Search form

SOERA JOBI FAZA

I. Faʼatoelõ Jobi andrõ ba faʼohahaoe dõdõnia. II. Iloeloe Jobi Lowalangi ba danga Zatana, ba wanandraigõ jaʼia. III. Taja fefoe zi so chõnia ba tekiko gõi nononia. Faʼebolo dõdõnia.

1I. So niha [fõna], ba danõ Oesi, Jobi dõinia, niha satoelõ ba sadõlõ tõdõ, sangataʼoefi Lowalangi ba si faʼoedoe ba zi lõ sõchi. (Hez. 14, 14. Jak. 5, 11). 2Ba fitoe nononia matoea ba tõloe nono alawe. 3Ba 7000 chõnia mbiribiri ba 3000 gondra, ba 500 fasa zaw̃i ba 500 galide si alawe, ba ato sibai zawoejoenia; tobali salaw̃a niha daʼõ, moroi ba niha bõʼõ fefoe, tánõ ba gatoemboecha loeo. 4Ba maosomaoso nononia matoea, lalaoe fatome, samõsa maʼṍchõ, ba lafakaonikaoniʼõ dalifoesõra alawe si datõloe andrõ, ba wemanga chõra. 5Ba na no fatoetoe watomesa andrõ, ba ifaw̃aʼõgõ chõra Jobi, enaʼõ na lasalaʼõ ira. Ba ihoelõ wongi wemaoso, ibeʼe zoemange nitoenoe, iʼohiaʼõ waʼatora. Imane saʼae Jobi: Ma dania no molalõ nonogoe andrõ, ma no laʼerogõ Lowalangi tõdõra! Si manõmanõ wolaoe Jobi andrõ.

6II. Ba samoeza maʼṍchõ, ba so nono Lowalangi, ba wangondrasi Jehowa, ba fao gõi chõra Zatana. (F. 38, 7. Ngaʼõt. I. 21, 1. Raz. I. 22, 19). 7Ba imane Jehowa chõ Zatana: Heza õʼotarai? Itema li Jehowa Satana, imane: Oeʼotarai koemoli, no oetõrõi goeli danõ! (Mat. 12, 43. Fet. I. 5, 8). 8Ba imane Jehowa chõ Zatana: Hadia, no õnehegõ gõi genonigoe Jobi andrõ? Lõʼõ sa famaedonia ba goeli danõ, ba waʼatoelõ ba ba waʼadõlõ dõdõ, ba wangataʼoefinia Lowalangi ba ba waʼoedoesa ba zi lõ sõchi. 9Itema li Jehowa Satana, imane: Hadia, iʼataʼoefi gõi Lowalangi Jobi, lõ bõli gõlõnia? Tenga no õfobaʼabaʼa ia ba omonia, fabaja fefoe zi so chõnia, fasoei? 10Halõw̃õ dangania, ba no õfahowoeʼõ, ba itoegoe oja manõ goerifõnia ba danõ. 11Ba tema oroʼõ dangaoe ba babaja zi so chõnia fefoe, ba lõ zi lõ ikaoni ba mbawaoe, wa iʼerogõ ndraʼoegõ. 12Ba imane Jehowa chõ Zatana: Hiza, fefoe hadia ia, zi so chõnia, ba ja so ba dangaoe, ba bõi babaja mbotonia! Ba mofanõ Zatana, irõi Jehowa.

13III. Ba ha samoeza maʼṍchõ, me mangamanga nono Jobi ono matoea ba ononia alawe, ba nomo gaʼara si aʼa, ba me labadoebadoe nagoe, 14ba so zangombacha toeria chõ Jobi; imane: No mangoehoendra laza zaw̃i ba mangaloei gõra galide si alawe, ba hinõloe, 15ba so manõ Ndrawa Zaba, laʼoloiʼõ, ba laʼõʼõtõ siʼõli zawoejoe, ba ha jaʼo zoloi, ba wangombacha chõoe. 16Ba lõ saetoe na li daʼõ, ba so zamõsa tõ, imane: No aechoe galitõ Lowalangi, moroi ba mbanoea si jaw̃a, ba no iʼā mbiribiri, fabaja sawoejoe, ba ha jaʼo zoloi, ba wangombacha chõoe. (Raz. II. 1, 12). 17Ba lõ saetoe na li daʼõ, ba so zamõsa tõ, imane: Tõloe bawá zabõlõ Ndrawa Galedaia, ba lahawoei manõ gondra, laraboe; ba sawoejoe, ba laʼõʼõtõ siʼõli, ba ba jaʼo zoloi, ba wangombacha chõoe. 18Ba lõ saetoe na li daʼõ zoei, ba so zamõsa tõ, imane: Mangamanga mege nonooe matoea ba onooe alawe, ba nomo gaʼara si aʼa, 19ba iʼozoemagõ so nangi sabõlõ, moroi ba danõ si mate, telobi ba nomo andrõ, ba watalingania maʼaʼõfa, ba adoedoe, ilangõ ndraonooe andrõ ba mate ira, ba ha jaʼo zoloi, ba wangombacha chõoe. 20Ba maoso Jobi, isika noechania, ifatõwõʼõ mboenia; ba ifalõgoe tooe ia ba danõ, mangaloeloe ia. (Moz. I. 37, 29. Eser. 9, 3). 21Imane: Lõ noechagoe, me oeʼotarai daloe ninagoe, ba lõ noechagoe, na mangawoelido dania, Jehowa zameʼe ba Jehowa zangai; nisoeno dõi Jehowa! (Sangomb. 5, 14. Tim. I. 6, 7)! 22Ba daʼõ fefoe, ba lõ lalõ Jobi, ba lõ iw̃aʼõ si lõ gõna nilaoe Lowalangi. (F. 2, 10).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index