Search form

SOERA ZINOENÕ 148

Sinoenõ 148.

Famarooe banoea si jaw̃a ba tanõ si tooe, ba wanoeno Lowalangi.

1Haleloeja! Misoeno Jehowa, moroi ba mbanoea si jaw̃a, misoeno ia ba zalaw̃a jaw̃a!

2Misoeno ia, jaʼami malaʼika chõnia fefoe; misoeno ia, jaʼami, sabõlõ chõnia, dozi! (Sin. 103, 20—22).

3Misoeno ia, jaʼoegõ loeo ba jaʼoegõ baw̃a; misoeno ia, jaʼami dõfi sihaga andrõ, fefoe.

4Misoeno ia, jaʼami fondrege mbanoea si jaw̃a ba jaʼami idanõ, si so jaw̃a mbanoea si jaw̃a andrõ!

5Ndramoesoeno dõi Jehowa andrõ; me no bõrõ niw̃aʼõnia, wa tefazõchi ira. (Sin. 33, 9).

6Ba no ihonogõi naha chõra, si lõ teboelõ; no ifachoi lala, si tebai lasawõ.

7Misoeno Jehowa, moroi ba goeli danõ; jaʼami saliw̃aliw̃a ba nasi, awõ zabacha si tooe andrõ, fefoe!

8Jaʼami alitõ ba teoe kara ba teoe si bakoe ba simbo, ba angi sabõlõ andrõ, samaloea niw̃aʼõnia andrõ.

9Hili andrõ, ba hilihili fefoe, eoe sowoea andrõ, ba eresi fefoe;

10saliw̃aliw̃a ba danõ ba oerifõ niha, fefoe, ba koeõkoeõ ba fofo andrõ sihombo;

11razo ba goeli danõ, awõ soi niha fefoe, samatõrõ niha ba sangoehoekoe ba goeli danõ, fefoe.

12Ono matoea ba ono alawe ba satoea ba iraono.

13Ndramoesoeno dõi Jehowa, me no ha tõinia zeboea: italoeʼi danõ ba italoeʼi mbanoea si jaw̃a lachõminia andrõ!

14Ba no iʼalaw̃aʼõ dandroe andrõ ba mbanoeania, fanoeno satoelõ tõdõ andrõ chõnia, fefoe, Iraono Gizeraëli andrõ, banoea sahatõ chõnia. Haleloeja.” (Sin. 132, 17).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index