Search form

SOERA ZINOENÕ 104

Sinoenõ 104.

I. Fanoeno sombõi ba sondrorogõ fefoe hadia ia. II. Faʼahõlihõli dõdõ ba nifazõchi Lowalangi andrõ.

(Faigi gõi Moz. I. 1.)

1I. Soeno Jehowa, jaʼoegõ tõdõgoe! He Jehowa, Lowalangigoe, salaw̃a seboea ndraʼoegõ; faʼasalaw̃a ba lachõmi noechaoe.

2Si obaroe haga, samologõ banoea si jaw̃a, hoelõ doefo sebolo.

3Sameʼe hare nomonia idanõ, ba sameʼe koeretania lawoeo andrõ, sanõrõ afi nangi.

4Samaliʼõ sinengenia angi ba samaliʼõ enoninia holahola galitõ. (Hebr. 1, 7).

5No ilata danõ dajadajania andrõ, fa bõi mangiwa ia, iroegi zi lõ aetoe.

6No õbaloegõ ia idanõ, hoelõ nifobaroe, no anõnõ hili idanõ andrõ.

7Ba ahele, me õtenaw̃a, ba weʼoegoeʼoegoe limõ andrõ foelõi ia. (Job. 38, 8—11).

8Toemboe saʼae hili ba ahõndrõ ndraso, ba naha nihonogõimõ chõnia.

9No õbeʼe nola chõnia, si tebai isawõ; lõ mangawoeli, ba wamaloegõ tanõ.

10Samangoemboe idanõ, sanaw̃a daso, ba mbawa danõ misa itõrõ.

11Õ zaliw̃aliw̃a ba danõ fefoe ia; ifadõhõ waʼowõchi dõdõnia kalide ndroeʼoe andrõ.

12Monahia ba mbewenia wofo ba daloe mbanoea; lafarongogõ lira moroi ba ndraha geoe andrõ.

13Samoʼidanõ hili, moroi ba nahiania andrõ si jaw̃a; fangaboeso danõ loealoea wolaoemõ andrõ.

14Samatoemboeʼõ doeʼoe, õ goerifõ niha ba sinanõ, sogoena ba niha, wamaloea balazo moroi ba danõ. (Sin. 147, 8).

15Ba agoe, faʼomoeso dõdõ niha, ba enaʼõ takile mbawa ba wanicha, ba enaʼõ mõi fangabeʼe dõdõ niha roti. (Sangoehoek. 9, 13. Sangomb. 10, 19).

16Fahõna nidanõ ba dõla geoe andrõ, chõ Jehowa, ba dõla geresi andrõ, nitanõnia.

17Ba zangazoeni fofo; toembao andrõ, sonahia ba hogoe naroeʼoe.

18Hili salaw̃a andrõ, ba no saw̃atõ nago, ba arõ gara, ba saw̃atõ laosi.

19Baw̃a no ifazõchi, ba wamaigi inõtõ; loeo andrõ, ba iʼila waʼaechoenia. (Sin. 19, 7; 74, 16).

20Na õlaoe waʼogõmigõmi, ba bongi; ba ba zi bongi andrõ, ba maliw̃aliw̃a fefoe goetoe ndroeʼoe andrõ.

21Ono zingo andrõ si ndrõndrõndrõndrõ, wangaloei ahoeloea, sangandrõ gõra chõ Lowalangi.

22Ba toemboe loeo, ba mangawoeli ira foeri ba mõrõ ba nahiara.

23Ba mõi tooe niha ba halõw̃õnia, mangai nihalõnia, irege bongi.

24II. Ha lõ oja ngawalõ halõhalõw̃õoe, jaʼoegõ Jehowa; faʼatoeatoeamõ wamaloea jaʼia fefoe, no anõnõ danõ niwõwõimõ andrõ!

25Hiza nasi andrõ, no eboea ba no ebolo misa, ba saliw̃aliw̃a bacha, lõ moetaha moeʼerai, sideʼide ba seboea.

26Lala nowo ia: ba daʼõ so giʼa seboea andrõ, nifazõchioe, enaʼõ famaimai ba daʼõ.

27Ba oi dozi manõtõna chõoe, enaʼõ õbeʼe gõra, na inõtõ.(Sin. 145, 15. 16).

28Ba õbeʼe chõra, ba latoetoejoe; õbokai dangaoe, ba aboeso ira si sõchi.

29Ba õbiniʼõ mbawaoe, ba tokea ira; õbõda nosora, ba aetoe, tobali gawoegawoe ira mangawoeli. (Moz. I. 3, 19).

30Õfaloea Gehehamõ, ba tewõwõi ira, ba õbohooeni goeli danõ.

31Lachõmi Jehowa andrõ, ba si lõ aetoe; omoeso dõdõ Jehowa nifazõchinia andrõ;

32Na inehegõ danõ, ba hoemisi; na itoefa tangania hili, ba manimbo. (Sin. 144, 5).

33Damanoenõ ndraʼo chõ Jehowa, gõtõ waʼanaoe nosogoe; oesoeno Lowalangigoe, gõtõ waʼara ndraʼodo.

34Enaʼõ na omasi ia nifachai dõdõgoe; jaʼodo, ba no somoeso tõdõ chõ Jehowa!

35Enaʼõ taja ba goeli danõ zamazõchi horõ, enaʼõ lõʼõ saʼae seboea horõ. Soeno Jehowa, jaʼoegõ tõdõgoe! Haleloeja!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index