Search form

SOERA MOZE IV. FAZA

I. Fangofaja niha; salaw̃ara. II. Sabõlõ zi felendroea toea. III. Teoniagõ Nono Lewi.

1I. Ba hoemede Jehowa chõ Moze ba danõ si mate, ba gahe hili Zinaʼi, ba nose wamaʼeleʼõ andrõ, me fasoelõna ba mbaw̃a si doea, me dõfi si doea, aefa aheta ira ba danõ Miseraji, imane: (Moz. V. 1, 3): 2Miʼofaja ha waʼato mbanoea Ndraono Gizeraëli andrõ, samboesamboea mado ba sawoesawōē, ba tõira, samboesamboea, dozi motõi matoea, samõsamõsa. (Moz. II. 30, 12). 3Dozi solohe baloese, ba Ndraono Gizeraëli, iʼotarai zi 20 fache faʼeboea, ba si aʼa moroi andrõ, ba miʼofaja, sambasambawá, jaʼoegõ ba Aʼaroni. 4Ba samboesamboea mado, ba samõsamõsa tebeʼe awõmi, hõgõ niwara andrõ. 5Daʼõ dõi nibeʼe awõmi: ba mado Roebeno, ba Elisoeri, ono Zedeoeri. 6Ba ba mado Zimeoni, ba Seloemiëli, ono Zoeri-Sadaʼi. 7Ba ba mado Joeda, ba Nahaso, ono Gaminadabi. 8Ba ba mado Isasari, ba Natanaʼeli, ono Zoeara. 9Ba ba mado Zeboeloni, ba Eliabi, ono Helono. 10Ba ba Ndraono Josefo: ba mado Geferaji, ba Elizama, ono Gamihoedi, ba ba mado Manase, ba Gameliëli, ono Wedasoeri. 11Ba ba mado Mbenijami, ba Abidano, ono Gideono. 12Ba ba mado Dano, ba Ahiëzeri, ono Ami-Sadaʼi. 13Ba ba mado Gaseri, ba Fagiëli, ono Ocherana. 14Ba ba mado Gado, ba Eliazafi, ono Degoeëli. 15Ba ba mado Nafetali, ba Ahira, ono Genano. 16Daʼõ nitoejoe ba zato, hõgõ niwara andrõ, hõgõ ngahõnõ Ndraono Gizeraëli.

17II. Ba lafakaoniʼõ niha andrõ, si no moetõtõi chõra, ira Moze Aʼaroni, 18ba lafaloechaʼõ mbanoea maʼafefoe, me fasoelõna ba mbaw̃a si doea. Ba lafatanõʼõ ba zoera waʼatoemboe dõira, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, samõsamõsa. 19Dali niw̃aʼõ Jehowa chõ Moze; si manõ sa wangofajania jaʼira ba danõ si mate, ba gahe hili Zinaʼi. 20Ba faʼato ngaʼõtõ ndraono Roebeno, si aʼa ndraono Gizeraëli, iwara ba ngafoera ba tõira, si ha samboesamboea, niʼofaja, samõsamõsa — dozi motõi matoea, iʼotarai zi 20 fache faʼeboea ba si aʼa moroi andrõ, dozi solohe baloese, 21ha waʼato niʼofaja, mado Roebeno, ba no 46,500. 22Ba faʼato ngaʼõtõ ndraono Zimeoni, iwara ba ngafoera ba tõira, si ha samboesamboea, niʼofaja, samõsamõsa — dozi motõi matoea, iʼotarai zi 20 fache faʼeboea ba si aʼa moroi andrõ, dozi solohe baloese, 23ha waʼato niʼofaja, mado Zimeoni ba no 59,300. 24Ba faʼato ngaʼõtõ ndraono Gado, iwara, ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 25ha waʼato niʼofaja, mado Gado, ba no 45,650. 26Ba faʼato ngaʼõtõ ndraono Joeda, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 27ha waʼato niʼofaja, mado Joeda, ba no 74,600. 28Ba faʼato ngaʼõtõ ndraono Izasari, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 29ha waʼato niʼofaja, mado Izasari, ba no 54,400. 30Ba faʼato ngaʼõtõ ndraono Zeboeloni, iwara ba ngafoera ba tõira, si ha samboesamboea, iʼotarai zi 20 woeloe fache faʼeboea ba si aʼa moroi andrõ, dozi solohe baloese, 31ha waʼato niʼofaja, mado Zeboeloni, ba no 57,400. 32Ba ba ndraono Josefo andrõ, ba faʼato ngaʼõtõ ndraono Geferaji, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 33ha waʼato niʼofaja, mado Geferaji, ba no 40,500. 34Ba faʼato ngaʼõtõ ndraono Manase, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 35ha waʼato niʼofaja, mado Manase, ba no 32,200. 36Ba faʼato ngaʼõtõ ndraono Mbenijami, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe, baloese, 37ha waʼato niʼofaja, mado Mbenijami, ba no 35,400. 38Ba faʼato ngaʼõtõ ndraono Dano, iwara ba ngafoera ba tõira, si ha samboesamboea, iʼotarai si 20 fache faʼeboea ba si aʼa moroi andrõ, dozi solohe baloese, 39ha waʼato niʼofaja, mado Dano, ba no 62,700. 40Ba faʼato ngaʼõtõ ndraono Gaseri, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 41ha waʼato niʼofaja mado Gaseri, ba no 41,500. 42Ba faʼato ngaʼõtõ ndraono Nafetali, iwara ba ngafoera ba tõira, si ha samboesamboea, iʼotarai zi 20 fache faʼeboea ba si aʼa moroi andrõ, dozi solohe baloese, 43ha waʼato niʼofaja, mado Nafetali, ba no 53,400. 44Daʼõ niʼofaja andrõ, niʼofaja ndra Moze Aʼaroni ba salaw̃a Ndraono Gizeraëli; felendroea daʼõ, samboesamboea mado, ba samõsamõsa. 45Ba dozi niʼofaja, Iraono Gizeraëli, ngafoera andrõ, iʼotarai zi 20 fache faʼeboea ba si aʼa moroi andrõ, dozi solohe baloese ba Ndraono Gizeraëli — 46dozi niʼofaja, ba no 603,550.

47III. Ba Ono Lewi andrõ, iwara andrõ, ba lõ lafao chõra ba wangofaja. (Moz. II. 38, 26). 48Ba hoemede Jehowa chõ Moze, imane: 49Ono Lewi andrõ, ba lõ tola õʼofaja, lõ tola õʼerai waʼatora, ba ngai Ndraono Gizeraëli bõʼõ. 50Ba nahia zoera goroisa õfataro Nono Lewi, ba ba wakakenia, fefoe, ba ba zi fabõbõ chõnia, fefoe. Jaʼira zangosaʼõ ose andrõ, awõ wakake andrõ ba chõnia fefoe, ba jaʼira zangai halõw̃õ ba daʼõ, lafasoei nose wameʼe nahiara. 51Ba na mofanõ nose, ba Ono Lewi zanoedoegõ, ba na tebato nose, ba Ono Lewi zamaʼanõ, ba na so niha bõʼõ, si hatõʼõ jaʼia, ba niboenoe. 52Ba Iraono Gizeraëli bõʼõ, ba jamoefaigi nahania zamõsana ba zinga mandrera chõra, dali ngawawara andrõ. 53Ba Ono Lewi, ba lafasoei nahia zoera goroisa, wameʼe nahara, fa bõi gõna fõnoe Lowalangi Ndraono Gizeraëli sato. Ba lahalõhalõ halõw̃õ ba nahia zoera goroisa Ono Lewi andrõ. 54Ba laʼoʼõ sibai Iraono Gizeraëli niw̃aʼõ Jehowa chõ Moze — ba daʼõ labeʼe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index