Search form

SOERA ZINOENÕ 107

IV.

Sinoenõ 107.

Mangandrõ saoha gõlõ zi no moeʼefaʼõ. I. Ba danõ si mate andrõ, ba II. ba niʼoloiʼõ jaʼira, ba III. ba wamakao seboea, ba IV. ba zataʼoe ira ba nasi. V. Laʼandrõ saoha gõlõ waʼeboea dõdõ Lowalangi andrõ ba mbanoeania.

1I. ”Miʼandrõ saoha gõlõ chõ Jehowa, me no si sõchi tõdõ ia ba me si lõ aetoe waʼeboea dõdõnia andrõ!” (Sin. 106, 1).

2Ja lamanõ niʼorifi Jehowa andrõ, niʼefaʼõnia ba danga zamakao jaʼira.

3Niʼozaragõnia ba danõ zotanõ misa, moroi ba gatoemboecha ba moroi ba gaechoela, moroi jõoe ba moroi ba mbewe nasi.

4No eloengoeloengoe ira ba danõ si mate, ba danõ si lõ nihaniha, ba zi lõ lala; banoea sahono ira menaʼõ, ba lõ lasõndra.

5Solofo ira ba sowõchi tõdõ ba sataʼoe bacha dõdõra.

6Ba laʼangarõfi li Jehowa, ba waʼaboe dõdõra andrõ, ba iʼefaʼõ ira ba waʼatosarara andrõ.(A. 13. 19. 28).

7Iʼohe ira ba zadõlõ lala, ba wogamõ banoea, sonahia jaʼira.

8Ndramoeʼandrõ saoha gõlõ chõ Jehowa waʼasõchi dõdõnia andrõ ba sahõlihõli dõdõ andrõ, nilaoenia ba nono niha!(A. 15. 21. 31).

9Me no iʼokafoei dõdõ zowõchi tõdõ ba me no ihõna zi sõchi ba zolofo andrõ. (Loek. 1, 53).

10II. Sidadao ba zõgõmigõmi ba ba loemõ waʼamate, nikalo famakao ba siʼõli.

11Me no lafadaõ niw̃aʼõ Lowalangi, me no lõ ba dõdõra dõdõ Wondrege zalaw̃a andrõ.

12Ba ihõndrõgõ dõdõra famakao andrõ, tegaõlõ tooe ira ba lõ sangorifi.

13Ba laʼangarõfi li Jehowa, ba waʼaboe dõdõra andrõ, ba iʼefaʼõ ira ba waʼatosasara andrõ.(A. 6).

14Ba iheta ira ba zogõmigõmi andrõ ba ba loemõ waʼamate no mege, iʼetoeʼõ mbõbõ andrõ chõra.

15Ndramoeʼandrõ saoha gõlõ chõ Jehowa waʼasõchi dõdõnia andrõ ba sahõlihõli dõdõ andrõ, nilaoenia ba nono niha!(A. 8).

16Me no iboto lagõ mbawandroehõ tõla andrõ, ba me no iʼew̃a lazi siʼõli.

17III. Gõna famakao zambõ tõdõ, ba lalõra andrõ ba ba zi lõ atoelõ andrõ chõra.

18Ogoro dõdõra fefoe ngawalõ gõ, ba laroegi mbawa gõli ba waʼamate.

19Ba laʼangarõfi li Jehowa, ba waʼaboe dõdõra andrõ, ba iʼefaʼõ ira ba waʼatosasara andrõ.(A. 6).

20Ifaʼoheʼõ linia, ifadõhõ wõchõra; iʼefaʼõ ira ba gohokoho andrõ chõra.

21Ndramoeʼandrõ saoha gõlõ chõ Jehowa waʼasõchi dõdõnia andrõ ba sahõlihõli dõdõ andrõ, nilaoenia ba nono niha!(A. 8).

22Ndramoebeʼe zoemange fangandrõ saoha gõlõ, ndramoedoenõdoenõ wolaoenia, ja fao waʼowoeawoea dõdõ.

23IV. Solojo andrõ ba nasi, si mõi ba nasi seboea maniaga,

24ba laʼila nilaoe Jehowa andrõ ba sahõlihõli dõdõ, ba namõ.

25Moehede ia, tesao nangi sabeʼe ibeʼe, famaoso ndroeloe, seboea sibai.

26Lasaw̃a mijaw̃a mbanoea ba noemalõ mitooe ba gohokoho, ariri dõdõra waʼafõchõ andrõ.

27Manawoejoe ira ba hoemeoe, hoelõ zi maboe, ba tobali faja waʼonechera fefoe.

28Ba laʼangarõfi li Jehowa, ba waʼaboe dõdõra andrõ, ba iʼefaʼõ ira ba waʼatosasara andrõ.(A. 6).

29Ibaliʼõ oho mbade andrõ, ba tebato ndroeloe.

30Ba omoeso dõdõra, me ahono; ba iʼohe ira ba laboea, somasi ira.

31Ndramoeʼandrõ saoha gõlõchõ Jehowa waʼasõchi dõdõnia andrõ ba sahõlihõli dõdõ andrõ, nilaoenia ba nono niha!(A. 8).

32Ndramoedooeʼõ doeriania, ba zowoelo zato, ba ndramoesoeno ia ba waloechata zatoea.

33V. Ibaliʼõ tanõ si mate noengo nidanõ ba ibaliʼõ tanõ sokõlikõli goemboe.

34Tanõ satabõ sinanõ ibaliʼõ decha moʼasio, bõrõ walõsõchi zowanoea ba daʼõ.

35Ba ibaliʼõ baw̃a nidanõ danõ si mate; ba tanõ si no okõlikõli, ba ibaliʼõ oemboe nidanõ.

36Ifataro ba daʼõ zolofo, ba lataroeʼõ mbanoea, nahiara.

37Mangahalõ ira ba lafazõchi kaboe nagoe, ba ero rõfi mowoea.

38Ba ifahowoeʼõ ira, tobali ato sibai ira ba ibeʼe chõra goerifõ, tenga ha maʼifoe.

39Ba tobali alõ waʼatora, ahõndrõ ira, ilangõ ira fangaboe dõdõ ba faʼalangoe dõdõ.

40”Ihawoei fa lõ ba dõdõ zalaw̃a, ba eloengoeloengoe ira ba danõ si lõ nihaniha ba si lõ lala, ibeʼe.”

41Iheta ba wamakao zi noemana, mongawawá ngaʼõtõnia ibeʼe.

42Anehe zadõlõ tõdõ, ba omoeso dõdõra, ba lõʼõ saʼae hedehede zi lõ atoelõ.” (Job. 22, 19. 20).

43Ha niha zatoeatoea, ba jamoetõngõni zi manõ; ba ndramoebeʼe ba dõdõ waʼeboea dõdõ Jehowa andrõ.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index