Search form

SOERA ZINOENÕ 17

Sinoenõ 17.

Fangandrõ fangefaʼõ ba zeboea horõ.

Fangandrõ Dawido.

1Fondrondrongo Jehowa hoehoeo satoelõ! Beʼe mbõrõ dalingaoe ba weʼaogoe andre! Beʼe ba dõdõoe wangandrõgoe, si oroi mbewe si lõ faja.

2Jaiʼotarai mbawaoe hoekoe andrõ chõgoe; satoelõ iʼila hõrõoe. (Sin. 43, 1).

3Na õtandraigõ dõdõgoe, na õfaigi ba zi bongi, na õhaogõ wanechegõ jaʼodo, ba lõ õsõndra geraʼera si lõ sõchi ba dõdõgoe bacha, ba lõ solalõ mbewegoe. (Sin. 16, 7; 139, 1).

4Ba wolaoe niha andrõ, ba no oetarogõ daroma lioe, fa bõi oetõrõ lala zamakao awõnia.

5No oeʼabeʼeʼõ wanara lahemõ, lõ sangiwa wemekaigoe.

6Oeʼangarõfi li ndraʼoegõ, õfondrondrongo sa ligoe, jaʼoegõ Lowalangi, hatõʼõ mbõrõ dalingaoe chõgoe, fondrondrongo wehedegoe!

7Oromaʼõ waʼeboea dõdõoe andrõ, soja ngawalõ, enaʼõ ahõlihõli dõdõma, jaʼoegõ, sangorifi sanaw̃a jaʼoegõ kambõlõoe, ba zi faʼoedoe chõra. (Sin. 4, 4).

8Rorogõ ndraʼo nifondrorogõ ono hõrõ, biniʼõ ndraʼo ba loemõ gafioe andrõ. (Moz. V. 32, 10).

9Ba zeboea horõ andrõ, samalangõgõ jaʼo, ba zi fatioe tõdõ chõgoe, samazoeizoei jaʼodo.

10No ladoehõ dõdõra tawõ, ba lalaoe hocha bewera.

11Heza mahoendragõ danõ, ba no lafasoei ndraʼaga, laʼaloealoei wolaoegõ jaʼaga.

12Hoelõ zingo, somasi mondraʼoe, ba hoelõ nono zingo ba mbinimbini. (Sin. 10, 9).

13Faoso Jehowa! hoelõ ia, timba ia tooe! Orifi nosogoe, ba zeboea horõ andrõ fõdamõ,

14ba niha andrõ, jaʼoegõ Jehowa, tangaoe, ba niha goeli danõ andre, soʼoeracha ba gõtõ daʼe, nifoʼosioe taloe ameʼelamõ andrõ! Jaʼira, ba tenga sambõ ono, ba ondrõitara chõ nonora zi tõra chõra. (Loek. 16, 25. Fil. 3, 19).

15Ba jaʼodo, ba oeʼila mbawaoe, bõrõ waʼatoelõ[goe], aboeso ndraʼo chalachalamõ, na tokea ndraʼodo.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index