Search form

SOERA RAZO I. FAZA

I. Faʼatoea Dawido. II. Ibaliʼõ razo ia enaʼõ Adonia. III. Latimba daʼõ Natano ba Baseba. IV. Ifarongogõ ba niha sato Dawido, wa no Selomo nihonogõi fangalinia dania. V. Faʼataʼoe Gadonia ba faʼahachõ dõdõ Zelomo chõnia.

1I. Ba me no atoea Dawido, me no noemalõ ndrõfinia, ba oafoeʼafoe manõ ia, he w̃aʼae laʼolohoeni ambala. 2Ba lamane chõnia enoninia: Dalaʼaloei nono alawe chõ zochõ jaʼaga, razo, ono alawe si lõ irai faloecha ba ndra matoea, enaʼõ ngoningoni razo ia ba sondrorogõ jaʼia; na õtalagoei daʼõ, ba dõhõ waʼoafoe zochõ jaʼaga, razo. 3Ba laʼaloei ba danõ Ndraono Gizeraëli maʼasagõrõ nono alawe si sõchi bawa ba lasõndra, Abizagi, banoea Zoenema ba laʼohe chõ razo. 4Ba no ono alawe si sõchi siʼai bawa, ba tobali sondrorogõ razo ia, ngoningoninia, ba lõʼõ sa oroedoe chõnia razo.

5II. Ba maoso Gadonia, ono Hagita andrõ, imane: Jaʼodo zi tobali razo dania! Ba iʼõli saʼae chõnia goereta ba koedo, ba 50 ifaʼaso chõnia niha, sowaõwaõ fõnania. 6Ba lõ irai iboesi dõdõnia amania, ba gõtõnia, wangoemaʼõ chõnia: Hana wa õmanõ? Ba no si sõchi siʼai boto ia, ba no fanete Gabisalomi, ba waʼatoemboe. 7Ba fahoehoeo Gadonia chõ Joabi, ono Zeroeja, ba chõ Gabiataro andrõ, ere, ba faʼawõ ira chõnia. 8Ba Sadoki andrõ, ere, ba Benaja, ono Jehojada ba Natano samaʼeleʼõ, ba he Simeʼi ba Reʼi, ba saradadoe andrõ chõ Dawido, ba no tenga si faʼawõ chõ Gadonia. 9Ba me itaba mbiribiri ba saw̃i ba ono zaw̃i niboela Adonia, ba gara goelõ andrõ, ba ngai goemboe Rogeli, ba ikaoni dalifoesõnia fefoe, ono razo, awõ maʼoewoe Joeda, fefoe, enoni Dawido; ba si lõ ikaoni, 10ba Natano, samaʼeleʼõ, ba Benaja ba saradadoe andrõ ba achinia Selomo.

11III. Ba imane Natano chõ Mbaseba, ina Zelomo: Tabeʼe no orongo, wa no tobali razo Adonia, ono Hagita; lõ nirongo Dawido, sochõ jaʼita. 12Ba daʼoefobawa lala chõoe, he õwisa wangorifi jaʼoegõ ba onooe Selomo. 13Ae jomo chõ Dawido, ba õmane chõnia: Hadia, lõ si mõiʼõ ba hõloe chõ genonioe ira alawe andre, jaʼoegõ sochõ jaʼo, razo, wangoemaʼõ: Onooe Selomo dania razo, fangaligoe, ba jaʼia dania zidadao ba dadaomagoe? Ba hana wa no Adonia zi tobali razo? 14Ba fatoea fahoehoeo na ndraʼoegõ ba daʼõ chõ razo, ba so gõi ndraʼo, oeʼoʼõ ndraʼoegõ jomo, ba oefadoehoeʼõ niw̃aʼõoe. 15Ba mõi si bacha chõ razo Mbaseba; ba si no atoea sibai razo, ba no Abizagi, banoea Zoenema, ngoningoninia. 16Ba mangaloeloe Mbaseba, ifalõgoe tooe ia, ba imane razo: Hadia niʼandrõoe? 17Ba imane chõnia: He sochõ jaʼo, no mõi ba hõloe ndraʼoegõ chõ genonimõ andre, ba chõ Lowalangioe, Jehowa, wangoemaʼõ: Onooe Selomo dania razo fangaligoe, ba jaʼia dania zidadao ba dadaomagoe! 18Ba hiza, ba no Adonia zi tobali razo, ba lõʼõ sa nirongooe, jaʼoegõ sochõ jaʼo, razo. 19Ba no oja itaba saw̃i si matoea ba ono zaw̃i niboela ba biribiri, ba no ikaoni ba daʼõ nono razo fefoe, ba Abiataro, ere, ba Joabi, koemandra seboea; ba enonioe Selomo, ba lõ nikaoninia. 20Ba jaʼoegõ, sochõ jaʼo, razo, nitõngõni Ndraono Gizeraëli fefoe, enaʼõ õʼombachaʼõ chõra, ha niha dania zidadao ba dadaomamõ, fangalioe, jaʼoegõ sochõ jaʼo, razo. 21Ha siʼai dania õleagõ tooe ndraʼoegõ ba ngai ndra toeaoe, jaʼoegõ sochõ jaʼo, razo, ba mobahoeloe ndraʼaga onogoe Selomo! 22Ba lõ saetoe na hoehoeonia chõ razo, ba hiza Natano, samaʼeleʼõ. 23Ba lamane chõ razo: Hiza Natano, samaʼeleʼõ! Ba iʼondrasi razo, ifalõgoe tooe ia ba zalo, fõnania, 24ba imane: He sochõ jaʼo, razo! hadia, jaʼoegõ zangoemaʼõ: Adonia zi tobali razo fangaligoe, jaʼia dania zidadao ba dadaomagoe? 25Noa sa mõi ia mitooe maʼõchṍ, ba no oja itaba saw̃i si matoea ba ono zaw̃i niboela ba biribiri, ba no ikaoni nono razo fefoe ba koemandra ba Abiataro ere. Ba hiza, ba manga ira chõnia ba labadoe nagoe, ba lamane: Jaʼahowoe razo Adonia! 26Ba jaʼodo, enonimõ andre, ba Sadoki ere ba Benaja, ono Jehojada ba enonioe Selomo, ba lõ nikaoninia. 27Hadia, jaʼoegõ zangoemaʼõ daʼõ, ba lõ õfarongogõ ba genonimõ ha niha dania zidadao ba dadaomamõ, fangalioe, jaʼoego sochõ jaʼo, razo?

28IV. Ba itema linia razo, Dawido, imane: Mihede chõgoe chõ Mbaseba! Ba so ia, iʼondrasi razo. 29Ba fahõloe razo, imane: Ba waʼadoehoe waʼaoeri Jehowa, si no mangefaʼõ jaʼo ba ngawalõ wamakao andrõ fefoe, 30— dali weʼamõigoe ba hõloe chõoe, ba chõ Jehowa, Lowalangi Ndraono Gizeraëli, me oemane: Onooe Selomo dania razo foerigoe, ba jaʼia dania zidadao ba dadaomagoe, fangaligoe, daʼõ oetõrõ maʼõchṍ. 31Ba ifaõndrõ ia Baseba tooe ba zalo, mangaloeloe ia chõ razo, ba imane: Ja anaoe noso zochõ jaʼo, razo, Dawido! 32Ba imane razo Dawido: Mihede chõgoe chõ Zadoki, ere, ba chõ Natano, samaʼeleʼõ, ba chõ Mbenaja, ono Jehojada. Ba mõi ira jomo chõ razo. 33Ba imane razo: Miʼohe genoni zochõ jaʼami, ba mifakoedo nonogoe Selomo ba koedo kalide chõgoe ba miʼohe mitooe ia ba Gihona. 34Ba daʼõ dania labajoini ia razo Ndraono Gizeraëli Sadoki ere ba Natano samaʼeleʼõ; ba aefa daʼõ, ba milaoe dorofe, ba moeʼao ami, mimane: Jaʼahowoe razo Selomo! 35Ba miʼoʼõ saʼae ia mijaw̃a, enaʼõ mõi ia mijomo ba enaʼõ moedadao ia ba dadaomagoe, fa jaʼia razo fangaligoe; noa sa jaʼia niw̃aʼõgoe, enaʼõ jaʼia razo ba Ndraono Gizeraëli ba ba mado Joeda. 36Ba itema li razo Benaja, ono Jehojada, imane: Jaʼia daʼõ! Jamoetehe Jehowa, Lowalangi zochõ jaʼo, razo! 37Si mane fanolo Jehowa sochõ jaʼo, razo, ja si manõ gõi wanolonia Selomo ba jamoeʼalaw̃aʼõ na jaw̃a dadaomania, moroi ba waʼalaw̃a dadaoma zochõ jaʼo, razo Dawido! 38Ba mõi ira mitooe, ira Sadoki ere Natano samaʼeleʼõ ba Benaja, ono Jehojada, awõ wazoeri andrõ, ba lafakoedo Zelomo ba hoeloe koedo kalide andrõ chõ razo Dawido, ba laʼohe ia ba mbewe Gihona. 39Ba ihalõ dandroe wanicha andrõ ba nose Sadoki ere, ba ibajoini Zelomo. Ba aefa daʼõ, ba lalaoe dorofe, ba moeʼao zato fefoe, lamane: Ja ahowoe razo Selomo! 40Ba laʼoʼõ ia mijaw̃a niha sato fefoe ba lalaoe zoeroene sato andrõ, ba lakaraini waʼiki, maʼifoe tõ, ba asila danõ, ba wangehegõ andrõ chõra.

41V. Ba irongo Adonia, awõ nikaoninia andrõ fefoe, si so chõnia, me no aefa sibai manga ira. Ba me irongo li dorofe andrõ Joabi, ba imane: Hadia zeboea li andrõ ba fagoeagoeasa, jomo ba mbanoea? 42Ba me hoemede na ia, ba so Jonata andrõ, ono Gabiataro ere. Ba imane Adonia: Ae ba daʼe, niha si fadoehoe dõdõda ndraʼoegõ, toeria si sõchi õʼohe chõda! 43Ba itema li Gadonia Jonata, imane chõnia: Si ndroehoe! noa sa ibaliʼõ razo Zelomo sochõ jaʼita, razo Dawido! 44Ba noa sa ibeʼe awõnia razo Zadoki ere ba Natano samaʼeleʼõ ba Benaja, ono Jehojada, awõ wazoeri andrõ; ba no lafakoedo ia ba koedo kalide chõ razo. 45Ba no labajoini razo ia ba Gihona ira Sadoki ere Natano samaʼeleʼõ, ba no mõi ira mijaw̃a, moroi ba daʼõ, no owoeawoea dõdõ, no tobali hoemoefa mbanoea. Daʼõ wagoeagoeasa andrõ nirongomi. 46Ba no moedadao Zelomo ba dadaoma razo. 47Ba noa saʼae mõi genoni razo, ba wamahowoeʼõ sochõ jaʼita, razo Dawido, wangoemaʼõ: Jamoeʼeboeaʼõ na dõi Zelomo Lowalangimõ, moroi ba dõimõ, ba jamoeʼalaw̃aʼõ na jaw̃a dadaomania, moroi ba dadaomamõ andrõ! Ba no mangaloeloe razo ba gasonia. (Moz. I. 47, 31). 48Ba noa na imane razo: Nisoeno Jehowa, Lowalangi Ndraono Gizeraëli, samedadao ba dadaomagoe fangaligoe, maʼõchṍ, ba zanehe hõrõgoe! 49Ba tokea fefoe nikaoni Gadonia ba maoso ira, ifoeli ia chõra zamõsana. 50Ba ataʼoe sibai Gadonia Zelomo, ba maoso ia, mõi ia moeʼolembai dandroe andrõ ba naha wameʼe soemange. 51Ba laʼombachaʼõ chõ Zelomo, lamane: Hiza, no iʼolembai dandroe ba naha wameʼe soemange Adonia, ba waʼataʼoenia razo Selomo, ba no imane: Jamõi ba hõloe chõgoe oea razo Selomo, wa lõ ifaboenoeʼõ genoninia andre. 52Ba imane Selomo: Na niha satoelõ tõdõ ia dania, ba sara mboe ba hõgõnia lõ atoroe ba danõ; ba na taʼila ilaoe zi lõ sõchi, ba si mate ia! 53Ba lahalõ ia ba zinga naha wameʼe soemange; ba me iroegi jomo, ba ifalõgoe tooe ia fõna razo Selomo. Ba imane chõnia Selomo: Foeliʼõ ba chõmi!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index