiteu la bilalaha tetala, egite kekesia te La Buk Tabu Ale Pala. Mai ale igoie, te la masasagala moli te La Tahalo Uru ale mahuli moli, la tapasila ouka, la merera te Kraist eia vavavati soio te la maututula tomi veia la maratatila tomi ge sau tolea, ge roromulia. 27La Tahalo Uru isasa sekela moli, eia magiri. Me la mari uru tai tetala sekela moli. Etato ge vaisale molia te la isale Iesus Kraist, kara igoie, kara mulimuli, la kaluvula ge ouka. Eala moli ele.

Eau e Pol.

La Buk Tabu ale halaba te la valolo ale taritigi te Iesus Kraist

© 1983, Wycliffe Bible Translators, Inc. All rights reserved. More Info | Version Index