Search form

SOERA GESITERA FAZA

I. Owoeloa seboea chõ razo Ahasiwero. II. Lõ edõna mõi woʼomonia Wasi. Ba itiboʼõ ia razo.

1I. Ba me loeo razo Ahasiwero andrõ — Ahasiwero si no razo iʼotarai danõ Ndrawa Hindroe, iroegi danõ Gaitiofia, razo zi 127 ngaʼõrõ danõ —, 2me loeo daʼõ, me doemadao razo Ahasiwero andrõ ba dadaoma razo ba gõdo ba Zoesa, 3me no aloea mendroea fache razo ia, ba ilaoe fatome, ikaoni nawõnia salaw̃a fefoe ba enoninia, tobali owoelo chõnia goemandra ba danõ Weresia ba ba danõ Media ba salaw̃a ba koemandroe ba danõ misa, 4ba ifaʼeleʼõ waʼeboea waʼarazonia, awõ lachõmi waʼeboeania, ha oega bongi — 180 ngaloeo waʼara —. 5Ba me no ahori mbongi daʼõ, ba ibeʼe gõ zato fefoe razo, õ niha si so ba daʼõ ba gõdo, ba Zoesa, he satoea ba he iraono, owoeloa si fitoe bongi faʼara, barõ gõli kaboe ba ngai gõdo razo. 6Na lataw̃i goelamboe safoesi ba baroe loeo sowōē waroewaroe, nifosinga sinali tarafali oengoe, ba firõ niʼolaedoeroe andrõ, famachai ba zi hoelõ daroe nahe maremara. Ba kaso dadaoma niha, ba no bõna ame ba firõ ba mbale foewala ba maremara ba baloeri ba lazoeridi. 7Ba anaʼa mako wamadoe, ba oi si faehoefaehoe mako andrõ; ba agoe chõ razo, ba no fahõna, ba ginõtõ chõ razo sobõwõ. 8Ba ba wamadoe, ba no moebeʼe li, wa lõ famarooe; daʼõ sa goroisa razo ba zatoea fefoe ba gõdonia: balazi manõ zamõsana.

9II. Ba foʼomo razo, Wasi, gõi, ba ibeʼe gõi gõ ba ndra alawe ba gõdo razo Ahasiwero. 10Ba me no õnõ ngaloeo zilalõ, me no owoeawoea dõdõ razo, ba nagoe, ba ibeʼe li chõ ndra Mehoema, Bisita, Harabona, Bigita, Abagata, Setara, Charaka, si dafitoe, enoni jomo, sangai halõw̃õ chõ razo Ahasiwero, 11enaʼõ laʼohe chõ razo woʼomonia Wasi, sobala hõgõ woʼomo razo, ba wamaʼeleʼõ faʼasõchinia, ba niha sato ba ba zalaw̃a, me no si sõchi sibai bawa ia. 12Ba lõ edõna mõi Wasi, foʼomo razo, lõ iʼoʼõ niw̃aʼõ razo, nifaʼema genoni andrõ. Ba mofõnoe sibai razo, hoemola bacha dõdõnia. 13Ba hoemede razo ba zatoeatoea andrõ, soneche ba wamaigi inõtõ — fefoe hadia ia sa niw̃aʼõ razo, ba lafatimbaʼõ ba zoneche ba hoekoe ba ba wolohe ba lala hoehoeo; (Ngaʼõt. I. 12, 32); 14ba si no amaedola zahatõ chõnia, ba Charesena ba Setara ba Adamata ba Tarisi ba Meresi ba Maresena ba Memoecha, salaw̃a Ndrawa Weresia õsa ba salaw̃a Ndrawa Media õsa, si dafitoe andrõ, si faʼilaʼila bawa chõ razo ba si no hõgõ ba gamatõrõw̃ania andrõ, ba imane razo: (Eser. 7, 14): 15Hadia hoekoe nifatõrõ chõ Wasi foʼomo razo, me no lõ niʼoʼõnia oroisa razo Ahasiwero, nifaʼema genoni andrõ? 16Ba imane Memoecha chõ razo ba ba zalaw̃a andrõ: Tenga ha sambalõ horõ chõ razo horõ Wasi foʼomo razo, no horõ ba zalaw̃a fefoe ba ba niha sato fefoe ba danõ razo Ahasiwero fefoe. 17Dozi ira alawe, ba larongo dania wolaoe woʼomo razo, ba tobali laʼositengagõ ndra matoeara, na lamane: No iw̃aʼõ razo Ahasiwero, laʼohe chõnia woʼomonia Wasi, ba techõnia mõi. 18Maʼõchṍ andre ladoenõdoenõ ba nawõ razo salaw̃a foʼomo zalaw̃a Ndrawa Weresia ba foʼomo zalaw̃a Ndrawa Media, si no mamondrongo wolaoe woʼomo razo andrõ ba lõ ambõ dania wa lõ ba dõdõ ba fangaboe dõdõ. 19Na mõi dõdõ razo, ba jamoebeʼe goroisa, nitanõ ba zoera goroisa ba Ndrawa Weresia ba ba Ndrawa Media, fa tebai awoeʼa: wa lõ tola saʼae iʼoromaʼõ ia chõ razo Ahasiwero Wasi, ba faʼasalaw̃ania, ba ibeʼe ba ndra alawe bõʼõ razo, ba ndra alawe si sõchi moroi chõnia. (Dan. 6, 8). 20Ba na larongo goroisa razo andrõ, nifarongogõ ba gamatõrow̃ania — si no eboea sibai — maʼasagõrõ, ba laʼataʼoefi ndra matoeara ira alawe fefoe, he salaw̃a, ba he ono mbanoea. 21Ba omasi razo ba awõnia salaw̃a niw̃aʼõnia andrõ; ba iʼoʼõ razo niw̃aʼõ Memoecha. 22Ba ifaʼoheʼõ zoera, idozigõ õri barõ mbawa razo, sara õri, ba sagõrõ zoera, ha soi ira, ba hadia lira: ira matoea zamatõrõ si so baomonia; ba lira ilaoe. (Neh. 13, 24).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index