Search form

SOERA ZINOENÕ 139

Sinoenõ 139.

I. Ahori iʼila Lowalangi fefoe hadia ia ba lõ si lõ jaʼia. II. Fangandrõ.

Chõ doeka wanoenõ andrõ. Chõ Dawido. Sinoenõ.

1I. He Jehowa, õsechegõ ndraʼo ba no aboto ba dõdõoe ndraʼodo. (A. 23. Sin. 7, 10).

2Fedadaogoe ba femaosogoe, ba õʼila, ba õsõndra geraʼeragoe, moroi ba zarõoe. (Jer. 12, 10).

3Õtimba tõdõoe wowaõwaõgoe ba femõrõgoe, ba no aboto ba dõdõoe lalagoe andrõ fefoe.

4Hiza sa, samboea lõ li mbewegoe andre, si lõ õʼila manõ, jaʼoegõ Jehowa.

5No õfaʼoeʼoe ndraʼodo, he moroi fõna ba he moroi foeri, ba no õtoefa ndraʼo tangaoe.

6Tebai aboto ba dõdõgoe wangila si manõ, lõ oechamõ — tebai oelaw̃a!

7Heza oesaw̃a ba Gehehamõ andrõ? Heza oebiniʼõ ndraʼodo, ba wamaigioe andrõ?

8Na mõido mijaw̃a ba zoroego enaʼõ, ba no so ndraʼoegõ ba daʼõ; ba na ba mbanoea tooe oeʼaloei chõgoe naha wemõrõ, ba no so ndraʼoegõ. (Amos. 9, 2).

9Na oehalõ enaʼõ afigoe gafi waʼamoloeo andrõ, na ba wondrege nasi oeʼaloei nahiagoe, (Jon. 1, 3),

10ba ba daʼõ õʼohe dangagoe, õtoejoe ndraʼo kambõlõoe.

11Ba na oemane: Jamoebaloegõ manõ ndraʼodo faʼogõmigõmi, ja tobali si bongi haga andrõ, si tefasoei jaʼodo, (Job. 34, 22),

12ba tenga si tõra faʼogõmigõmi chõoe zogõmigõmi andrõ, ba hoemaga zi bongi andrõ, si mane si moloeo; si mane haga waʼogõmigõmi andrõ. (Jak. 1, 17).

13No jaʼoegõ zamazõchi boeagoe andrõ, no jaʼoegõ zombõi jaʼodo, ba daloe ninagoe.

14Oeʼandrõ saoha gõlõ chõoe wamazõchioe jaʼodo, sahõlihõli dõdõ, si tobali dõdõ niha; sahõlihõli dõdõ wolaoemõ andrõ, ba no aboto sibai ba dõdõgoe.

15Tenga si tobini chõoe dõlagoe andre, me tefazõchi ndraʼodo, ba zogõmigõmi, me tewõwõi ndraʼo, nifombõwõi doeka, ba hoenõ danõ. (Sangomb. 11, 5).

16No iʼila ndraʼo hõrõoe, me tanõmõ niha na ndraʼodo, ba no tetanõ ba zoera chõoe mbaw̃a andrõ fefoe, nihonogõi, me samboea lõ iroegi na. (Job. 14, 5).

17II. Ba no seboea sibai bõli geraʼeraoe chõgoe, jaʼoegõ Lowalangi, soja sibai gahonoania! (Jer. 55, 9).

18Na oeʼerai enaʼõ, ba no oja, moroi ba ngawoea nene; na tokea ndraʼodo, ba lõ si teboelõ ndraʼo chõoe. (Sin. 40, 6; 63, 7).

19Enaʼõ na õboenoe zanao horõ andrõ, jaʼoegõ Lowalangi! Ba sangeʼengeʼe, andrõ, ba enaʼõ na aheta chõgoe!

20Sanandraw̃aisi jaʼoegõ, sanõtõi tõimõ ba waja, si faʼoedoe chõoe andrõ.

21Hadia, alacha lõ fatioe dõdõgoe ba zi fatioe tõdõ chõoe, jaʼoegõ Jehowa? Ba hadia, lõ oeʼogorofi zolaw̃a jaʼoegõ?

22Fatioe dõdõgoe chõra, fatioesa si no moʼahonoa; emali ira chõgoe.

23Sechegõ ndraʼodo, Lowalangi, ja aboto ba dõdõoe dõdõgoe andrõ; tandraigõ ndraʼodo, ba ja aboto ba dõdõoe geraʼeragoe.(A. 1).

24Ba faigi na ba lala saechoe ba waʼafõchõ sodo, ba ohe ndraʼo ba lala ba zi lõ aetoe!(Sin. 27, 11).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index