Search form

SOERA ZINOENÕ 106

Sinoenõ 106.

I. Fanoeno faʼasõchi dõdõ Lowalangi. II. Famasoegi ba dõdõ horõ Ndraono Gizeraëli ba danõ Miseraji, ba III. ba danõ si mate andrõ, ba IV. ba danõ Ganaʼana. V. Fangandrõ faʼahachõ dõdõ.

(A. 1. 47. 48: Ngaʼõt. I. 16, 34—36.)

1I. Haleloeja! Miʼandrõ saoha gõlõ chõ Jehowa! Me no si sõchi tõdõ ia, me si lõ aetoe waʼeboea dõdõnia andrõ.(Sin. 107, 1; 118, 1; 136, 1).

2Ha niha zangila manoetoenõ nilaoe Jehowa andrõ, faʼabõlõnia, ba ha niha zangila mamarongogõ fanoeno jaʼia andrõ, fefoe?

3Ja ahowoe zoloʼõ hoekoe andrõ, ba si lõ mamamalõmalõ folaoe satoelõ!

4Tõrõ tõdõoe ndraʼodo, jaʼoegõ Jehowa, dali waʼomasioe mbanoeaoe andrõ; fatõrõ chõgoe wangorifi andrõ chõoe.

5Enaʼõ anehe ndraʼo waʼohahaoe dõdõ nitoetoejoemõ andrõ; enaʼõ omoeso dõdõgoe gõi ba waʼomoeso dõdõ mbanoeaoe, ba enaʼõ oesoeno ndraʼo, awõ dána chõoe andrõ.

6II. No mafazõchi horõ, si mane toeama andrõ; no moʼolalõw̃a ndraʼaga, no malaoe zi lõ sõchi. (Dan. 9, 5).

7Lõ saboto ba dõdõ doeama ba danõ Miseraji zahõlihõli dõdõ andrõ chõoe; lõ itõrõ tõdõra waʼafahõna waʼeboea dõdõoe andrõ, ba molaw̃a ba mbewe nasi andrõ, ba nasi zoechoe. (Moz. II. 14, 11. 12).

8Ba itolo ira, bõrõ dõinia andrõ, ba wamaʼeleʼõ faʼabõlõnia.

9Ba ihedehedeʼõ nasi zoechoe andrõ, ba otoefo, ifatõrõ ira ba daloe hooe andrõ, nifamatõrõ ba danõ si mate.

10Ba iʼefaʼõ ira ba danga zi fatioe tõdõ chõra, ba danga zi faʼoedoe iʼefaʼõ ira.

11Ba tebaloegõ asi zi faʼoedoe chõra andrõ; samõsa lõʼõ si tosai.

12Awena mamati ira ba daroma linia ba lasoeno ia. (Moz. II. 15).

13III. Ba lõ ara, ba olifoe ira nilaoenia andrõ, ba lõ latõngõni dõdõnia andrõ.

14Ba tesao wangisõ, ba danõ si mate andrõ, ba latandraigõ Lowalangi ba danõ si lõ nihaniha. (Moz. IV. 11, 4—6).

15Ba ibeʼe chõra zomasi ira, ba ifatõrõ chõra wõchõ baosi.

16Ba afõchõ dõdõra chõ Mose ba golombasew̃a ba chõ Gaʼaroni, niʼamoniʼõ Jehowa andrõ. (Moz. IV. 16).

17Ba asila danõ, itõlõ Datano andrõ, ibaloegõ zi fao chõ Gabiramo andrõ.

18Teʼeboeaʼõ galitõ ba zangoroedoe jaʼira andrõ, iʼā alitõ zanao horõ andrõ.

19Lafazõchi nono zaw̃i ba gahe hili Horebi, mangaloeloe ira ba wamaedo andrõ, nifahele. (Moz. II. 32).

20Lafalalini lachõmira, lahalõ wamaedo zaw̃i si matoea, si manga ndroeʼoe. (Rom. 1, 23).

21Olifoe ira Lowalangi, sangorifi jaʼira, si no molaoe seboea andrõ ba danõ Miseraji. (Moz. V. 32, 18).

22Sahõlihõli dõdõ ba danõ maʼoewoe Chamo andrõ, ba sataʼoe niha ba nasi zoechoe andrõ.

23Ba iw̃aʼõ tõdõnia, itakiko ira, na lõ ibelegõ ia menaʼõ fõnara Moze andrõ, nitoejoenia, ba wangalõsi fõnoenia, enaʼõ lõ ifakiko ira. (Hez. 13, 5).

24Ba lõ ba dõdõra danõ si sõchi andrõ, ba lõ lafati linia. (Moz. IV. 14, 2—4).

25Ba moekõkõkõkõ ira, baose andrõ chõra, ba lõ lafondrondrongo li Jehowa.

26Ba fahõloe ia chõra, ibõzi tooe ira ba danõ si mate andrõ,

27ba ifazawili maʼoewoera ba niha baero, ba danõ niha bõʼõ ifazaewe, iw̃aʼõ.

28Ba laʼolembai Mbaʼali-Weoro andrõ, laʼā zoemange zi lõ noso [soemange nadoe]. (Moz. IV. 25, 3).

29Ba laʼandrõ wõnoenia folaoera andrõ, ba itõrõ ira famakao.

30Ba maoso Wineha andrõ, ba wangatoelõ, ba dõhõ wamakao andrõ.

31Ba tebeʼe faʼatoelõ dõdõnia daʼõ, gõtõgõtõ waʼara, iroegi zi lõ aetoe. (Moz. I. 15, 6. Moz. IV. 25, 12).

32Ba labaosi dõdõ Lowalangi, ba nidanõ wasosota andrõ, ba itõrõ Mose si lõ sõchi, bõrõ ira. (Moz. IV. 20, 2—13).

33Lafadaõ saʼae dõdõnia, ba iw̃aʼõ bewenia zi lõ moetoelo tõdõ.

34IV. Lõ lahori soi niha andrõ, niw̃aʼõ Jehowa chõra, nihori. (Moz. V. 7, 1. 2; 12, 2. 3. Sangoehoek. 1, 28).

35Lafaroeka ira ba niha baero andrõ ba latõngõni wolaoera.

36Lafosoemange nadoera, ba tobali tandraw̃a chõra daʼõ.

37Labeʼe soemange mbechoe nonora matoea, awõ nonora alawe. (Moz. III. 18, 21).

38Adoewa ndro zi lõ horõ labeʼe, do nonora matoea ba do nonora alawe, nibeʼera soemange nadoe Ndrawa Ganaʼana; tobali tetaʼoenõi danõ do.

39Togoele chõra zi lõ sõchi ba wolaoera andrõ; sohorõ ira folaoera andrõ.

40Ba tesao wõnoe Jehowa ba mbanoeania andrõ, ba iʼogorofi dána chõnia.

41Ibeʼe ira ba danga niha baero andrõ; ba samatõrõ jaʼira zi fatioe tõdõ chõra. (Sangoehoek. 2, 14).

42Lafakao ira si faʼoedoe chõra, tehõndrõgõ ira barõ mbawara.

43Lõ aetoe iʼorifi ira, ba no sabeʼe tandro ira, ba nifachai dõdõra andrõ, ba ahõndrõ ira ba lalõra andrõ.

44V. Ba inehegõ wamakaora andrõ, me irongo wangarõngarõra.

45Ba itõrõ tõdõnia chõra wawoeʼoesa li andrõ chõnia ba arõoerõoe ba dõdõnia, balazi waʼeboea dõdõnia andrõ.

46Ibeʼe faloecha ira waʼahachõ dõdõ zanaha jaʼira, fefoe.

47Orifi ndraʼaga, jaʼoegõ Jehowa, Lowalangima, foeli ozaragõ ndraʼaga ba mbanoea niha baero andrõ, enaʼõ maʼandrõ saoha gõlõ, ba dõimõ andrõ niʼamoniʼõ, enaʼõ masoeno ndraʼaga ba wanoeno jaʼoegõ andrõ! (Moz. V. 30, 3).

48Nisoeno Jehowa, Lowalangi Ndraono Gizeraëli andrõ, gõtõgõtõ waʼara, ba ja lamane niha fefoe: Ja doehoe! Haleloeja! (Sin. 41, 14).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index