Search form

SOERA GAMAEDOLA 1

I.

Hadia goena zoera andre; fangombacha faʼatoeatoea. A. Hoehoeo I. (Faz. 1, 8—Faz. 3—35). II. Famangelama, fa bõi ladõnisi ita niha si lõ sõchi. III. Fogaoni waʼatoeatoea, ba woloʼõ chõnia, enaʼõ aefa ita ba zamakiko andrõ.

1I. Amaedola chõ Zelomo, ono Dawido, razo Ndraono Gizeraëli, (Raz. I. 5, 9—12).

2Enaʼõ tesõndra waʼatoeatoea ba fangenanõ, enaʼõ aboto ba dõdõ hoehoeo zatoeatoea.

3Enaʼõ latema wotoe, fangatoeatoea, ba faʼatoelõ ba faʼadõlõ ba fanõrõ lala si sõchi.

4Enaʼõ lasõndra waʼaboto ba dõdõ si lõ mangila watahõgõ na, ba enaʼõ atoeatoea nono matoea ba enaʼõ motõdõ.

5Na ifondrondrongo satoeatoea, ba tedooe waʼaboto ba dõdõnia, ba si no motõdõ, ba isõndra lala sadõlõ,

6fa aboto ba dõdõnia gamaedola sideʼide ba amaedola seboea, awõ daroma li zatoeatoea, awõ dahõdahõ andrõ chõra.

7Fangataʼoefi Jehowa mbõrõta waʼaboto ba dõdõ, ba ba zambõ tõdõ, ba lõ ba dõdõ waʼatoeatoea ba he fotoe.(F. 9, 10. Sin. 111, 10. Job. 28, 28).

8A. II. Fondrondrongo, onogoe, wamangalama namaoe, ba bõi ositengagõ wamahaõ ninaoe andrõ.(F. 6, 20).

9Saemboe omasiõ saʼae daʼõ ba hõgõoe ba hoelõ nifatali ba mbagioe. (F. 4, 9).

10He onogoe! Na ladõnisi ndraʼoegõ samazõchi si lõ sochi, ba bõi oʼõ.

11Na lamane: ”Taboe, datatarogõ zadõlõ tõdõ, ba tafagõnaisi zi lõ horõ, lõ bõrõbõrõ.

12Tatõlõ aoeri ira, si mane banoea tooe, ba si lõ horõ, ba si mane silalõ mitooe ba gohokoho.

13Ba tasõndra ngawalõ ganaʼa si sõchi; ba tafaʼõsi nomoda niraboe andrõ.

14Fagõlõgõlõ dania goerachada; ha samboea mbolada, jaʼita fefoe.”

15Ba jaʼoegõ, onogoe, ba bõi fao ndraʼoegõ chõra; bõi hoendragõ lalara andrõ.

16Ba zi lõ sõchi lasaw̃a; aõsõ ira wamoenoe niha.

17Zajazaja gõlõ sa, na lalaoe goeʼõ ba zanehe wofo fefoe.

18Jaʼira, ba laʼaloei wamoenoera, laʼaloei lala wangetoeʼõ nosora.

19Daʼõ lalara, dozi ira, sangisõ anaʼa; iboenoe ira fangisõra andrõ.

20III. Moeʼao waʼatoeatoea baewali, ifarongogõ linia ba golajama.

21Ba zinga misa, ba zato niha baolajama, moeʼao ia; ba mbawa gõli ba mbanoea fahoehoeo ia, imane: (F. 8, 1).

22”He jaʼami, si lõ tõdõ, ha waʼara tõ na omasi ami walõtõdõ andrõ? Ba ha waʼara na omasi zangoʼaja wangoʼaja andrõ, ba ha waʼara na faʼoedoe zambõ tõdõ ba waʼaboto ba dõdõ?

23Miʼotahõgõ wotoe andrõ chõgoe! Hiza, oefaloea chõmi Gehehagoe; aboto ba dõdõmi daroma ligoe oebeʼe. 24Me no moeʼao ndraʼo, ba me techõmi, me no oeʼoroʼõ dangagoe, ba me lõ sameʼe ba dõdõ. (Jes. 65, 2. 12).

25Me no miʼositengagõ saʼae wamolalagoe tõdõmi, fefoe, ba me lõ niʼoʼõmi fotoe andrõ chõgoe.

26Ba maʼiki gõi ndraʼodo, na gõna ami famakiko, oeʼoʼaja ami, na itõrõ ami ametaʼoeõ. (F. 3, 34).

27Na itõrõ ami sataʼoe ami, hoelõ deoe laõhõ, ba na so moroi sa wamakikomi, hoelõ nangi sabõlõ, na ihawoei ami famakao ba faʼatosasa.

28Awena dania laʼangarõfi li ndraʼo, ba lõ oetema lira; laʼaloei ndraʼo, ba lõ lasõndrado. (Jes. 59, 2. Mich. 3, 4).

29Bõrõ me no fatoewoe chõra waʼaboto ba dõdõ, ba me lõ nitehera fangataʼoefi Jehowa.

30Lõ edõna ira mege wamolalagoe tõdõra, ba no laʼositengagõ wotoe andrõ chõgoe, fefoe.

31Andrõ laʼā dania loealoea nitõrõra andrõ, ba aboeso ira nichoi dõdõra andrõ. (Jes. 3, 10. 11).

32Famoenoe zowõhõwõhõ andrõ wanandrora, ba famakiko zambõ tõdõ wa lõ ba dõdõ andrõ chõra. (F. 8, 36).

33Ba ha niha zamondrongo chõgoe, ba ahono ba danõ, ba lõ aboe dõdõ; lõ faʼataoenia wamakiko. (F. 8, 34).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index