Search form

SOERA ZINOENÕ 105

Sinoenõ 105.

Famatõrõ Lowalangi Iraono Gizeraëli andrõ: I. Ba gõtõ ndra toea; II. ba gõtõ Moze.

(Faigi gõi Ngaʼõt. I. 16, 8. 22. Sin. 48, 1—15.)

1I. Misoeno Jehowa, miʼangarõfi li dõinia andrõ! Midoenõdoenõ ba niha baero wolaoenia andrõ. (Jes. 12, 14).

2Miʼanoenõ chõnia! Misoeno ia! Enaʼõ itõrõ limi zahõlihõli dõdõda andrõ chõnia, fefoe.

3Misoeno ami ba dõinia andrõ niʼamoniʼõ! Ja omoeso dõdõ zangaloei Jehowa!

4Mizofoezofoe Jehowa, awõ waʼabõlõnia andrõ! Bõi mifamalõmalõ wangaloei bawania!

5Mitõrõtõrõ tõdõmi zahõlihõli dõdõda andrõ chõnia, nilaoenia, tandra andrõ chõnia ba fangoehoekoenia, taroma linia!

6Jaʼami, maʼoewoe genoninia Aberahamo, jaʼami maʼoewoe Jakobo andrõ, nitoetoejoenia.

7Jaʼia, Jehowa, ba no Lowalangida; itõrõi goeli danõ fangoehoekoenia andrõ.

8Lõ olifoe ia gamaboeʼoela linia andrõ, iroegi zi lõ aetoe, taroma li andrõ, nihonogõinia, ba ngahõnõ ngaʼõtõ.

9Fawoeʼoesa li andrõ, me fawoeʼoe li ia chõ Gaberahamo, ba fahõloesania andrõ chõ Gizaʼaki.

10Ba no ibeʼe amachoita chõ Jakobo, amaboeʼoela li si lõ teboelõ chõ Gizeraëli andrõ,

11wangoemaʼõ: ”Chõoe oebeʼe danõ Ganaʼana andrõ, tána chõmi, ondrõita.” (Moz. I. 12, 7).

12Me lõ ato ira na, me ha fasamõsa na, ba me si fatewoe ira ba danõ.

13Ba latõrõi soi niha andrõ; ba nõri si samboea so ira maʼõchṍ, ba mahemoloe, ba ba niha hõʼõ.

14Lõ ibeʼe nifakao niha bõʼõ ira, ba iʼotoeʼõ razo, bõrõ ira. (Moz. I. 12, 17; 20, 3. 7).

15”Bõi mibabaja nibajoinigoe andrõ ba bõi mifakao zameʼeleʼõ andrõ chõgoe.”

16Ba ikaoni ba danõ lofo mbanoea, ifatõ dendrotendro gõ fefoe. (Moz. I. 41, 54).

17Ifowaõwaõ chõra zamõsa; teʼamawa sawoejoe Josefo andrõ. (Moz. I. 37, 28).

18Lalazi gahenia ba galõ, tefaʼoeʼoe siʼõli nosonia.

19Irege itõrõ niw̃aʼõnia andrõ; taroma li Jehowa wamadoehoeʼõ jaʼia.

20Ba ifatenge razo, idoedoe ia; salaw̃a soi niha andrõ, iʼefaʼõ ia. (Moz. I. 41, 14).

21Ibaliʼõ satoea baomo chõnia; ifataro samatõrõ si so chõnia fefoe.

22Ba wamõbõ salaw̃a andrõ chõnia, na omasi ia, ba ba wangatoeatoeaʼõ satoea andrõ chõra.

23Ba isaw̃a danõ Miseraji Izeraëli, iʼiagõ danõ maʼoewoe Chamo Jakobo, si fatewoe. (Moz. I. 46, 1).

24Ba iʼojaʼõ ndraono ba mbanoeania andrõ, ato ira, moroi ba zamakao jaʼira, ibeʼe. (Moz. II. 1, 7. 12).

25Ibaliʼõ dõdõ daʼõ, enaʼõ fatioe ba mbanoeania andrõ, enaʼõ lalaoe zi lõ atoelõ ba genoninia.

26II. Ifatenge genoninia Moze ba Aʼaroni andrõ, nitoejoenia.

27Lafazõchi dandra andrõ chõnia, ba chõra ba sahõlihõli dõdõ ba danõ maʼoewoe Chamo. (Moz. II. 3—12).

28Ifatõrõ waʼogõmigõmi, ogõmi danõ ibeʼe, ba lõ aetoe lafadaõ linia.

29Ibaliʼõ do nidanõ chõra, mate giʼa chõra ibeʼe.

30Molihaliha ba danõra dalaho, irege ba mbateʼe razora.

31Moehede ia, ba tesao ndri manoe, ba di mbõhõ, ba danõra, maʼasagõrõ.

32Ifatõrõ chõra deoe kara, salahi deoe bõʼõ, alitõ siholahola ifatõrõ ba danõra.

33Ibõzi w̃ew̃e nagoe chõra, awõ mboea ara, ifatõ ndraha geoe ba danõra.

34Moehede ia, ba tesao damo ba lamanoea, tebai teʼerai.

35Ahori laʼā ndroeʼoe ba danõra, ba õra gõi mboea danõ chõra.

36Ba ibõzi tooe fefoe nono si aʼa, ba danõra, si aʼa zabõlõ andrõ chõra fefoe.

37Ba aheta ira ibeʼe, fao wirõ ba fao ganaʼa; ba lõ salaoe ba madora andrõ. (Moz. II. 12, 35).

38Omoeso dõdõ Ndrawa Miseraji, me aheta ira; noa sa ihawoei ira faʼataʼoe, ba chõrā andrõ.

39Ibologõ lawoeo, baloebaloe, ba alitõ, ba wohagaini si bongi. (Moz. II. 13, 21).

40Mangandrõ ira, ba ifatõrõ ziate ba iʼaboesoiʼõ ira koee moroi ba mbanoea si jaw̃a. (Moz. II. 16, 13—15. Joh. 6, 31).

41Itõlaʼõ gara, ba mangele nidanõ, moʼoengo misa ba danõ si mate, timba nidanõ seboea. (Moz. II. 17, 6).

42Itõrõ sa tõdõnia daroma linia andrõ, niʼamoniʼõ, ba enoninia Aberahamo andrõ.

43Ba ifawoeʼa mbanoeania andrõ, omoeso dõdõ; owoeawoea dõdõ nitoetoejoenia andrõ.

44Ba ibeʼe chõra danõ niha baero andrõ; mõi tána chõra gõdo soi andrõ.

45Enaʼõ laʼoʼõ gamachoitania andrõ, ba enaʼõ lõ lasawõ goroisania. Haleloeja!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index