Search form

SOERA GAMAEDOLA 30

IV.

I. Taroma li Nagoeri. II. Amaedola.

Taroma li Nagoeri ono Jake [daʼe]. Nilaoenia. Imane niha andrõ:

1I. ”No erege dõdõgoe, Lowalangi; no erege dõdõgoe, jaʼoegõ Lowalangi, ariri ndraʼo.

2Noa sa abõlõ owõhõwõhõ ndraʼodo, fa law̃aʼõ, niha ndraʼodo, ba tõdõ niha, ba lõ chõgoe.

3Ba lõ nitõngõnigoe faʼatoeatoea, fa aboto ba dõdõgoe enaʼõ Niʼamoniʼõ andrõ.

4Ha niha zi no mõi mijaw̃a ba zoroego ba sangawoeli mitooe? Ha niha zi gochõi angi? Ha niha zi olõwõsi idanõ andrõ ba lembe? Ha niha zolata balõ danõ fefoe? Ha niha dõinia, ba ha niha dõi nononia? — na no õrongo. (Job. 38).

5Fefoe hoehoeo Lowalangi, ba no nihaogõ; baloese ia ba zangaloei saw̃atõ chõnia. (Sin. 12, 7; 18, 31).

6Bõi nõnõ daroma linia, fa bõi iʼotoeʼõ ndraʼoegõ ba fa bõi tobali solaoe faja ndraʼoegõ. (Moz. V. 4, 2).

7Doea balõ niʼandrõgoe chõoe, bõi zi lõ õʼoʼõ chõgoe ba daʼõ, gasagasa waʼamategoe:

8Fajafaja ba falimosa, ba arõoeʼõ chõgoe. Faʼanoemana ba foʼanaʼa, ba bõi fatõrõ chõgoe, ba tolodo, enaʼõ oesõndra ndroehoendrohoe mbalazogoe. (Tim. I. 6, 6—8. Mat. 6, 11).

9Ma dania oeʼosilõʼõgõ ndraʼoegõ, na no abõlõ aboeso ndraʼodo, ma oemane: Ha niha Jehowa? ba fa bõi managõ ndraʼo, ba waʼanoemana, wangoʼaja tõi Lowalangigoe.

10Bõi fatooe zawoejoe chõ zochõ jaʼia, ba bõi iʼelifi ndraʼoegõ, ba jaʼoegõ zoloeʼi.

11Ono niha sangelifi amara ba si lõ mamahowoeʼõ inara;

12ono niha sangoemaʼõ sohaoehaoe ira, ba lõʼõ sa soemasai zi taʼoenõ; (F. 20, 9).

13ono niha — ha lõ abõlõ wajaw̃asa hõrõra, ha lõ abõlõ lafajaw̃a goeli hõrõ! (F. 21, 4).

14Ono niha soʼifõ fõda, ba soboha siʼõli, ba wemanga seboea famakao, ba wangohori ba goeli danõ, fabaja si noemana ba niha!

15II. Domboea nono lita, ono alawe: Da! Da! Tõloe zi tebai aboeso; õfa zi lõ mangoemaʼõ: Noa!

16Banoea tooe ba naha nono ba daloe, si no tedoehõ (si lõ ono) ba tanõ tooe, si tebai aboeso idanõ, ba alitõ, si lõ mangoemaʼõ: Noa!

17Hõrõ zangoʼaja amania ba si lõ ba dõdõ woloʼõ li ninania, ba gaga ba ndraso zondrooe dania ba ono mojo zi manga. (F. 22, 20).

18Tõloe ngawalõ zi tebai oechamõ, ba õfa zi lõ aboto ba dõdõgoe:

19Lala mojo ba daloe mbanoea ba lala goelõ ba dete gara misa ba lala nowo ba daloe nasi ba lala ndra matoea ba nono alawe. (F. 6, 16).

20Si manõ lala ndra alawe sabao: itema, ba iʼosi mbawania ba imane: Lõ nifazõchigoe horõ.

21Tõloe balõ zi doeroe danõ, ba õfa zi tebai itaha:

22Sawoejoe, na tobali salaw̃a, ba niha si lõ sõchi, na no fahõna mbalazo. (Sangomb. 10, 6).

23Ba si lõ moeʼomasiʼõ, na teʼowaloe, ba sawoejoe ono alawe, na itimba zochõ jaʼia ira alawe.

24Õfa zideʼide ba goeli danõ, ba noa zoei atoeatoea sibai:

25Sichõ andrõ, ba tenga banoea sabõlõ, ba lahõna zoei mbalazo fatoea bawa lõchõ. (F. 6, 6—8; 10, 5).

26Sigõloe, tenga gõi banoea sabõlõ, ba ba dõgi gara labeʼe nahara.

27Larew̃e andrõ, ba lõ salaw̃a, ba mongawawá zoei wofanõ, lõ fakoejoe.

28Kiliw̃i, ba õʼila õraʼoe tangaoe, ba noa zoei ba nomo razo so ia.

29Tõloe zabeʼe fofanõ ba õfa zabõlõ fanõrõ:

30Singo andrõ, fondrege zabõlõ ba zaliw̃aliw̃a ba danõ, si lõ ataʼoe hadia ia;

31ba si so bõbõ taloe andrõ (koedo?), ba nambi si matoea, ba salaw̃a ba hoenõ mbanoeania.

32He no owõhõʼõ, na si fajaw̃a ndraʼoegõ, ba he si so eraʼera — ba baloegõ mbawaoe!

33Na lafera zoesoe zaw̃i, ba tobali matega, ba na teferaʼõ nichoe ba mendró, ba na teferaʼõ (na tesoeko) wõnoe, ba aloea wasosota.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index