Search form

SOERA ZINOENÕ 147

Sinoenõ 147.

I. Fanoeno Lowalangi zi so andrõ fefoe. II. Fanoeno Lowalangi Ndraono Gizeraëli andrõ, sondrorogõ jaʼira.

1I. Haleloeja! Misoeno Jehowa, me si sõchi wanoenõ andrõ chõ Lowalangida, me omasiõ; si nangea wanoenõ andrõ. (Sin. 92, 2).

2Ifoeli itaroeʼõ Jeroezalema andrõ Jehowa; iʼozaragõ Ndraono Gizeraëli andrõ, nifazawili.

3Jaʼia andrõ, sangebeʼeʼõ si no arasa tõdõ andrõ, sodaloedaloeni safõchõ chõra.

4Sangerai ha waʼoja ndrõfi andrõ, sanõtõi tõira fefoe. (Jes. 40, 26).

5No eboea Zoʼaja jaʼita andrõ, ba no fahõna waʼabõlõ chõnia: no si lõ fondrege waʼaboto ba dõdõnia andrõ.

6Iʼabeʼeʼõ nifakao andrõ Jehowa ba ihõndrõgõ zeboea horõ, iroegi danõ tooe. (Loek. 1, 52).

7Miʼanoenõ chõ Jehowa, ja fao wangandrõ saoha gõlõ; misoeno Lowalangida, wolaoe biola nitika andrõ sideʼide!

8Sangalōē banoea lawoeo, sameʼe teoe ba danõ, samatoemboeʼõ doeʼoe ba hili.

9Sameʼe gõ ba goerifõ niha andrõ ba ba nono gaga andrõ, siʼao chõnia. (Job. 38, 41).

10Tenga somasi ia waʼabõlõ koedo, ba lõ ba dõdõnia waʼesolo waha niha.

11Somasi Jehowa, ba sangataʼoefi jaʼia, sanõtõna faʼeboea dõdõnia andrõ.

12II. Soeno Jehowa, jaʼoegõ Jeroezalema; soeno Lowalangimõ andrõ, jaʼoegõ Siona!

13Jaʼia zangaro lazi andrõ ba mbawa gõli chõoe, ba samahowoeʼõ iraono baewali chõmõ.

14Lõ ifaʼamõi ba danõoe zanoewõ, iʼaboesoiʼõ ndraʼoegõ fache si sõchi. (Sin. 81, 17).

15Ifaʼema ba danõ goroisania; si fagohi daroma linia andrõ.

16Ilaoe deoe si bakoe andrõ, hoelõ mboe mbiribiri, ba ilaoe namo sabeʼe, hoelõ nawoe. (Sin. 148, 9. Job. 38, 22—30).

17Ilaoe si tooe deoe kara andrõ, faʼeboea zi sambasambawa; ha niha zanaha faʼoafoe andrõ chõnia?

18Ba ilaoe linia, ba mangoeloe ibeʼe; ifatõrõ nangi andrõ chõnia, ba mangele nidanõ.

19Ifarongogõ chõ Jakobo daroma linia ba chõ Gizeraëli gamachoitania, awõ lala andrõ chõnia.

20Ba niha bõʼõ, ba lõ nilaoenia si manõ; ba lala andrõ chõnia, ba lõ laʼila. Haleloeja! (Moz. V. 4, 7. Hal. zin. 14, 16. Rom. 3, 2).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index