Search form

SOERA ZINOENÕ 144

Sinoenõ 144.

I. Lowalangi zaw̃atõ Ndraono Gizeraëli, ba nemalira andrõ. II. Fangandrõ howoehowoe, famahowoeʼõ Iraono Gizeraëli andrõ.

Chõ Dawido.

1I. Nisoeno Jehowa, weʼeweʼe dõdõgoe andrõ, samahaõ tangagoe ba wanoewõ ba toetoeroegoe ba wasõndrata. (Sin. 18, 35).

2Fangabeʼegoe, ba hili chõgoe, hatigoe, ba sangorifi, jaʼodo, baloesegoe ba tõtõnafõgoe, sameʼe barõ mbawagoe banoeagoe andrõ. (Sin. 18, 3).

3He Jehowa, hadia niha andrõ, wa õbeʼe ba dõdõoe, ba hadia nono niha, wa õfaigi ia? (Sin. 8, 5).

4Hoelõ nangi nihá, ba hoelõ loemõ sanõrõ mbaw̃ania andrõ. (Job. 14, 2).

5He Jehowa, dada mbanoea si jaw̃a andrõ chõoe ba ae mitooe; babaja hili andrõ, ba manimbo! (Sin. 18, 10; 104, 32).

6Laoe gari mbanoea ba fazawili ira; efasi nono wana andrõ chõoe, ba wametaʼoe jaʼira!

7Oroʼõ dangaoe moroi si jaw̃a; sõbido moroi ba nidanõ seboea ba orifido; efaʼõ ndraʼo ba danga nono niha bõʼõ andrõ.

8Niha solaoe faja bewera, ba kambõlõra, ba no kambõlõ si falimo. (A. 11).

9II. He Lowalangi, oelaoe chõoe zinoenõ si bohooe; oelaoe chõoe mbiola nitika andrõ, si foeloe sinali. (Sin. 33, 2. 3).

10Chõoe, sangabõlõʼõ razo, sangefaʼõ enoninia Dawido ba mbawa ziʼõli famoenoe andrõ.

11Fadõnidõ, efaʼõ ndraʼodo ba danga nono niha bõʼõ andrõ; niha solaoe faja bewera, ba kambõlõra, ba no kambõlõ si falimo. (A. 8).

12Enaʼõ hoelõ zinanõ nihaogõ fangeʼeboea nono matoea chõma, gasagasa waʼamoʼahonoa waʼeboea; ba ono alawe andrõ chõma, ba enaʼõ hoelõ daroe nahe nifoë andrõ, taroe nahe ba gõdo. (Sin. 128, 3).

13Enaʼõ moʼõsi halasama, naha ngawalõ mbalazo; ja moʼono mbiribirima andrõ, ba ngahõnõ, ba ngafoeloe ngahõnõ, ba mbenoeama.

14Ja abeto zigelo zaw̃ima — bõi ja atõla gõli ba bõi faloecha waʼatoeʼa [nemali]; bõi ja terongo wangarõngarõ ba newalima.

15Ja ahowoe soi andrõ, si faloecha si manõ! Ja ahowoe soi andrõ, si mõi Lowalangi Jehowa andrõ! (Moz. V. 33, 29).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index