Search form

SOERA ZINOENÕ 135

Sinoenõ 135.

I. Famarooe tõdõ, ba wanoeno Lowalangi, si lõ ambõ faʼabõlõ, sanolo Iraono Gizeraëli. II. Faja nadoe andrõ; fanoeno Lowalangi.

1I. Haleloeja! Misoeno dõi Jehowa andrõ; misoeno, jaʼami enoni Jehowa!

2Jaʼami, si sosó ba gosali Jehowa andrõ; ba golajama gosali andrõ, chõ Lowalangida!

3Misoeno Jehowa, me no si sõchi tõdõ Jehowa andrõ; misoeno dõinia, me no omasiõ!

4Noa sa itoejoe Jakobo andrõ Jehowa, no ihalõ tána chõnia Ndraono Gizeraëli. (Moz. II. 19, 5. 6. Moz. V. 7, 6).

5Noa saʼae aboto ba dõdõgoe, wa no seboea Jehowa, awõ wa italoeʼi fefoe Lowalangi bõʼõ Soʼaja jaʼita andrõ. (Sin. 86, 8).

6Fefoe hadia ia zomasi Jehowa, ba ilaoe, he ba mbanoea si jaw̃a ba he ba goeli danõ, ba he ba nasi ba ba zabacha si tooe, fefoe.

7Solohe mijaw̃a lawoeo andrõ, moroi ba wondrege danõ, sombõi teoe, awõ gari mbanoea andrõ, sanaoʼõ baero ba zi fahõna ia angi andrõ. (Jer. 10, 13).

8Samoenoe mege si aʼa ba waʼatoemboe andrõ, ba danõ Miseraji, iʼotarai ba niha, noemalõ ba goerifõra. (Moz. II. 12, 29).

9No ifabeʼeʼõ chõoe dandra ba sahõlihõli dõdõ, jaʼoegõ tanõ Miseraji, ba chõ Waraʼo andrõ ba ba chõ ngoningonia, fefoe. (Sin. 78, 43—52).

10Sangalani soi, ha waʼoja, ba samoenoe razo sabõlõ:

11Sihona andrõ ba Ogi, razo Mbazana andrõ, awõ nõri Ganaʼana fefoe. (Moz. IV. 21, 21—35).

12Ba ibeʼe ochõta danõra, ochõta mbanoeania Iraono Gizeraëli. (Jos. 12).

13He Jehowa, si lõ teboelõ dõimõ andrõ; gõtõgõtõ waʼara, ba lõ olifoe niha ndraʼoegõ, jaʼoegõ Jehowa! (Sin. 102, 13).

14Iʼohe sa ba lala hoehoeo mbanoeania andrõ Jehowa, ba ihachõsi tõdõ genoninia andrõ. (Moz. V. 32, 36. 43).

(A. 15—20: Sin. 115, 4—11.)

15II. Adoe niha baero andrõ, ba firõ ba anaʼa, nifazõchi danga niha.

16Mobawa, ba lõ moehede; mohõrõ, ba lõ laʼila niha.

17Motõgi dalinga, ba lõ larongo li niha ba lõ hanoehanoe ba mbawara.

18Ba tobali fagõlõgõlõ chõra zamazõchi jaʼira, dozi sanõtõna chõra hadia ia.

19Jaʼami ngaʼõtõ Gizeraëli, misoeno Jehowa! Jaʼami ngaʼõtõ Gaʼaroni andrõ, misoeno Jehowa! (Sin. 118, 2—4).

20Jaʼami ngaʼõtõ Lewi andrõ, misoeno Jehowa! Jaʼami, sangataʼoefi Jehowa, misoeno Jehowa!

21Nisoeno Jehowa moroi ba Ziona, Jehowa andrõ, sowanoea ba Jeroezalema andrõ! Haleloeja!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index