Search form

SOERA ZINOENÕ 118

Sinoenõ 118.

I. Fangandrõ saoha gõlõ fangorifi Jehowa niha baero andrõ. II. Fanoenõ mbanoea Lowalangi andrõ, bõrõ me no ifaʼeleʼõ waʼabõlõnia, awõ lachõminia ba chõ Mesia andrõ.

(Faigi gõi Geser. 2, 10 b. t.)

1I. Miʼandrõ saoha gõlõ chõ Jehowa, me no si sõchi tõdõ ia, me si lõ aetoe waʼeboea dõdõnia andrõ. (Sin. 107, 1).

2Ba ndramoew̃aʼõ Iraono Gizeraëli: ”Si lõ aetoe waʼeboea dõdõnia andrõ!” (Sin. 115, 9—13).

3Ndramoew̃aʼõ maʼoewoe Gaʼaroni andrõ: ”Si lõ aetoe waʼeboea dõdõnia!”

4Ba ndramoewaʼõ sangataʼoefi Jehowa andrõ: ”Si lõ aetoe waʼeboea dõdõnia!”

5Ba waʼatosasa oeʼangarõfi li Jehowa, ba no ifondrondrongo ligoe Jehowa ba no iʼohedo ba zebolo tanõ.

6Awõgoe Jehowa, ba lõ ataʼoe ndraʼo. Hadia nilaoe niha chõgoe enaʼõ? (Sin. 56, 5. Heb. 13, 6).

7Awõgoe Jehowa, awõ zanolo jaʼodo andrõ, waʼomasigoe dania wamaigi si fatioe tõdõ chõgoe. (Sin. 54, 9).

8Sõchi na tasaw̃a Jehowa, moroi na tadõnadõna ba niha.

9Sõchi na tasaw̃a Jehowa, moroi na tadõnadõna ba zalaw̃a. (Sin. 146, 3).

10Lafasoei ndraʼo dozi niha baero, ba ba dõi Jehowa andrõ, ba lõ zi lõ oeʼõʼõtõ ira.

11Lafasoei ndraʼo, lafaʼoeʼoe ndraʼo, ba ba dõi Jehowa andrõ, ba lõ zi lõ oeʼõʼõtõ ira.

12No lafasoei ndraʼo, hoelõ w̃ani, ba mate faʼamate galitõ ba ngafōē zaʼasaʼa mao; ba dõi Jehowa andrõ, ba lõ zi lõ oeʼõʼõtõ ira. (Jes. 33, 12).

13No õʼabõlõgõ õtoeliʼõ ndraʼodo, enaʼõ alaoedo; ba no itolodo Jehowa.

14II. Faʼabõlõgoe Jehowa ba fanoenõgoe, ba no tobali fangorifigoe ia. (Moz. II. 15, 2).

15Terongo waʼomoeso dõdõ ba fangorifi baose ba zatoelõ tõdõ: Sabõlõ gambõlõ Jehowa andrõ!

16Si no alaw̃a gambõlõ Jehowa andrõ, sabõlõ gambõlõ Jehowa.

17Tenga si mate ndraʼodo, saoeri ndraʼo ba sangombacha nilaoe Jehowa andrõ.

18No iʼabõlõgõ iʼotoeʼõ ndraʼo Jehowa, ba lõ niloeloenia jaʼodo ba waʼamate. (Kor. II. 6, 9).

19Mibokai chõgoe mbawa gõli andrõ ba waʼatoelõ, enaʼõ oetõrõ, ba wanoeno Jehowa!

20Daʼe mbawa gõli andrõ chõ Jehowa; latõrõ satoelõ tõdõ andrõ. (Sin. 119, 71).

21Oeʼandrõ saoha gõlõ chõoe, wa no õfondrondrongo ligoe, wa no tobali fangorifigoe ndraʼoegõ.

22Gowe andrõ, nitiboʼõ zotomo andrõ, ba no tobali tojo ba watalinga. (Jes. 28, 16. Mat. 21, 42).

23Moroi chõ Jehowa, wa si manõ ba sahõlihõli dõdõda wamaigi.

24Daʼe mbaw̃a andrõ, niʼasogõ Jehowa. Ba dataʼowoeawoeaʼõ dõdõda, hana na somoeso tõdõ ita chõnia.

25He Jehowa, tolo! He Jehowa, enaʼõ na si sõchi loealoea õbeʼe!

26Ja ahowoe zi so andrõ ba dõi Jehowa! Mafahowoeʼõ ami, moroi ba nomo Jehowa. (Mat. 21, 9; 23, 39).

27Lowalangi Jehowa, ba no ifohaga ita. Mibõbõ zoemange andrõ, iroegi dandroe andrõ ba naha wameʼe soemange.

28Lowalangigoe ndraʼoegõ, ba mangandrõ saoha gõlõ ndraʼodo chõoe. He Lowalangigoe, daʼoeʼeboeaʼõ doeriamõ andrõ!

29Miʼandrõ saoha gõlõ chõ Jehowa, me no si sõchi tõdõ ia ba me si lõ aetoe waʼeboea dõdõnia andrõ!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index