Search form

SOERA GESERA FAZA

I. Itehe chõra wangawoeli ba danõra ba folaoe osali Kiro, razo Weresia. II. Mangawoeli niha Jehoeda õsa. Ibeʼe chõra gamagama niʼamoniʼõ andrõ Kiro.

1I. Ba me awena razo Giro andrõ, razo Weresia — lõ dõfi na — enaʼõ itõrõ li Jehowa andrõ, nifaʼema Jeremia — ba ibeʼe ba dõdõ Giro, razo Weresia, Jehowa wameʼe oroisa ba mbanoeania fefoe — nifaʼoheʼõ soera gõi — imane: (Ngaʼõt. II. 36, 22. 23. Jer. 29, 10): 2Daʼe niw̃aʼõ Giro, razo Weresia: Fefoe gamatõrõw̃a ba goeli danõ, ba no ibeʼe chõgoe Jehowa, Lowalangi zoroego, ba jaʼia zangoemaʼõ chõgoe wolaoe osali chõnia ba Jeroezalema ba danõ mado Joeda. 3Ba ha niha ba chõmi mbanoeania, ba jamoetolo ia Lowalanginia, ba jamõi misi jaw̃a ba Jeroezalema ba jamoelaoe gosali andrõ chõ Jehowa, Lowalangi Ndraono Gizeraëli; daʼõ Lowalangi andrõ, ba Jeroezalema. 4Ba ha niha zi tosai na, ba mbanoea heza, fefoe, si fatewoe ia, ba ndramoetolo ia banoeara, firõ ba anaʼa ba balazo ba oerifõ, lõ lai nibeʼe saoha gõlõ, balazo gosali Lowalangi andrõ, ba Jeroezalema.

5II. Ba maoso zatoea ngafōē mado Joeda ba mado Mbenijami ba ere ba Ono Lewi — dozi nibeʼe Lowalangi ba dõdõ feʼamõi misi jaw̃a, ba wolaoe osali Jehowa ba Jeroezalema. 6Ba dozi niha si so ba ngaira, ba latolo ira gamagama firõ ba anaʼa ba balazo ba oerifõ ba aja, lõ lai fefoe hadia ia nibeʼe saoha gõlõ. 7Ba razo Kiro, ba ibeʼe baero gamagama andrõ ba gosali Jehowa, niʼoloiʼõ Neboekanesa mege, nihalõ ba Jeroezalema, nibeʼenia ba gosali Lowalanginia. (Ngaʼõt. II. 36, 7. 18). 8Daʼõ nibeʼe Giro, razo Weresia, ba danga Miteredata sangirõ anaʼa, ba daʼõ zangofaja chõ zalaw̃a mado Joeda Sesibasa [Seroebabeli]. (F. 3, 2). 9Ba daʼe waʼoja: 30 wiga anaʼa ba 1000 wiga firõ ba 29 gali 10ba 30 mako anaʼa, ba 410 mako firõ, ba 1000 ngawoea gamagama bõʼõ, 11— oroedoeania ba no 5400 ngawoea gamagama anaʼa ba gamagama firõ. Daʼõ fefoe niʼohe Zesibasa misi jaw̃a, me teʼohe mangawoeli ba Jeroezalema niʼoloiʼõ andrõ, moroi ba Mbabali.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index