Search form

SOERA ZINOENÕ 18

Sinoenõ 18.

Fangandrõ Dawido saoha gõlõ, me no ilaw̃a zi faʼoedoe chõnia.

1Chõ doeka wanoenõ andrõ. Chõ genoni Jehowa andrõ, Dawido andrõ, sanandrõsaigõ chõ Jehowa taroma li zinoenõ andre, me no iʼefaʼõ ia Jehowa ba waʼabõlõ zi faʼoedoe chõnia, fefoe, ba ba danga Zaoelo. Imane: (Sam. II. 22).

2Omasido ndraʼoegõ, Jehowa, faʼabõlõgoe!

3Hili dõdõgoe Jehowa ba saw̃atõgoe ba sangorifi jaʼo. Lowalangigoe, ba no nahiagoe, chõnia manõtõna ndraʼo, no baloesegoe ia ba tandroe fangorifi chõgoe ba hatigoe.(Moz. V. 32, 5).

4Oeʼangarõfi li Jehowa, si nangea nisoeno andrõ, ba teʼorifi ndraʼo, aefa ndraʼo ba zi fatioe tõdõ chõgoe.

5Noa sa ifasoei ndraʼo doeloe ba no ifetaʼoe ndraʼo hohooe famoenoe. (Sin. 116, 3).

6No ikabi ndraʼo bõbõ moroi ba mbanoea tooe, ba no ihawoei ndraʼo tandraw̃a famoenoe.

7No moeʼao ndraʼo chõ Jehowa, ba waʼatosasagoe andrõ, no oeʼangarõfi li Lowalangigoe, no ifondrondrongo ligoe ba gõdonia andrõ ba no iroegi dõgi dalingania weʼaogoe andrõ chõnia.

8Ba hoemeoe danõ, modoeroe, ba hoemisi dajadaja hili ba mangiwa, me no tesao wõnoenia.

9Manimbo nichoenia ba iʼotarai mbawania alitõ si manga badia ia, hoemola mbo galitõ, si oroi chõnia. (Moz. II. 19, 18).

10Idada mbanoea, mõi ia tooe, sogõmigõmi barõ gahenia. (Sin. 144, 5).

11Ba hoeloe Keroebi mõi ia, hoemombo misa, manahanahae ia ba gafi nangi. (Sin. 99, 1).

12Ibaliʼõ baloebaloenia zogõmigõmi, osenia fasoei, salōē ba lawoeo saitõ. (Jes. 50, 3).

13Moroi ba haga andrõ fõnania itõrõ lawoeo andrõ teoe kara ba bo galitõ.

14Ba moeʼoegoeʼoegoe Jehowa ba mbanoea si jaw̃a, ba ifarongogõ linia Fondrege zalaw̃a andrõ.

15Iʼefaʼõ nono wana chõnia, ifazawili, ba ifazaoemba gari mbanoea, ifakoejoe. (Sam. I. 7, 10).

16Ba oroma noengo nidanõ ba aheta mbaloebaloe dajadaja danõ, ba wanegoemõ andrõ, jaʼoegõ Jehowa, ba wangõhõfoe geheha nichoemõ andrõ.

17Iʼoroʼõ dangania moroi jaw̃a, iraʼoedo, isõbido moroi ba nidanõ seboea. (Sin. 144, 7; 69, 2. 3).

18Ifadõni ndraʼo ba zi fatioe tõdõ chõgoe, sabõlõ, ba ba zi faʼoedoe chõgoe, me no tebai oelaw̃a ira.

19No lahawoei ndraʼo, me baw̃a waʼateʼala chõgoe, ba no tobali tolotolo chõgoe Jehowa.

20Ba no iʼohe baero ndraʼo ba zebolo tanõ, no iʼefaʼõ ndraʼodo, me no omasi ia ndraʼo. (A. 37).

21No isoelõni chõgoe waʼatoelõ dõdõgoe Jehowa, no ibeʼe chõgoe zoelõ, me no lõ hadia ia zi falemba ba dangagoe.

22Noa sa oetõrõ lala Jehowa, lõ solalõ ndraʼo ba chõ Lowalangigoe.

23Noa sa so ba gametahõgoe hoekoe andrõ chõnia, fefoe, ba amachoitania andrõ, ba lõ niʼarõoeʼõgoe chõgoe. (Moz. V. 17, 19).

24No adõlõ dõdõgoe chõnia ba no oeʼataʼoefi, fa bõi oefazõchi zi lõ atoelõ. (Sin. 15, 2).

25Ba no isoelõni chõgoe waʼatoelõ dõdõgoe Jehowa, balazi wa lõ hadia ia zi falemba ba dangagoe, wamaiginia.

26Ba zeboea tõdõ eboea dõdõoe, ba ba zadõlõ tõdõ adõlõ dõdõoe,

27Ba zohaoehaoe ohaoehaoe ndraʼoegõ, ba ba zabila tõdõ abila ndraʼoegõ.

28Jaʼoegõ sa zanolo niha si gõna famakao, ba õhõndrõgõ hõrõ si fajaw̃a. (Job. 22, 29).

29Jaʼoegõ sa zamohaga fandroegoe, ifohaga zogõmigõmi andrõ chõgoe Jehowa, Lowalangigoe.

30Na õtolodo, ba oedoedoegõ gõli kara, ba na awõgoe Lowalangigoe, ba oesawõ mbaʼabaʼa. (Sin. 60, 14).

31Lala Lowalangi andrõ, ba no moʼahonoa, taroma li Jehowa, ba no moehaogõ; baloese ia ba zanõtõna chõnia, fefoe. (Sin. 19, 9).

32Ha niha sa Lowalangi, baero Jehowa? ba ha niha nahia saro, baero Lowalangida!

33Lowalangi andrõ, sameʼe bõbõ taloegoe faʼabõlõ, sangehao lala chõgoe;

34sombaliʼõ ahe mbõhõ ahegoe, ba samataro jaʼo ba hili.

35Samahaõ tangagoe ba wasõndrata ba taʼiogoe ba wogai fana. (Sin. 144, 1).

36Ba no õbeʼe chõgoe mbaloese fangorifi andrõ chõoe, ba no itoewoe ndraʼo kambõlõoe, ba fangideʼideʼõoe jaʼoegõ zangeboeaʼõ jaʼodo. (Amaed. 15, 33).

37No õʼeboloʼõ naha gahegoe ba lõ sangiwa mboeʼoe kawonogoe. (Sin. 31, 9).

38No oegohi nemaligoe, ba no oechamõ, ba lõ nifoeligoe jaʼo foeri, balazi no oefakiko ira.

39No oerasa ira, fa tebai maoso saʼae, tegaõlõ tooe ira barõ gahegoe.

40Ba no õfobõbõ taloe ndraʼo faʼabõlõ ba wasõndrata, no õfaõndrõ barõgoe zi faʼoedoe chõgoe.

41Moloi chõgoe zi fatioe tõdõ chõgoe, õbeʼe, ba si faʼoedoe chõgoe, ba no oehori.

42Mangarõngarõ ira, ba lõ sangorifi — chõ Jehowa, ba lõ itema lira. (Amaed. 1, 28).

43Ba no oefoefoe ira, si mane gawoegawoe nangi; hoelõ damboe baewali oetiboʼõ ira.

44No õʼefaʼõ ndraʼo ba wasõndrata niha, no õfataro hõgõ soi niha ndraʼodo; tobali laʼoʼõ chõgoe niha si lõ oerai mila.

45Ha larongo ligoe, ba laʼoʼõ chõgoe, lahaogõhaogõ wehedera chõgoe ono niha bõʼõ.

46Ariri nono niha bõʼõ, larõi gõdora, manizinizi.

47Saoeri Jehowa, ba nisoeno nahiagoe saro andrõ, ba niʼeboeaʼõ dõi Lowalangi fangorifigoe andrõ!

48Lowalangi andrõ, sanolo jaʼo ba wolaoe balõ, sameʼe barõ mbawagoe soi niha;

49sangefaʼõ jaʼo ba nemaligoe andrõ. Si ndroehoe, no õbeʼe jaw̃a zi faʼoedoe chõgoe ndraʼodo; no õʼefaʼõ ndraʼo ba niha andrõ samakao awõnia.

50Andrõ oesoeno ndraʼoegõ, jaʼoegõ Jehowa, ba niha baero, oesoeno dõimõ. (Rom. 15, 9).

51Jaʼoegõ, sangeboeaʼõ fangorifi razo, sangeboeaʼõ tõdõ ba nibajoinimõ andrõ, chõ Dawido ba chõ maʼoewoenia, iroegi zi lõ aetoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index