Search form

SOERA ZANGOEHOEKOE FAZA

I. Lasoewõ Ndrawa Ganaʼana mado Joeda ba mado Zimeoni. II. Atoeʼa ba Mbetiëli mado Mbenijami. III. Banoea si lõ latimba.

1I. Ba tobali me no mate Josoea, ba lasofoe chõ Jehowa Iraono Gizeraëli, lamane: Ha niha ndraʼaga zi fõfõna mõi misijaw̃a ba Ndrawa Ganaʼana, fasoewõ chõra? 2Imane Jehowa: Mado Joeda zi fõfõna mõi misijaw̃a; oebeʼe ba dangara danõ. 3Ba lamane mado Joeda ba dalifoesõra mado Zimeoni: Mitaboe awõma ba dána chõma, enaʼõ tasoewõ Ndrawa Ganaʼana, ba mõiga gõi awõmi dania ba dána chõmi! Ba fao chõra mado Zimeoni. 4Ba mõi mado Joeda ba ibeʼe ba dangara Jehowa Ndrawa Ganaʼana ba Dawa Weresi, tobali laʼalani ba Mbeseki, 10,000 [zi mate]. 5Ba fachamõ ira Gadoni Beseki ba Mbeseki, fasõndra ira, ba laʼalani Ndrawa Ganaʼana, fabaja Dawa Weresi. 6Ba moloi Gadoni Beseki, ba lagohi ia. Laraʼoe ba laʼew̃a doetoeroe seboea ba danga ba ba gahe. 7Ba imane Adoni Beseki: Fitoe ngafoeloe razo si no moeʼew̃a toetoeroe danga ba toetoeroe kahe seboea, zangozaragõ achõchõla barõ meza chõgoe: Nilaoegoe andrõ, be isoelõni chõgoe Lowalangi! Awena laʼohe ia ba Jeroezalema, ba daʼõ mate ia. (Moz. III. 24, 19). 8Ba lasoewõ Jeroezalema mado Joeda, ba atoeʼa ira, lalaw̃a bawa ziʼõli, ba banoea, ba latoenoe. 9Aefa daʼõ, ba mõi misi tooe mado Joeda, ba wanoewõ Dawa Ganaʼana andrõ, si so ba hili andrõ ba danõ tánõ raja ba ba zaloʼo tanõ andrõ. 10Ba lasaw̃a Ndrawa Ganaʼana andrõ ba Heberona mado Joeda. Ba tõi Heberona fõna, ba Kiriati Garaba. Ba teʼala Zezai ba Ahima ba Talamai, ngaʼõtõ Genaki andrõ, labeʼe. (Jos. 15, 14, b. t.). 11Ba moroi ba daʼõ, ba lasaw̃a mbanoea Debira; ba tõi Debira fõna, ba Kiriati Zeferi. 12Ba ifaboeʼoe Kalebi, imane. Ha niha zolaw̃a Kiriati Zeferi andrõ, ba satoeʼa ba daʼõ, chõnia oebeʼe nonogoe Achasa. 13Ba atoeʼa Goteniëli, ono Genasi andrõ, achi Galebi, ba ibeʼe chõnia nononia Achasa [Kalebi]. 14Ba me laʼohe chõnia, ba ifarooe, enaʼõ iʼandrõ mbenoea chõ namania. Ba ahele ia moroi ba hoeloe galide, ba imane chõnia Kalebi: 15Hana ndraʼoegõ! Ba imane chõnia: Beʼe atṍ chõgoe mboeala ba wofanõ. Noa sa õbeʼedo ba danõ tánõ raja, si no okõlikõli, ba beʼe atṍ chõgoe goemboe nidanõ! Ba ibeʼe chõnia goemboe ba hili ba oemboe ba ndraso Kalebi. 16Ba no mõi misi jaw̃a nono Ndraono Geni andrõ, laʼo Mose, no laheta ira ba mbanoea chorema andrõ, awõ mado Joeda, no lasaw̃a danõ mado Joeda andrõ, tanõ si mate, ba zanaere, ba Garada, mõi ira mowanoea, ba daʼõ, ba ngai Ndraono Gamaleki. (Moz. IV. 10, 29. F. 4, 11). 17Ba fao ba dalifoesõra mado Zimeoni mado Joeda, ba laʼalani Ndrawa Ganaʼana, banoea Zefata, ba lafakiko; andrõ wa labeʼe tõi mbanoea andrõ Horima. 18Ba mado Joeda andrõ, ba lahalõ gõi chõra Gasa, fabaja tanõra, ba Asekalo, fabaja tanõra, ba Ekerona, fabaja tanõra. 19Ba itolo mado Joeda Jehowa, tobali laʼochõgõ mboto hili andrõ. Ba banoea ba zaloʼo andrõ, ba tebai latimba, bõrõ me so chõra goereta siʼõli. 20Ba Heberona andrõ, ba latehe chõ Galebi, laʼoʼõ niʼoroiʼõ Mose, ba itimba ba daʼõ ngaʼõtõ Genaki andrõ, si datoloe. (Moz. IV. 14, 24. Jos. 14, 13). 21Ba Iraono Jeboesi andrõ, banoea Jeroezalema, ba tebai latimba mado Joeda. Ba tobali lõ teboelõ Ndraono Jeboesi andrõ ba ngai mado Joeda ba Jeroezalema, irege maʼõchõ andre.

22II. Ba iraono Josefo andrõ, ba mõi gõi misi jaw̃a ba Mbetiëli, ba itolo ira Jehowa. 23Ba lafaoezeï Mbetiëli andrõ iraono Josefo; ba tõi mbanoea andrõ fõna, ba Loesi. (Moz. I. 28, 19). 24Ba samaoeze andrõ, ba laʼila niha si otarai moroi jomo. Ba lamane ba daʼõ: Oromaʼõ chõma lalama ba mbanoea ba matoloʼõ gõi. 25Ba iʼoromaʼõ chõra zolala ira mijomo ba lalaw̃a mbanoea andrõ bawa ziʼõli; ba niha no mege ba si sawōē jaʼira, ba laʼorifi. 26Ba isaw̃a danõ Ndraono Cheti niha andrõ, itaroeʼõ mbanoea ba ibeʼe tõinia Loesi; ba daʼõ dõinia iroegi maʼõchṍ.

27III. Ba iraono Manase, ba lõ latimba mbanoea Mbeti Zeana andrõ ba banoea si fabõbõ chõra, jaʼia Daʼanachi ba si fabõbõ chõra, ba banoea Dora ba si fabõbõ chõra, ba banoea Jibelea ba si fabõbõ chõra, ba banoea Megido ba si fabõbõ chõra. Tobali faloecha Ndrawa Ganaʼana, lõ teboelõ ira ba danõ daʼõ. 28Ba me abõlõ Ndraono Gizeraëli, ba labeʼe barõ mbawara Ndrawa Ganaʼana andrõ, enonira: fanimba jaʼira, ba tebai. 29Ba Iraono Geferaji, ba lõ latimba Ndrawa Ganaʼana banoea Geseri, ba tobali lõ teboelõ Ndrawa Ganaʼana ba ngaira, ba Geseri. 30Ba Iraono Zeboeloni, ba lõ latimba mbanoea Giterono ba banoea Nahaloli, ba tobali lõ teboelõ ba ngaira Ndrawa Ganaʼana, ba tobali enonira ba gafoeriata. 31Ba Iraono Gaseri, ba lõ latimba mbanoea Ako ba banoea Zidona, femõi Gahalaba ba Achisiba ba Heleba ba Afika ba Rehobo. 32Ba tobali tefasoei Dawa Ganaʼana Ndraono Gaseri, Dawa Ganaʼana sochõ tanõ, me tebai latimba. 33Ba Iraono Nafetali, ba lõ latimba mbanoea Mbeti Zemesi ba banoea Mbeti Anata. Ba tobali tefasoei ira Dawa Ganaʼana sochõ tanõ; ba banoea Mbeti Zemesi ba banoea Mbeti Anata, ba enonira dania. 34Ba Iraono Gamori zondregeni ba hili mado Dano, lõ latehe mõi mitooe ira ba zaloʼo. 35Tobali faloecha Ndraono Gamori andrõ lõ teboelõ ira ba Hari Heresi ba ba Najalono ba ba Zaʼalibi. Ba me abõlõ dania maʼoewoe Josefo, moroi chõra, ba tobali enonira irā. 36Ba tanõ Ndraono Gedomo, ba iʼotarai lala dongo andrõ, ba iroegi Zela ba mijaw̃a na.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index