Search form

SOERA ZINOENÕ 119

Sinoenõ 119.

A—Z. Famahaõ, fanoeno oroisa Lowalangi andrõ, fanoeno faʼabõlõnia, awõ howoehowoe andrõ loealoeania.

A.

1Ja ahowoe zi lõ sinegoe ba nitõrõra andrõ, sanõrõ lala goroisa Jehowa. (Sin. 1, 1. 2; 112, 1).

2Ja ahowoe zoloʼõ famadoehoeʼõ andrõ chõnia, sangaloei jaʼia, soroi siʼaikõ ba dõdõ.

3Si lõ molaoe si lõ atoelõ, sanõrõ lala andrõ chõnia.

4Amachoitamõ andrõ, ba no õw̃aʼõ, ba wanõrõ jaʼia, soroi ba dõdõ.

5Enaʼõ na ba daʼõ itõrõ lalagoe, ba woloʼõ amachoitamõ andrõ!

6Ba lõ faloechado waʼaila, na oetõngõni goroisamõ andrõ.

7Moroi ba dõdõgoe oesoenõ ndraʼoegõ, na oetanõ ba dõdõgoe gamachoitamõ andrõ, satoelõ.

8Lõ oebõhõli niʼoroiʼõmõ andrõ; bõi faloea wamõhõli jaʼodo!

B.

9He iwisa ono matoea, fa bõi fabaja hadia ia, ba dõrõw̃ania andrõ? Na ibeʼe dali daroma limõ andrõ.

10Moroi siʼaikõ ba dõdõgoe oeʼaloei ndraʼoegõ; bõi beʼe eloengoe ndraʼo, wamõhõi oroisamõ andrõ.

11No oeʼirõʼõ ba dõdõgoe bacha niw̃aʼõmõ andrõ, fa bõi molalõ ndraʼo chõoe.

12Nisoeno ndraʼoegõ Jehowa; fahaõ ndraʼo ba gamachõitamõ andrõ. (A. 26, 64. 68).

13Oedoenõdoenõ bewegoe goroisa mbawaoe andrõ, fefoe.

14Faʼomoeso dõdõgoe lala wamadoehoeʼõmõ andrõ, timba waʼomoeso dõdõ ba ganaʼa.

15Oefatooetooe tõdõgoe goroisamõ andrõ, ba oetõngõni lala andrõ chõoe.

16Ba gamachoitamõ oeʼomoesoiʼõ dõdõgoe, lõ olifoedo daroma limõ. (A. 24. Rom. 7, 22. A. 61).

D.

17Eboeaʼõ dõdõoe chõ genonioe andre, enaʼõ aoerido, ba oefondrondrongo daroma limõ andrõ.

18Bokai hõrõgoe, enaʼõ oeʼila zahõlihõli dõdõgoe ba goroisamõ andrõ.

19Tome ndraʼodo ba goeli danõ andre: Bõi biniʼõ chõgoe goroisamõ andrõ. (Sin. 39, 13).

20No arasa dõdõgoe ba wehoeloe andrõ ba zatoelõ andrõ chõoe, lõ mamalõmalõ.

21No õtenaw̃a zeboea hocha andrõ; niʼelifi zeloengoe andrõ, samõhõi oroisamõ. (Moz. V. 27, 26).

22Heta chõgoe wangoʼaja andrõ, awõ waʼaila andrõ; oetõngõni sa wamadoehoeʼõmõ andrõ.

23He w̃aʼae no doemadao zalaw̃a, mamagõlõ, ba chõgoe, andre: ba ifatooetooe sa atṍ tõdõnia enonioe gamachoitamõ andrõ.

24Waʼomasigoe saʼae wamadoehoeʼõmõ andrõ, anofoelagoe. (A. 35).

E.

25Si no falemba ba danõ nosogoe; orifi ndraʼodo fatõrõ niw̃aʼõoe andrõ!

26No oetoenõ lalagoe andrõ, ba õfondrondrongo ligoe; fahaõ ndraʼo ba gamachoitamõ andrõ.

27Beʼe aboto ba dõdõgoe lala nifachoimõ andrõ, ba oefatooetooe tõdõgoe zahõlihõli dõdõ andrõ chõoe.

28Mangoeloe dõdõgoe, ba waʼaboe dõdõ andrõ; abeʼeʼõ ndraʼo, dali limõ andrõ.

29Arõoeʼõ chõgoe lala waja andrõ, ba eboeaʼõ dõdõoe chõgoe, wamahaõ jaʼodo.

30No oetoejoe lala zi doehoe andrõ. No oebeʼe ba doedoema hõrõgoe zatoelõ andrõ chõoe.

31Tebai aefa ndraʼodo ba wamadoehoeʼõmõ andrõ, jaʼoegõ Jehowa; bõi beʼe aila ndraʼo.

32Oetõrõ lala goroisamõ andrõ; ba õbologõ dõdõgoe.

F.

33Fahaõ ndraʼodo, Jehowa, ba lala gamachoitamõ andrõ, enaʼõ oetõrõ, iroegi gamozoea.

34Faʼaboto ba dõdõ beʼe chõgoe, enaʼõ oetõngõni goroisamõ andrõ, ba enaʼõ moroi ba dõdõgoe oeʼoʼõ.

35Fatõrõdo ba lala goroisamõ andrõ; omasido sa ia. (A. 47).

36Omboejoeʼõ dõdõgoe ba wamadoehoeʼõmõ andrõ, ba bõi ba wangaloei anaʼa.

37Holeʼõ hõrõgoe, fa bõi ifaigi wajafaja; orifido ba lala andrõ chõoe!

38Fatõrõ chõ genonioe andre gamaboeʼoela limõ andrõ, nibeʼe famasoegi wangataʼoefi jaʼoegõ.

39Heta waʼailagoe andrõ, sataʼoe ndraʼodo; si sõchi sa nifachoimõ andrõ.

40Hiza, hoemoeloe dõdõgoe ba goroisamõ andrõ; orifido faʼatoelõ andrõ chõoe.

G.

41Enaʼõ na faloechado waʼeboea dõdõ andrõ chõoe, jaʼoegõ Jehowa, fangorifi andrõ chõoe, dali daroma limõ!

42Enaʼõ oeʼila oetema li zangoʼaja jaʼo; oedõnadõna saʼae ba limõ andrõ.

43Ba bõi hori ba mbewegoe daroma li si doehoe andrõ; ba zatoelõ andrõ chõoe saʼae manõtõna ndraʼodo.

44Ba lõ oeboelõʼõ woloʼõ oroisamõ andrõ, lõ oefamalõmalõ, iroegi zi lõ aetoe.

45Enaʼõ oetõrõ zebolo tanõ; oeʼaloealoei sa tõdõgoe nifachoimõ andrõ.

46Ba oefatoenõ wamadoehoeʼõmõ andrõ ba zalaw̃a; lõ ailado. (Mat. 10, 18. Rom. 1, 16).

47Oebeʼe faʼomoeso dõdõgoe goroisamõ andrõ, somasi ndraʼo saʼae. (A. 70).

48Ba oefazaw̃a dangagoe ba goroisamõ andrõ, somasi ndraʼo saʼae, ba oeʼaloealoei tõdõgoe nifachoimõ andrõ.

H.

49Tõrõ tõdõoe limõ andrõ chõ genonioe andre, nibeʼeoe tõtõnafõgoe.

50Daʼõ wondrara dõdõgoe ba waʼanoemanagoe andre, wa iʼorifido taroma limõ andrõ. (Sin. 19, 8).

51No laforege wangoʼaja jaʼo seboea hocha; — ba lõ nibõhõligoe oroisamõ andrõ.

52No itõrõ tõdõgoe zatoelõ andrõ chõoe, si otarai mbõrõta saʼae, jaʼoegõ Jehowa, ba terara dõdõgoe.

53Mifõnoe sibai bacha dõdõgoe ba zeboea horõ andrõ, samõhõi oroisamõ andrõ.

54Bõrõ wanoenõ chõgoe gamachoitamõ andrõ, ba danõ si fatewoe gana ndraʼodo.

55Ba zi bongi itorõ tõdõgoe dõimõ, jaʼoegõ Jehowa, ba oetõngõni goroisamõ.

56Daʼõ nihonogõi chõgoe: enaʼõ oeʼoʼõ nifachoimõ andrõ.

Ch.

57Oemane: He Jehowa! Tána chõgoe wanõngõni taroma limõ andrõ.

58Moroi siʼaikõ ba dõdõgoe oeʼangarõfi li ndraʼoegõ; eboeaʼõ dõdõoe chõgoe, fatõrõ chõgoe gamaboeʼoela limõ andrõ.

59No oefatooetooe tõdõgoe lala andrõ chõgoe, ba no oesaw̃a wamadoehoeʼõ andrõ chõoe.

60No oeʼalioʼõ ndraʼodo, lõ sarõrõ ndraʼo, ba woloʼõ oroisamõ.

61No tefaʼoeʼoe ndraʼo fesoe ba zeboea horõ andrõ; ba lõ solifoedo oroisamõ. (A. 83).

62Na taloe mbongi, ba maoso ndraʼodo, ba wangandrõ saoha gõlõ chõoe amachoitamõ andrõ, satoelõ. (Sin. 42, 9).

63Awõ zangataʼoefi jaʼoegõ andrõ fefoe ndraʼodo andre, ba awõ zanõngõni nifachoimõ andrõ.

64He Jehowa, no anõnõ danõ waʼeboea dõdõoe andrõ; fahaõ ndraʼo ba nifachoimõ andrõ. (Sin. 33, 5).

I.

65No õlaoe zi sõchi chõ genonioe andre, jaʼoegõ Jehowa, itõrõ niw̃aʼõoe andrõ. (Sin. 17, 41).

66Si sõchi fangila ba faʼaboto ba dõdõ beʼe chõgoe; mamati sa ndraʼo ba goroisamõ andrõ.

67Me lõ moeʼideʼideʼõ ndraʼodo na, ba seloengoe ndraʼo, ba ijaʼe, ba oetõngõni niw̃aʼõoe. (A. 75. Jes. 28, 19).

68Si sõchi tõdõ ndraʼoegõ ba sobõwõ, fahaõ ndraʼo ba gamachoitamõ andrõ. (A. 12).

69Lafachai waja chõgoe seboea hocha andrõ; — ba jaʼodo, ba moroi ba dõdõgoe oeʼoʼõ nifachoimõ andrõ. (A. 78).

70No abeʼe dõdõra, motawõ; ba jaʼodo, ba oeʼomoesoiʼõ dõdõgoe ba goroisamõ andrõ. (A. 77).

71Fangorifigoe me teʼideʼideʼõ ndraʼodo, enaʼõ oetõngõni nifachoimõ andrõ. (Sin. 118, 21).

72Omasido goroisa mbawaoe andrõ, moroi ba ngahõnõ ganaʼa ba moroi ba ngahõnõ wirõ. (Sin. 19, 11).

K.

73Tangaoe zombõi jaʼodo, tangaoe zamazõchi; beʼe chõgoe waʼaboto ba dõdõ, enaʼõ oetõngõni goroisamõ andrõ.

74Laʼila dania ndraʼo sangataʼoefi jaʼoegõ, ba omoeso dõdõra me sanõtõna ba daroma limõ ndraʼodo.

75Oeʼila wa no satoelõ hoekoemõ andrõ, jaʼoegõ Jehowa, awõ wa ba wa lõ farõi ndraʼoegõ õʼideʼideʼõ ndraʼodo. (A. 67).

76Enaʼõ na fondrara dõdõgoe waʼeboea dõdõoe andrõ, enaʼõ na itõrõ nifaboeʼoemõ andrõ chõ genonioe andre. (Sin. 109, 21).

77Enaʼõ na faloechado waʼahachõ dõdõ chõoe, enaʼõ aoerido; waʼomasigoe sa goroisamõ andrõ. (A. 143).

78Acha aila zeboea hocha andrõ, me lahõndrõgõ ndraʼo, lõ bõrõ, ba jaʼodo, ba oeʼaloealoei tõdõgoe geloeaha goroisamõ andrõ. (A. 85, 86).

79Enaʼõ na faofao chõgoe zangataʼoefi jaʼoegõ ba si no aboto ba dõdõ wamadoehoeʼõmõ andrõ!

80Ja adõlõ dõdõgoe woloʼõ amachoitamõ andrõ, enaʼõ lõ faloecha waʼaila ndraʼodo.

L.

81Hoemoeloe dõdõgoe ba wangorifi andrõ chõoe; oedõnadõna ba daroma limõ andrõ.

82Omasi sibai hõrõgoe daroma limõ andrõ, ba oemane: ”Ha waʼara õrara dõdõgoe!”

83Hoelõ goeli nambi ba zimbo saʼae ndraʼodo, ba lõ solifoedo nifachoimõ andrõ. (A. 93).

84Ha waʼanaoe noso genonioe andre? Ha waʼara õhoekoe zolohi jaʼodo?

85No lacharoe chõgoe lõsoelõsoe seboea hocha andrõ; jaʼira andrõ, si lõ faoedoe ba goroisamõ andrõ. (A. 69).

86Oroisamõ andrõ fefoe, ba no si doehoe; lagohido lõ bõrõ: tolo ndraʼodo!

87Hatṍ maʼifoe tõ, ba laboenoedo menaʼõ ba danõ andre, ba lõʼõ zoei nibõhõligoe oroisamõ andrõ.

88Orifido ba waʼeboea dõdõoe andrõ, enaʼõ oetõngõni wamadoehoeʼõ mbawaoe andrõ! (A. 149).

M.

89Taroma limõ andrõ, jaʼoegõ Jehowa, ba lõ teboelõ ba zoroego, iroegi zi lõ aetoe. (Jes. 40, 8).

90Fa lõ farõi ndraʼoegõ, ba gõtõgõtõ waʼara; jaʼoegõ zamazõchi tanõ, ba no aró.

91Dali nihonogõimõ andrõ, wa so manõ fefoe hadia ia, iroegi maʼõchõ andre; oi sa ngoningonioe fefoe.

92Na tenga faʼomoeso dõdõgoe goroisamõ andrõ menaʼõ, ba noa saʼae otoefo gilogoe ba waʼanoemanagoe andre.(A. 50. Jer. 15, 16).

93Sagõtõ jaʼodo, ba lõ olifoedo goroisamõ andrõ; noa sa õbeʼe fangorifigoe. (A. 109).

94Chõoe ndraʼodo, tolodo! Oeʼaloealoei sa goroisamõ andrõ. (A. 45).

95Ladarodarogõ ndraʼo seboea horõ andrõ, ba wamoenoe jaʼodo. — Oetõngõtõngõni wamadoehoeʼõmõ andrõ.

96Fozoe zoʼahonoa fefoe, ba faʼaetoe, oeʼila: ba oroisamõ andrõ, ba si lõ aetoe.

N.

97Ha lõ omasido goroisamõ andrõ! Maʼõmaʼõchõ lõ aefa ba dõdõgoe. (Sin. 1, 2).

98No õʼatoeatoeaʼõ ndraʼodo, moroi ba zi faʼoedoe chõgoe, oroisamõ andrõ, me no tána chõgoe, iroegi zi lõ aetoe. (Moz. V. 4, 6).

99Atoeatoea ndraʼodo, moroi ba zamahaõ jaʼo fefoe; me oefatooetooe tõdõgoe wamadoehoeʼõmõ andrõ.

100Atoeatoea ndraʼo, moroi ba zatoea, me oetõngõni goroisamõ andrõ.

101Lõ oerai oehoendragõ lala si lõ sõchi, enaʼõ oeʼoʼõ limõ andrõ.

102Lõ oebõhõli zatoelõ andrõ chõoe; me no õfahaõ ndraʼodo.

103Waʼami ba lelagoe gamaboeʼoela limõ andrõ; āmi moroi ba w̃e w̃ani ba mbawagoe! (Sin. 19, 11).

104Fangatoeatoeagoe goroisamõ andrõ; andrõ oeʼogorofi fefoe lala waja andrõ.

O.

105Fandroe fõna gahegoe daroma limõ andrõ, ba haga ba lalagoe. (Fet. II. 1, 19).

106No fahõloe ndraʼodo, ba oeʼoʼõ, ba wanõngõni amachoitamõ andrõ, si no atoelõ.

107No aõndrõ sibai ndraʼodo. He Jehowa orifi ndraʼo, fatõrõ ba limõ andrõ? (A. 67. 71).

108Enaʼõ na omasi ndraʼoegõ gameʼela mbewegoe andrõ, soroi ba dõdõ, jaʼoegõ Jehowa, ba enaʼõ na õfahaõ ndraʼodo ba gamachoitamõ andrõ. (Sin. 19, 15).

109Oegogohe tangagoe nosogoe, si lõ mamalõmalõ, ba lõ olifoedo goroisamõ andrõ. (A. 141).

110No lalaoe wesoe chõgoe seboea horõ andrõ, ba lõ seloengoe ndraʼo, lõ nibõhõligoe oroisamõ andrõ.

111Tána chõgoe, iroegi zi lõ aetoe, wamadoehoeʼõmõ andrõ, me no faʼomoeso dõdõgoe.

112No aolo dõdõgoe ba woloʼõ amachoitamõ andrõ, si lõ mamalõmalõ, iroegi gamozoea.

Õ.

113Oeʼogorofi zi doea tõdõ, ba oroisamõ andrõ, ba omasido. (Sin. 31, 7).

114Nõoegoe ba baloesegoe ndraʼoegõ; manõtõna ndraʼo ba daroma limõ andrõ. (Sin. 3, 4).

115Miheta ami chõgoe, jaʼami, solaoe si lõ sõchi! enaʼõ oetõngõni goroisa Lowalangigoe andrõ.

116Toewoe galogogoe, dali nifaboeʼoemõ andrõ, enaʼõ aoerido ba bõi beʼe aila ndraʼo, ba wanõtõnagoe andrõ.

117Abeʼeʼõ ndraʼo, enaʼõ faloechado wanolo, ba lõ oefamalõmalõ wanõngõni amachoitamõ andrõ.

118Seloengoe andrõ, samõhõli nifachoimõ andrõ, ba lõ ba dõdõoe; me si lõ boto wajara andrõ.

119Hoelõ na latiboʼõ gachozila õtiboʼõ fefoe zeboea horõ ba goeli danõ; andrõ omasido wamadoehoeʼõmõ andrõ.

120Moehocha mboegoe, faʼataʼoegoe ndraʼoegõ, ataʼoe ndraʼodo wangoehoekoemõ andrõ.

R.

121No oetõrõ zadõlõ ba satoelõ; bõi loeloe ndraʼodo ba zamalangõgõ jaʼo!

122Oawõgõ genonioe andre, ba wangorifi jaʼia, fa bõi lafakao ndraʼo si fajaw̃a andrõ! (Sin. 19, 14).

123Omasido sibai oeʼila wangorifi andrõ ba taroma li satoelõ andrõ chõoe.

124Beʼe dali waʼeboea dõdõoe andrõ, wamatõrõ enonioe andre, ba fahaõ ndraʼo ba gamachoitamõ andrõ.

125Enonioe ndraʼodo; faʼatoeatoea beʼe chõgoe, enaʼõ aboto ba dõdõgoe wamadoehoeʼõmõ andrõ.

126Baw̃a wolaoe saʼae chõ Jehowa; no labeʼe faja goroisamõ andrõ.

127Daʼõ mbõrõ, wa omasido goroisamõ andrõ, moroi ba ganaʼa, moroi ba mbalaki. (Sin. 19, 11).

128Andrõ oetehe fefoe nifachoimõ andrõ; fefoe lala waja, ba oeʼogorofi.

S.

129Sahõlihõli dõdõ wamadoehoeʼõmõ andrõ; andrõ itõngõni tõdõgoe.

130Nat teboka daroma limõ andrõ, ba mohaga; faloecha waʼaboto ba dõdõ zadõlõ tõdõ. (Sin. 19, 8).

131Oebokai mbawagoe, owõchi dõdõgoe, hoemoeloe ba goroisamõ andrõ.

132Otahõgõ ndraʼodo ba eboeaʼõ dõdõoe chõgoe, tõrõ lala ba zangomasiʼõ tõimõ andrõ!

133Abeʼeʼõ mbekagoe ba lala limõ andrõ ba bõi beʼe ifatõrõ si lõ atoelõ hadia ia! (Sin. 17, 5).

134Efaʼõ ndraʼo ba wamakao niha jaʼodo, enaʼõ oeʼoʼõ goroisamõ andrõ.

135Hagaini genonimõ andre bawaoe, ba fahaõ ndraʼo ba gamachoitamõ andrõ.

136No falawoe idanõ hõrõgoe, moʼelea, me lõ moeʼoʼõ goroisamõ andrõ.

T.

137Satoelõ ndraʼoegõ Jehowa, ba satoelõ wangoehoekoemõ andrõ.

138Famadoehoeʼõmõ andrõ, ba ba waʼatoelõ õʼoroiʼõ mege, ba ba waʼadoehoe manõ.

139Iʼado saʼae fõnoegoe andrõ, me no olifoe zamakao jaʼo daroma limõ andrõ. (Sin. 69, 10).

140Si lõ fabaja hadia ia daroma limõ andrõ, ba iʼomasiʼõ enonimõ andre.

141Sideʼide ndraʼodo, ba si lõ ba dõdõ niha bõʼõ, ba lõ solifoedo oroisamõ andrõ. (A. 153).

142Faʼatoelõmõ andrõ, ba no faʼatoelõ si lõ mamalõmalõ, ba no si doehoe goroisamõ andrõ.

143No gõna ndraʼo faʼaboe dõdõ ba faʼatosasa; ba faʼomoeso dõdõgoe goroisamõ andrõ. (A. 174).

144Faʼatoelõ wamadoehoeʼõmõ andrõ, ba si lõ mamalõmalõ; beʼe chõgoe waʼaboto ba dõdõ, enaʼõ aoerido!

Oe.

145Moeʼao ndraʼo, moroi siʼaikõ ba dõdõgoe: Fondrondrongo chõgoe, Jehowa! Oeʼoʼõ gamachoitamõ andrõ.

146Oeʼangarõfi li ndraʼoegõ, tolodo, enaʼõ oeʼoʼõ gamachoitamõ andrõ!

147Lõ bõrõ moloeo na, ba moeʼao ndraʼo; oedõnadõna ba limõ andrõ. (A. 114).

148Ihoelõ wamosasi zi bongi andrõ hõrõgoe, ba wamatooetooe taroma limõ andrõ.

149Fondrondrongo ligoe, ba waʼeboea dõdõoe andrõ; he Jehowa, orifi ndraʼo, dali lala andrõ chõoe! (A. 88. 154. 159).

150Lahatõʼõ ira sanao horõ, si no arõoe oroisamõ andrõ. (A. 86).

151Sahatõ ndraʼoegõ, jaʼoegõ Jehowa, ba si doehoe manõ goroisamõ andrõ fefoe.

152No ara saʼae oeʼila ba wamadoehoeʼõmõ andrõ, wa no õhonogõi ia siroegi si lõ aetoe.

W.

153Faigi waʼanoemanagoe andre, ba efaʼõ ndraʼodo! Lõʼõ sa solifoedo oroisamõ andrõ. (A. 176).

154Fatoenõ hoehoeogoe andrõ ba efaʼõ ndraʼo; orifido, fatõrõ ba limõ andrõ!

155Ba zeboea horõ andrõ, ba no arõoe wangorifi, me lõ ba dõdõra amachoitamõ andrõ.

156No eboea waʼahachõ dõdõoe andrõ, jaʼoegõ Jehowa, orifido, fatõrõ ba lala andrõ chõoe.

157No ato zolohi jaʼodo ba samakao jaʼo, ba lõ oebõhõli wamadoehoeʼõmõ andrõ.

158No oeʼila zoʼolalõw̃a andrõ, ba ogoro ndraʼo, me lõ ba dõdõra taroma limõ andrõ.

159Nehegõ, wa no somasi oroisamõ andrõ ndraʼodo; he Jehowa, orifido, ba waʼeboea dõdõoe andrõ!

160Ahonoa daroma limõ andrõ, ba si doehoe, ba si lõ aetoe lala waʼatoelõ andrõ chõoe. (Joh. 17, 17).

W̃.

161Lagohi ndraʼo salaw̃a, lõ bõrõ, ba taroma limõ andrõ zataʼoe dõdõgoe.

162Omoeso dõdõgoe niw̃aʼõmõ andrõ, faʼomoeso dõdõ zanõndra hare seboea.

163Si fatoewoe ba dõdõgoe waja ba oeʼogorofi; ba oroisamõ andrõ, ba omasido.

164Mewitoe maʼṍchõ oesoeno ndraʼoegõ ba nifachoimõ andrõ, satoelõ andrõ.

165Ba zomasi oroisamõ andrõ, ba fahõna waʼohahaoe dõdõ, ba lõ manendre ira.

166Oedõnadõna wangorifi andrõ chõoe, jaʼoegõ Jehowa, ba oeʼoʼõ goroisamõ andrõ. (Moz. I. 49, 18).

167Itõngõni wamadoehoeʼõmõ andrõ tõdõgoe, ba no tobali omasido sibai ia.

168Oeʼoʼõ goroisamõ, awõ wamadoehoeʼõmõ andrõ; doedoema hõrõoe sa atṍ lalagoe andrõ fefoe. (Sin. 18, 22).

Z.

169Acha iroegi ndraʼoegõ fangarõngarõgoe andrõ, jaʼoegõ Jehowa; beʼe chõgoe waʼaboto ba dõdõ, fatõrõ ba niw̃aʼõoe andrõ.

170Folala chõoe wakaosagoe andrõ; orifi ndraʼodo, fatõrõ ba niw̃aʼõoe andrõ.

171Loeaha wanoeno jaʼoegõ dania mbewegoe, õfahaõ sa ndraʼo ba gamachoitamõ andrõ.

172Sanoeno taroma limõ andrõ dania legagoe, me no satoelõ goroisamõ andrõ fefoe. (Sin. 1, 2. Amaed. 6, 22).

173Ja mõi fanolo chõgoe dangaoe andrõ; noa sa oetoejoe chõgoe goroisamõ andrõ.

174Omasido wangorifi andrõ chõoe, jaʼoegõ Jehowa; ba faʼomoeso dõdõgoe goroisamõ andrõ.

175Acha anaoe nosogoe, enaʼõ oesoeno ndraʼoegõ; ba hana na itolo ndraʼo hoekoemõ andrõ.

176Si no eloengoe ndraʼodo; aloei genonimõ andre, nifangaloei biribiri si soena; lõʼõ sa solifoedo oroisamõ andrõ. (Jes. 53, 6. A. 16).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index