Search form

SOERA MOZE III. FAZA

I. Amachoita ba zoemange nitoenoe, saw̃i. II. Biribiri ba nambi. III. Marafadi.

1I. Ba hoemede Jehowa chõ Moze, fahoehoeo ia chõnia, moroi ba nose wamaʼeleʼõ, imane: (Moz. II. 29, 42): 2Hede ba Ndraono Gizeraëli ba w̃aʼõ chõra: na so ba chõmi zameʼe soemange Jehowa, ba oerifõnia ibeʼe soemange, saw̃i, ba ma oerifõ sideʼide. 3Na saw̃i ibeʼe soemange nitoenoe, ba si matoea, si lõ sala ibeʼe. Jamoeʼohe ba zinga mbawandroehõ nose wamaʼeleʼõ, enaʼõ somasi Jehowa ia, ibeʼe. (Moz. II. 29, 10). 4Ba jamoetoefa tangania hõgõ zoemange andrõ, ba niʼomasiʼõ ia ba aefa horõnia ibeʼe. 5Awena dania itaba nono zaw̃i andrõ, fõna Jehowa; ba iraono Gaʼaroni, ere andrõ, zameʼe do andrõ. Latefe naha wameʼe soemange do andrõ fasoei, naha wameʼe soemange andrõ ba zinga mbawandroehõ nose. 6Ba iboʼa goeli zoemange ba itatawi nõsi. 7Ba iraono Gaʼaroni, ere andrõ, zangeboea alitõ ba dete naha wameʼe soemange ba labahogõ ba galitõ geoe nisisila. 8Ba lahaogõ Iraono Gaʼaroni, ere andrõ, wameʼe jaw̃a ba mbaho geoe andrõ ba galitõ ba naha wameʼe soemange ngawalõ andrõ, hõgõ ba tawõ. 9Ba alachaõ ba ahe, ba lasasai ba nidanõ, ba ifarahoegõ itoenoe ba naha wameʼe soemange ere soemange nitoenoe, soemange nibeʼe chõ Jehowa, nifatõrõ ba galitõ, samohoea.

10II. Ba na oerifõ sideʼide — ono mbiribiri, ba ma nambi — zoemange andrõ, nibeʼenia soemange nitoenoe, ba si matoea, si lõ sala ibeʼe. 11Jamoetaba fõna Jehowa jõoe naha wameʼe soemange; ba iraono Gaʼaroni, ere andrõ, zanefe naha wameʼe soemange do andrõ, fasoei. 12Ba itatawi, ba ihaogõ ere, wameʼe ba mbaho geoe andrõ ba galitõ ba naha wameʼe soemange ngawalõ andrõ, awõ hõgõ, awõ dawõ. 13Ba alachaõ ba ahe, ba lasasai ba nidanõ, ba ifarahoegõ ere, wameʼe jaʼia, itoenoe ba dete naha wameʼe soemange; soemange nitoenoe ia, soemange nibeʼe chõ Jehowa, nifatõrõ ba galitõ, samohoea.

14III. Ba na soemange fofo zoemange andrõ, nibeʼenia chõ Jehowa, ba foene ba ma ono marafadi ibeʼe soemange. 15Ba ere zolohe ba naha wameʼe soemange, iboto hõgõ ba itoenoe ba galitõ ba naha wameʼe soemange, ba do, ba niferaʼõ ba ngai naha wameʼe soemange. 16Ba horokina ba boe, ba iheta ba itiboʼõ ba nidoewagõ awoe, tánõ ba gatoemboecha, iʼotarai naha wameʼe soemange. 17Ba ilõwa gafi ba lõ ifaefa; ba itoenoe ere ba naha wameʼe soemange, ba mbaho geoe andrõ ba galitõ jaw̃a; soemange nitoenoe ia, soemange nibeʼe chõ Jehowa, nifatõrõ ba galitõ, samohoea.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index