Search form

SOERA ZINOENÕ 10

Sinoenõ 10.

I. Fangarõngarõ ba waʼafaito zeboea horõ andrõ. II. Fangandrõ chõ Lowalangi, enaʼõ itolo.

1I. Hana wa ba zarõoe soʼõ, Jehowa, hana wa õbiniʼõ ndraʼoegõ, na baw̃a lõ lala dõdõ? (Sin. 44, 25).

2Ba wajaw̃asa zeboea horõ mogichi zaboe tõdõ andrõ, teʼoeʼoe ira ba nichoi dõdõ daʼõ.

3Isoeno ia seboea horõ ba wangisõ dõdõnia andrõ, ba somasi anaʼa, ba iʼerogõ Jehowa ba iʼoʼaja.

4Imane seboea horõ ba hochania: ”Lõ izofoezofoe (Lowalangi). Lõ Lowalangi.” Awai geraʼerania.

5Mofozoe wolaoelaoenia, lõ mamalõmalõ; arõoe si jaw̃a na hoekoe chõoe, lõ oroma chõnia; ihangõi fefoe zi faʼoedoe chõnia. (Amos. 6, 3).

6Imane dõdõnia: ”Lõ mangiwa ndraʼo, gõtõgõtõ waʼara, ba lõʼõ manõ gõna ndraʼo faʼaboe dõdõ.”

7No fahõna ba mbewenia wangelifi ba faja ba famalangõgõ awõnia, barõ lelania so wamakiko ba famakoejoe.

8Manaronaro ia ba gero mbanoea misa, ba zi tobini, iboenoe zi lõ horõ, idarodarogõ zi tebai, hõrõnia.

9Manaronaro ia ba zi tobini, hoelõ zingo ba zasaiʼõ doeʼoe; idarodarogõ, ba wondraʼoe saboe tõdõ andrõ. Iraʼoe zaboe tõdõ andrõ, ifaʼoeʼoe ba goeʼõnia. (Sin. 17, 12).

10Ikõwõ ia, tooe ba danõ, ba iraʼoe saʼania zi tebai andrõ.

11Imane dõdõnia: ”No olifoe Lowalangi, no ibiniʼõ mbawania; lõʼõ manõ iʼila, sagõtõ faʼara.” (Sin. 94, 7).

12II. Faoso, Jehowa! fazaw̃a dangaoe, Lowalangi! bõi olifoegõʼõ nifakao andrõ.

13Hana wa tola iʼoʼaja Lowalangi seboea horõ andrõ, ba hana wa tola iw̃aʼõ tõdõnia, lõ õzofoezofoe?

14Oʼila; õfaigi sa wamakao ba faʼaboe dõdõ, ba wanoera jaʼia ba laloeʼa dangaoe; chõoe manõtõna zi tebai; õtolo zi lõ ama, si lõ ina. (Sin. 68, 6. Moz. II. 22, 22).

15Tema fatõ mbõlõcha zeboea horõ andrõ, ba ba zi lõ sõchi andrõ, ba laoe mbalõ, enaʼõ taja ia fõnaoe. (Sin. 37, 10. 36).

16Razo Jehowa, gõtõgõtõ waʼara, no taja niha baero andrõ, ba danõ andrõ chõnia. (Sin. 99, 1).

17No õfondrondrongo wehoeloe dõdõ nifakao andrõ, jaʼoegõ Jehowa, õʼabeʼeʼõ dõdõra, õfondrondrongo chõra.

18Ba wangasiwai hoehoeo zi lõ ama, si lõ ina, awõ hoehoeo nifakao andrõ, fa bõi saʼae ifetaʼoe nawõnia niha goeli danõ andrõ.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index