Search form

SOERA RAZO II. FAZA

I. Fõchõ Gahaseja. Me ifasofoeʼõ ba nadoe ba Nekerona, ba iʼombachaʼõ chõnia waʼamatenia dania Elija. II. Iʼechoegõ galitõ moroi jaw̃a ba zinenge Gahaseja Elija. III. Faʼamate Gahaseja.

1I. Ba me no mate Gahabi, ba lafabali ira ba Ndraono Gizeraëli Iraono Moabi. 2Ba no aechoe ba darali ba mbateʼenia ba zi sagõtõ ba Zamaria Gahaseja ba iʼofõchõi; ba ifatenge zinenge, imane chõra: Miʼae misofoe chõ Mbaʼali-Zeboebi andrõ, Lowalangi ba Nekerona, na dõhõ dania wõchõgoe andre. 3Ba no moehede malaʼika Jehowa chõ Gelija, banoea Disebe, no imane: Faoso, ae misi jaw̃a, faondragõ zinenge razo Zamaria andrõ, ba õmane chõra: Te lõ Lowalangi ba Ndraono Gizeraëli, wa mõi ami manotoe chõ Mbaʼali-Zeboebi andrõ, Lowalangi ba Nekerona! 4Andrõ imane saʼae Jehowa: Lõ dania ahetaʼõ ba gaso andrõ, ba zi no õleagõ ndraʼoegõ, si mate saʼae ndraʼoegõ. Ba mofanõ Gelija. 5Ba lafoeli ira chõ Gahabi sinenge andrõ. Ba imane chõra: 6Hana wa mifoeli ami? Ba lamane chõnia: So moroi si tooe niha, no faondraga, ba imane chõma: Mifoeli ami chõ razo samatenge jaʼami, ba mimane chõnia: Daʼõ niw̃aʼõ Jehowa: Te lõ Lowalangi ba Ndraono Gizeraëli, wa õfatenge ba wanofoe chõ Mbaʼali-Zeboebi andrõ, Lowalangi ba Nekerona? Andrõ lõ ahetaʼõ ba gaso andrõ, ba zi na õleagõ ndraʼoegõ, si mate saʼae ndraʼoegõ! 7Ba imane chõra: He wisa chalachala niha andrõ, si faondra chõmi mijaw̃a, sangoemaʼõ chõmi daʼõ? 8Ba lamane: Baroe boe mbaroenia ba oeli zaw̃i mbõbõ lõwilõwi. Ba imane: Elija, banoea Disebe. (Sach. 13, 4. Mat. 3, 4. Heb. 11, 37).

9II. Ba ifatenge chõnia goemandra zi lima woeloe, awõ zi lima woeloe andrõ chõnia. Ba me iroegi si jaw̃a Gelija koemandra andrõ, ba hiza, no doemadao Gelija ba zoezoe hili; ba imane chõnia koemandra andrõ: He enoni Lowalangi, no iw̃aʼõ razo: Ae mitooe! 10Ba itema li Elija, imane chõ goemandra zi lima woeloe andrõ: Na enoni Lowalangi ndraʼo, ba ja aechoe galitõ moroi jaw̃a ba mbanoea ba jamoeʼaʼõ, awõ zi lima woeloe andrõ chõoe! Ba aechoe galitõ moroi jaw̃a ba mbanoea, ba iʼā ia, fabaja si lima woeloe andrõ chõnia. (Loek. 9, 54). 11Ba ifoeli ifatenge goemandra bõʼõ Ahaseja, koemandra zi lima woeloe, awõ zi lima woeloe andrõ chõnia. Ba iroegi si jaw̃a Elija, ba imane chõnia: He enoni Lowalangi, imane razo: 12Taʼitaʼi, ae mitooe! Ba itema li Elija, imane chõnia: Na enoni Lowalangi ndraʼodo, ba ja aechoe galitõ moroi jaw̃a ba mbanoea ba jamoeʼaʼõ, awõ zi lima woeloe andrõ chõoe! Ba aechoe galitõ Lowalangi, moroi jaw̃a ba mbanoea ba iʼā ia, fabaja si lima woeloe andrõ chõnia. 13Ba ifoeli ifatenge Ahaseja goemandra zi lima woeloe, datõloe ae, awõ zi lima woeloe andrõ chõnia. Ba mõi mijaw̃a daʼõ — koemandra zi lima woelo andrõ, fanete zi daroea no mege — ba me iroegi, ba ibalõdoehini danõ fõna Gelija, mangaloeloe ia, imane: He enoni Lowalangi! enaʼõ na ahachõ maʼifoe dõdõoe nosogoe, awõ noso zawoejoemõ andre, si lima woeloe! 14Hiza, no aechoe galitõ moroi jaw̃a ba mbanoea ba no iʼā fõnagoe koemandra zi lima woeloe andrõ, si daroea, awõ zi limalima woeloe andrõ chõra; ba ijaʼe, ba enaʼõ na ahachõ maʼifoe dõdõoe nosogoe andre!

15III. Ba imane malaʼika Jehowa chõ Gelija: Ae awõnia mitooe, bõi ataʼoefi ia! Ba maoso ia, mõi ia, mõi ia awõnia mitooe chõ razo. 16Ba imane ba daʼõ: Daʼõ niw̃aʼõ Jehowa: Me no õfatenge zinenge, ba wanofoe chõ Mbaʼali-Zeboebi andrõ, Lowalangi ba Nekerona — te sa lõ Lowalangi ba Ndraono Gizeraëli, nisofoe li enaʼõ? — ba lõ ahetaʼõ ba gaso andrõ, ba zi no õleagõ tooe ndraʼoegõ, si mate saʼae ndraʼoegõ! 17Ba mate ia, itõrõ niw̃aʼõ Jehowa, nifaʼema Gelija; ba fangalinia razo, ba achinia Joramo, me no aracha mendroea fache razo mado Joeda Joramo, ono Jozafati; me no si lõ ono matoea Gahaseja andrõ. 18Ba hadia na enaʼõ nidoenõdoenõ ba chõ Gahaseja andrõ, hadia nilaoenia, ba no moetanõ ba zoera hikaja razo Ndraono Gizeraëli.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index