Search form

SOERA JESAJA FAZA

I. Fangarõngarõ Jehowa ba waʼawoewoe Ndraono Gizeraëli andrõ. II. Lõ ba dõdõnia zoemange andrõ chõra. (Mos. V. 32, 1). III. Ifarooe dõdõra ba wamalalini eraʼera ba ifaboeʼoe wangefa horõ. IV. Fametaʼoe ba amaboeʼoela li.

1Famaʼeleʼõ andrõ chõ Jesaja, ono Gamosi, nifaʼeleʼõ chõnia, me loeo razo Joeda Oesia ba Jatamo ba Ahasi ba Hisikia, ba nõri Joeda andrõ ba ba Jeroezalema.

2I. Fondrondrongo, jaʼoegõ banoea si jaw̃a! Beʼe mbõrõ dalingaoe, jaʼoegõ tanõ! moehede Jehowa. No oerorogõ ndraono, no oeʼeʼeboea, ba no laʼerogõ ndraʼodo. 3Õrõbao, ba iʼila zochõ jaʼia ba kalide, ba iʼila naha gõnia, chõ zochõ jaʼia andrõ. Ba lõ laʼila ndraʼodo Iraono Gizeraëli, si lõ tõdõ mbanoeagoe andrõ. 4Alai ndraʼo soi samazõchi horõ andrõ, sonoro olalõw̃a! Niha si no tanõmõ zamazõchi horõ, iraono solaoe si tefoejoe. No larõi Jehowa, no latandraw̃aisi Niʼamoniʼõ andrõ, ba Ndraono Gizeraëli, no laʼerogõ. (Sin. 78, 8. F. 57, 3). 5Hana wa latohoegõ wamõzi jaʼami? Mitohoegõ sa atṍ waʼafabali andrõ. No falawoe fõchõ hõgõ ba no erege sibai dõdõ maʼasamboea. (Jer. 2, 30). 6Iʼotarai doetoeroe kahe, noemalõ jaw̃a ba hõgõ, ba lõ si lõ fõchõ chõnia, ha sambalõ socho ba mbawa ziʼõli ba selezitõ ba si bohooe mesocho, si lõ moeferaʼõ ba si lõ moeʼolohoeni ba si lõ moeʼokafoei fanicha. 7Tanõ si mate danõmi andrõ, ba banoea chõmi, ba no iʼā alitõ. Boea danõ chõmi, ba no niha bõʼõ zi manga, ba samaigi ami. Tanõ si mate danõ, si mane nifakiko niha boʼõ. (Moz. V. 28, 51. Ngaʼõt. II. 28). 8Ba si tosai ono Ziona alawe andrõ, ba no hoelõ nose ba kaboe nagoe, hoelõ niʼotete waõhõ, naha wemõrõ, ba kaboe lawogalõ, si mane banoea nifaʼoeʼoe nemali. 9Ba na lõ nisaigõ Jehowa ngahõnõ andrõ chõda gamogamo menaʼõ, ba no tobali si mane Sodoma ita ba no fagõlõgõlõ ita ba Gomora andrõ! (Moz. I. 19, 24. Rom. 9, 29).

10II. Mifondrondrongo li Jehowa, jaʼami sangoehoekoe andrõ ba Zodoma! Jaʼami, banoea Gomora andrõ, mifondrondrongo goroisa Lowalangida! 11Hadia wa miʼojaʼõ chõgoe zoemange andrõ? iw̃aʼõ Jehowa. No afõli ndraʼodo zoemange nitoenoe andrõ, biribiri si matoea, ba tawõ niboela andrõ, ba lõ omasido ndro nono zaw̃i andrõ ba do nono mbiribiri ba do zi matoea mbiribiri andrõ. (Sin. 50, 8. Amaed. 15, 8. F. 66, 3. Jer. 6, 20. Amos. 5, 22). 12No so ami, ba wangondrasi jaʼodo, ba ha niha zangoemaʼõ chõmi wangoehoendra olajama andrõ chõgoe? 13Bõi saʼae miʼohe zoemange faja. Ogoro ndraʼodo zoemange nitoenoe andrõ chõmi. Tesaʼa andrõ ba sabato ba fogaoni ba gowoeloa andrõ, ba te chõgoe: si lõ atoelõ, ba no baw̃a niʼamoniʼõ! 14Tesaʼa andrõ chõmi ba owasa nihonogõi andrõ, ba lõ edõnado; no tobali noro chõgoe, atagedo saʼae wolohe jaʼia. 15Ba na miʼoroʼõ dangami, ba oebaloegõ hõrõgoe chõmi, ba he mihõna wangandrõ, ba lõ oefondrondrongo chõmi; oi do saʼae dangami andrõ. (Amaed. 1, 28. Jer. 14, 12. Mich. 3, 4).

16III. Misasai ami; mihaogõ ami! Miheta mboeaboea si lõ sõchi andrõ chõmi, fa bõi oeʼila saʼae. Mibato wamazõchi si lõ sõchi! (Sin. 34, 15; 37, 27. Amos. 5, 15. Rom. 12, 9. Fet. I. 3, 11). 17Mifamaha ami ba wolaoe si sõchi? Migohi zatoelõ! Miʼoromaʼõ lala ba zamakao awõnia. Miʼohe ba lala hoehoeo zi lõ ama, si lõ ina! Mifatoenõ hoehoeo lacha mbanoea! 18Mitaboe! iw̃aʼõ Jehowa, datalaoe faʼera! He no hoelõ gasoembo waʼojo horõmi, ba hoelõ moeko safoesi dania; ba he no hoelõ mbaroe loeo waʼojo, ba hoelõ mboe mbiribiri dania. (Sin. 51, 9). 19Na sedõna ami ba na soloʼõ, ba miʼā zi sõchi ba danõ. (Moz. V. 28, 2 b. t.). 20Ba na te chõmi ba na fabali ami, ba õ mbawa ziʼõli ami dania; noa sa Jehowa zangoemaʼõ. (Moz. III. 20, 14 b. t. Moz. V. 28, 15 b. t.).

21IV. Alai waʼatobali sohorõ mbanoea andrõ, si lõ farõi mege! No fahõna chõnia hoekoe si sõchi mege, nahia hoekoe satoelõ ia fõna, ba iadaʼe, ba no nahia zangeʼengeʼe. 22Firõmi andrõ, ba no tobali achozila, ba agoe chõmi, ba no faroeka idanõ. (Hez. 22, 18). 23Salaw̃ami andrõ, ba no farõi ba no awõ zanagõnagõ. Dozi ira, ba manga ganaʼa ba laʼaloei mbõli gõlõ; lõ laʼohe ba lala hoehoeo zi lõ ama, si lõ ina, ba lõ latema hoehoeo lacha mbanoea. (Moz. II. 22, 22. Jer. 5, 28). 24Daʼõ mbõrõ, wa imane Soʼaja, Jehowa ngahõnõ andrõ, sabõlõ ba Ndraono Gizeraʼëli andrõ: Ha! oerara dõdõgoe ba zi faʼoedoe chõgoe andrõ ba oelaoe mbalõgoe ba zi fatioe tõdõ chõgoe! (Moz. V. 28, 63). 25Ba oebaja ndraʼoegõ, oehaogõ gachozila andrõ chõoe, amaedola nilaoe idanõ nawoe, ba simo andrõ chõoe, ba oehori. (Mal. 3, 3). 26Ba oefoeli oefataro zangoehoekoe andrõ chõoe, si mane fõna, ba samatoenõ hoehoeo andrõ, si mane ba mbõrõta. Ba awena dania labeʼe tõimõ mbanoea satoelõ, banoea si lõ farõi. 27Lala sadõlõ dania wangorifi Ziona andrõ, ba fangorifi zangawoeli andrõ chõnia, ba hoekoe satoelõ. 28Ba si gõna famakiko zolalõ andrõ, fabaja samazõchi horõ; ba sangerogõ Jehowa andrõ, ba nihori. (Sin. 1, 6; 92, 10; 104, 35). 29Saila sa ira dania ba manawa andrõ, somasi ami, ba afoesi mbawami waʼaila ba kaboe andrõ, somasi ami. 30Me hoelõ manawa saleoe boeloe ami dania, ba hoelõ kaboe si lõ idanõ. 31Ba sabõlõ andrõ, ba tobali rabo, ba nifazõchi dangania andrõ, ba tobali bo galitõ, ba faoma achozi ira si lõ samoenoe alitõ. (F. 33, 11).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index