Search form

SOERA ZAMOEËLI II. FAZA

I. Irongo Dawido, wa no mate ndra Saoelo Jonata. II. Faʼaboe dõdõnia; iboenoe nono matoea andrõ, Iraono Gamaleki. III. Fangeʼesi Dawido ira Saoelo Jonata.

1I. Me no mate Zaoelo ba me no mangawoeli Dawido moroi ba wolohi Iraono Gamaleki andrõ, ba doea wonginia ba Zikelagi, 2— ba mahemoloe õ, ba hiza niha, samõsa, awõ Zaoelo mege, no isika noechania ba no ilaoe danõ ba hõgõnia. Ba me iroegi Dawido, ba ifalõgoe tooe ia ba danõ, mangaloeloe. 3Ba imane chõnia Dawido: Heza õʼotarai? Ba imane: Oeʼotarai Ndraono Gizeraëli, fasoewõta andrõ. 4Ba imane chõnia Dawido: He wisa? Ombachaʼõ chõgoe. Ba imane: No moloi zabõlõ, ba wasoewõta andrõ ba no ato zi mate niboenoe: ba he Saoelo ba ononia Jonata, ba no mate. 5Ba imane Dawido chõ nono matoea andrõ, sangombacha chõnia: Heza õrongo, wa no mate Zaoelo ba ononia Jonata? 6Ba imane ono matoea andrõ, sangombacha: Oeroegi hili Giliboa, lõ oedõnadõna, ba hiza Zaoelo, no itoendreheni ia ba dohonia, ba lõ aefa moroi foerinia goereta ba si fakoedo. (Sam. I. 31, 1—3). 7Ba ibaliʼõ ia foeri, ba me iʼila ndraʼo, ba hoemede ia chõgoe, ba oemane: Oerongo! 8Ba imane chõgoe: Ha niha ndraʼoegõ? Ba oemane chõnia: Iraono Gamaleki ndraʼodo. 9Ba imane chõgoe: Aine ba boenoe ndraʼo, noa sa ihawoei ndraʼo fechõlõchõlõ mbanoea, ba maʼifoe lõʼõ na sa saetoe nosogoe! 10Ba oeʼondrasi ia, oeboenoe ia, me no oeʼila lõ aoeri ia, bõrõ waʼateʼalania andrõ. Ba oehalõ zaemboenia, ba hõgõnia, ba tõla gasa ba mboelõchania, ba hiza, ba no oeʼohe chõoe, jaʼoegõ Toea.

11II. Ba itoejoe noechania Dawido, isika ba si manõ gõi nawõnia fefoe (Moz. I. 37, 29); 12ba aboe dõdõra ba megeʼege ira ba mamoni ba gõ, irege bongi, ba chõ Zaoelo ba ba chõ nononia Jonata ba ba mbanoea Jehowa andrõ, maʼoewoe Gizeraëli, me no mate ira ba mbawa ziʼõli. (Sam. I. 31, 13). 13Ba imane Dawido chõ nono matoea andrõ, sangombacha chõnia: Ha banoea ndraʼoegõ? Ba imane: Ono zi fatewoe gana ndraʼodo, Iraono Gamaleki. 14Ba imane chõnia Dawido: Ba hadia, ba lõ ataʼoeʼõ õhalõ tangaoe wamoenoe nibajoini Jehowa andrõ? (Sam. I. 24, 7). 15Ba hoemede Dawido ba nawõnia, ono matoea, imane: Ae ba daʼe ba boenoe ia! Ba iʼõʼõtõ tooe ba mate. (F. 4, 10. 12). 16Ba imane na chõnia Dawido: Ba hoeloemõ sa so ndromõ! No beweoe zangetoeʼõ hoekoemõ, me no õmane: No oeboenoe nibajoini Jehowa andrõ. (Raz. I. 2, 23. 33).

17III. Ba iʼeʼesi Zaoelo ba ononia Jonata Dawido, 18ba iw̃aʼõ, lafahaõ maʼoewoe Joeda, ba wangeʼesi andrõ; hiza, no moesoera ba ”zoera zadõlõ tõdõ” andrõ, imane: (A. 22; Jos. 10, 13). 19Famoadoemi, jaʼami Iraono Gizeraëli, ba no mate niboenoe ba hilimi! Alai waʼamate zabõlõ andrõ! 20Bõi miʼombachaʼõ ba Gata; bõi mifarongogõ ba newali Gasekalo, fa bõi omoeso dõdõ nono Ndrawa Wilisiti alawe, fa bõi maʼiki nono alawe ba niha si lõ moeboto. (Mich. 1, 10. Sam. I. 18, 6). 21Jaʼami hili Giliboa, bõi ja gõna ami namo ba he teoe, jaʼami benoea si falimo! Me no ba daʼõ tetibo mbaloese zabõlõ, baloese Zaoelo andrõ, lõ moebajoini fanicha. (Moz. IV. 15, 18—21). 22Ba ndro niboenoe andrõ ba ba dawõ zabõlõ, ba lõ sabõda fana Jonata, ba lõ sangawoeli fõda Zaoelo, lõ ahoeloea. 23Saoelo ba Jonata, ba no faoma omasi ira nawõra ba no faoma eboea dõdõra chõ nawõra, me aoeri ira, ba no tenga gõi si fabali ba waʼamate; jaʼira andrõ, si no alio, moroi ba mojo ba si no abõlõ, moroi ba zingo. 24Jaʼami, ono Ndraono Gizeraëli alawe, miʼeʼesi Zaoelo andrõ, si no mamonoecha jaʼami baroe loeo oengoe, samoeso dõdõmi, si no mamoʼaja noechami aja anaʼa! 25Alai waʼamate zabõlõ andrõ, me hino wasõndrata — Jonata andrõ, ba no mate niboenoe ba hilimi! 26Aboe dõdõgoe ndraʼoegõ, jaʼoegõ gaʼagoe Jonata; no omasiõ ndraʼoegõ chõgoe! Waʼomasigoe mege waʼomasimõ ndraʼodo, moroi ba waʼomasi ndra alawe ndra matoea! 27Alai waʼamate zabõlõ andrõ ba faʼafoefoe wangaró andrõ ba wasõndrata!”

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index