Search form

SOERA GAMAEDOLA 10

II.

Famahaõ ba zatoelõ. Nilaoe Zelomo.

1Faʼomoeso dõdõ namania nono matoea satoeatoea; ba fangaboe dõdõ ninania nono si lõ tõdõ. (F. 15, 20; 17, 21. 25).

2Anaʼa nisõndra ba zi lõ atoelõ, ba si lõ goena; ba faʼatoelõ dõdõ, ba iʼefaʼõ ba waʼamate.

3Lõ ibeʼe Jehowa olofo zatoelõ tõdõ, ba itimba wangisõ zeboea horõ. (Sin. 37, 19. 20).

4Noemana dania zareoe tanga, ba isõndra ganaʼa tanga zawõlõʼõlõ. (F. 6, 6—11; 12, 24. 27; 19, 15; 28, 19).

5Sangõhõna na baw̃a wonowi, ba no ono satoeatoea; ba si mõrõ na baw̃a wamasi, ba ono sangailasi ira amania.

6Fahõna dania hoewoehowoe ba hõgõ zatoelõ tõdõ, ba bewe zeboea horõ, ba no tobaloe falõatoelõ.

7Famahowoe wa lõ olifoe niha bõʼõ zatoelõ tõdõ; ba tõi zeboea horõ, ba obooe. (Job. 18, 17. Sin. 9, 6).

8Satoetoea tõdõ, ba ihalõ chõnia goroisa andrõ; ba si so bewe zowõhõ mowa, ba salaoe dania.

9Sanõrõ lala sadõlõ, ba lõ fangaboe dõdõ ba lala, ba sanõrõ lala sabila, ba oroma dania.

10Samamõʼi hõrõ, fangoʼaja, ba ibaosi dõdõ nawõnia; ba si lõ aiwõ wanegoe niha, ba iʼatoelõʼõ ira. (F. 6, 13).

11Oemboe waʼaoeri mbawa zatoelõ tõdõ; ba bewe zeboea horõ, ba no tobaloe falõatoelõ. (A. 31. F. 13, 14).

12Loealoea watioesa, ba fasosota; ba faʼomasi andrõ, ba no baloebaloe golalõwa, fefoe. (Fet. I. 4, 8).

13Ba mbewe zi so tõdõ, ba tesõndra waʼatoeatoea; ba bõzibõzi zi nangea ba hoeloe zi lõ tõdõ.

14Satoeatoea, ba lõ laʼoromaʼõ waʼaboto ba dõdõra, ba ba mbewe zi lõ tõdõ, ba no ahatõ waʼadoedoe.

15Seboea anaʼa, ba idõnadõna ba ganaʼania weʼeweʼe dõdõnia; ba si noemana, ba aboe dõdõ ba waʼanoemanania. (F. 18, 11).

16Õlõ zatoelõ tõdõ, ba tobali fangorifi; ba nisõndra zeboea horõ, ba tobali horõ. (Loek. 16, 19).

17Lala ba waʼaoeri lala zamondrondrongo fotoe; ba si lõ ba dõdõ fanegoe, ba eloengoe.

18Saminiʼõ fatioesa, ba no sobewe solaoe faja; ba samaʼema famõbõgõ si lõ sõchi, ba si lõ tõdõ.

19Ba zoja li, ba lõ zi lõ olalõw̃a; ba sanaha bewenia, ba no sangenanõ.

20Firõ omasiõ lela zatoelõ tõdõ; ba tõdõ zeboea horõ, ba hoelõ zi lõ goena.

21Bewe zatoelõ tõdõ, ba sameʼe gõ ba zato; ba si lõ tõdõ andrõ, ba mate ba waʼambõ tõdõ.

22Ifoʼanaʼa niha howoehowoe chõ Jehowa andrõ; ba maʼifoe lõ inõnõ fangerege dõdõ.(Sin. 127, 2).

23Ba zi lõ tõdõ, ba omasiõ wamazõchi si lõ sõchi; ba ba zaboto ba dõdõ, ba omasiõ waʼatoeatoea.

24Seboea horõ, ba faloecha zataʼoe ia, ba ba zatoelõ tõdõ, ba itõrõ zomasi ira. (F. 1, 17. Sin. 37, 4).

25Na itõrõ angi sabõlõ, ba aetoe zeboea horõ; ba satoelõ tõdõ, ba no si so danedane si lõ mangiwa.

26Si mane niro aisõ (zoeka) ba mboha ba si mane simbo ba hõrõ, si manõ zareoe chõ zamatenge jaʼia.

27Fangataʼoefi Jehowa, ba iʼanaoeʼõ noso; ba nibõda ndrõfi zeboea horõ. (F. 9, 11; 14, 27).

28Fombalombaloi zatoelõ tõdõ, ba tobali faʼomoeso dõdõ: ba fanõtõna zeboea horõ, ba tobali faja. (Sin. 9, 19. Job. 8, 13).

29Famatõrõ Jehowa andrõ, ba no baʼabaʼa ba zatoelõ tõdõ; ba famakiko ia ba zamazõchi si lõ sõchi. (F. 3, 26).

30Satoelõ tõdõ, ba lõ mangiwa, iroegi zi lõ aetoe; ba seboea horõ, ba si lõ nahia ba danõ dania. (Sin. 112, 6. F. 2, 22).

31Loealoea mbawa zatoelõ tõdõ, ba faʼatoeatoea; ba lela si tefoejoe, ba nideha. (A. 11. Sin. 37, 30).

32Bewe zatoelõ tõdõ, ba iʼila hadia zomasi niha bõʼõ; ba bawa zeboea horõ, ba no ha sambalõ faʼatefoejoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index