Search form

SOERA ZINOENÕ 25

Sinoenõ 25.

Fangandrõ fangefaʼõ ba danga zi fatioe tõdõ ba fangefa horõ.

Chõ Dawido

1Chõoe, Jehowa, oefazaw̃a dõdõgoe.

2Chõoe oedõnadõna, jaʼoegõ Lowalangigoe! bõi beʼe aila ndraʼo, bõi tehe chõ zi fatioe tõdõ chõgoe, laʼigiʼigiʼõ ndraʼodo!

3Dozi sa atṍ sanõtõna chõoe, ba lõʼõ manõ faloecha aila; ba aila dania zi farõi lõ bõrõ. (Jes. 49, 23).

4He Jehowa, toetoeroe chõgoe lala andrõ chõmõ, fahaõ ndraʼo ba zinõrõ andrõ chõoe. (Sin. 27, 11).

5Tolodo, enaʼõ oetõrõ zi doehoe andrõ chõoe, ba fahaõ ndraʼo; jaʼoegõ sa Lowalangi andrõ, sangorifi jaʼodo; chõoe oedõnadõna, lõ mamalõmalõ.

6Tõrõ tõdõoe waʼahachõ dõdõoe andrõ, jaʼoegõ Jehowa, ba faʼeboea dõdõoe andrõ; moroi ba zi lõ bõrõta sa ia.

7Bõi angeragõ horõgoe me ono matoea ndraʼodo ba he lalõgoe andrõ; tõrõ tõdõoe ndraʼodo, dali waʼeboea dõdõoe andrõ, bõrõ waʼasõchi dõdõoe, jaʼoegõ Jehowa!(Job. 13, 26).

8Seboea tõdõ ba sadõlõ tõdõ Jehowa, andrõ iʼombachaʼõ lala ba zi so horõ andrõ.

9Ba lala satoelõ ifatõrõ zi noemana ba ifahaõ zi noemana ba lala andrõ chõnia.

10Lala Jehowa andrõ fefoe, ba ha sambalõ faʼeboea dõdõ ba faʼadoehoe, chõra si lõ mamõhõi fawoeʼoesa li andrõ ba famadoehoeʼõ andrõ chõnia.

11Beʼe bõrõ dõimõ andrõ, jaʼoegõ Jehowa, wangefaʼõ horõgoe; no eboea saʼae!

12Ba ha niha zangataʼoefi Jehowa? Ifahaõ dania ia ba lala andrõ, nitõrõnia. (Sin. 32, 8).

13Sohahaoe tõdõ dania zi manõ, ba maʼoewoenia zochõ tanõ. (Sin. 37, 9).

14Chõ zangataʼoefi jaʼia fahoewoe Jehowa, ba ifarongogõ chõra nifachoinia andrõ. (Job. 29, 4).

15Lõ aefaʼaefa hõrõgoe chõ Jehowa; iʼefaʼõ sa gahegoe ba goeʼõ andrõ.

16Otahõgõ ndraʼo ba eboeaʼõ dõdõoe chõgoe! noa sa aomõʼaomõ ndraʼo ba si noemana!

17No fahõna waʼaboe dõdõgoe; efaʼõ ndraʼo ba waʼatosasagoe andrõ!

18Faigi waʼanoemanagoe ba faʼaboe dõdõgoe andrõ, ba beʼe aefa chõgoe horõgoe fefoe.

19Nehegõ zi fatioe tõdõ chõgoe, me no ato; ba me si lõ atoelõ watioesara chõgoe. (Sin. 35, 19).

20Rorogõ nosogoe ba orifi ndraʼo, bõi beʼe aila ndraʼo, me oedõnadõna chõoe. (Sin. 16, 1).

21Jamoetolo ndraʼo fa lõ horõ ba faʼadõlõ dõdõ! Oedõnadõna sa chõoe. (Job. 1, 1).

22He Lowalangi! Efaʼõ Ndraono Gizeraëli ba waʼaboe dõdõra fefoe!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index