Search form

SOERA ZINOENÕ 102

Sinoenõ 102.

I. Fangarõngarõ niʼotoeʼõ Lowalangi. II. Fangandrõ fangazõchi Siona.

1Fangandrõ zi noemana, na aboe dõdõnia, na ifarongogõ chõ Jehowa wangarõngarõnia.

2I. He Jehowa, fondrondrongo wangandrõgoe, acha iroegi dõgi dalingaoe weʼaogoe andre!

3Bõi biniʼõ chõgoe mbawaoe, na baw̃a waʼataʼoegoe; beʼe mbõrõ dalingaoe chõgoe, na oeʼangarõfi li ndraʼoegõ; taʼitaʼi fondrondrongo chõgoe!

4Tajataja saʼae mbaw̃agoe, hoelõ zimbo, ba timba niʼā galitõ dõlagoe.

5Tõdõgoe bacha, ba no aleoe, no okõli, hoelõ ndroeʼoe ba danõ; olifoedo saʼae wemanga gõgoe.

6Falemba ba nagolegoe dõlagoe, balazi waʼabõlõbõlõ wangarõngarõgoe andrõ. (Job. 19, 20).

7No si fagõlõgõlõ ba doembao ba mbewe nasi ndraʼodo, hoelõ lamoehoe ba gadoedoela mbanoea.

8Lõ salaoe hõrõgoe, hoelõ wofo, si ha samboesamboea ba gero zagõ.

9Maʼõmaʼõchõ latandraw̃aisi ndraʼo si faʼoedee chõgoe, ba sabao tõdõ chõgoe, ba labeʼe hõloe ndraʼodo.

10Oefemanga wache saʼae nawoe, ba oefaroeka ba nibadoegoe daw̃a hõrõ. (Sin. 80, 6).

11Bõrõ wõnoemõ andrõ ba bachoebachoe dõdõoe; noa sa õfazaw̃a ndraʼo, ba no õtiboʼõ tooe ndraʼodo.

12Hoelõ loemõ, si no adõni, mbaw̃agoe andrõ, ba saleoe ndraʼo, hoelõ ndroeʼoe. (Sin. 90. 5. Job. 14, 2).

13II. Ba jaʼoegõ, Jehowa, ba si no doemadao, si lõ mamalõmalõ, ba lõ teboelõ doeriamõ, gõtõgõtõ waʼara.

14Maoso dania ndraʼoegõ ba õhachõsi tõdõ Ziona andrõ; baw̃a saʼae, fa õʼeboeaʼõ dõdõoe chõnia; noa sa iroegi inõtõ. (Sin. 14, 7).

15Omasi sa genonimõ garania andrõ ba ahachõ dõdõra gadoedoelania.

16Ba laʼataʼoefi dõi Jehowa andrõ niha baero; ba dozi salaw̃a ba goeli danõ, ba laʼataʼoefi lachõmioe.

17Me no ifoeli itaroeʼõ Ziona Jehowa, me no iʼoromaʼõ ia ba lachõminia andrõ.

18Me no ifondrondrongo wangandrõ zi noemana ba me lõ niʼositengagõnia fangandrõra andrõ.

19Nitanõ ba zoera daʼõ, nifaʼema ba zi sagõtõ niha dania; ba niha niwõwõi dania, ba lasoeno Jehowa.

20Me no ifaigi moroi ba zalaw̃a jaw̃a andrõ chõnia, niʼamoniʼõ; me no inehegõ goeli danõ Jehowa moroi ba zoroego.

21Ba wamondrondrongo fangarõngarõ nikoeroe andrõ, ba wangefaʼõ si mate menaʼõ. (Sin. 79, 11).

22Enaʼõ ladoenõdoenõ dõi Jehowa ba Ziona ba toeriania ba Jeroezalema.

23Na laʼoroedoegõ ira soi niha fefoe ba õri andrõ, ba wamosoemange Jehowa. (Sin. 87, 4).

24No ihõndrõgõ waʼabõlõgoe, ba lala, no iʼambõsi waʼanaoe nosogoe.

25Ba oemane: ”He Lowalangigoe, bõi etoeʼõ nosogoe, ha taloe niha! Faʼanaoe nosooe andrõ, ba gõtõgõtõ waʼara. (Sin. 55, 24).

26Ba gõtõ fõna saʼae õlata danõ, ba nifazõchi dangaoe mbanoea si jaw̃a. (Heb. 1, 10—12. Sin. 90, 2).

27Jaʼiá andrõ, ba si taja dania, ba jaʼoegõ, ba si lõ teboelõ; atoea dania ia fefoe, hoelõ mbaroe; õfamalalini baroe, ba tobali. (Fet. II. 3, 10).

28Ba jaʼoegõ andrõ, ba jaʼoejaʼoegõ manõ, ba dõfioe andrõ, ba lõ ahori. (A. 13).

29Monahia ndraono genonioe andrõ, ba maʼoewoera, ba si lõ teboelõ fõnaoe.” (Joh. I. 2, 17).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index