Search form

SOERA ZINOENÕ 27

Sinoenõ 27.

I. Fanõtõna ba Lowalangi. II. Fehoeloe dõdõ ba gosalinia andrõ. III. Fangandrõ fangorifi.

1I. Haga chõgoe Jehowa ba fangorifi, ha niha zataʼoe ndraʼo? baʼabaʼa chõgoe ba nosogoe Jehowa, ha niha zi tokea ndraʼo? (Sin. 56, 5. Jes. 12, 2).

2Na lahatõʼõ ira chõgoe sanao horõ, ba wemanga õsigoe — si faʼoedoe chõgoe ba si fatioe tõdõ — ba manendre ira ba alaoe. (Job. 19, 22).

3Na latarogõ ndraʼo sanoewõ, ba lõ ataʼoe dõdõgoe; na tesoewõ ndraʼo, ba lõ aboe dõdõgoe. (Sin. 3, 7).

4II. Sambalõ oeʼandrõ chõ Jehowa, daʼõ zihoeloe dodõgoe: enaʼõ monahia ndraʼo ba nomo Jehowa andrõ, gõtõ waʼanaoe nosogoe, ba wamaigi faʼasõchi Jehowa andrõ ba ba wangomoesoiʼõ tõdõgoe ba gosalinia. (Sin. 23, 6; 26, 6—8; 42, 5; 63, 3; 84, 4. 5).

5Ifonaha saʼae ndraʼo baose, na baw̃a wamoenoe, ibiniʼõ ndraʼo ba mbinimbini ba nosenia andrõ; iʼalaw̃aʼõ jaw̃a ndraʼo ba dete gowe. (Sin. 31, 21; 40, 3).

6Ba tefaõga mbawagoe jaw̃a zi faʼoedoe chõgoe, si tefasoei jaʼo, ba soemange nilaoe torofe oebeʼe ba nosenia, manoenõ ndraʼo chõ Jehowa ba oelaoe mbiola.

7III. Fondrondrongo Jehowa, moeʼao ndraʼodo! Ba eboeaʼõ dõdõoe chõgoe ba tema ligoe!

8Iw̃aʼõ tõdõgoe, chõoe iʼotarai taroma li andrõ: ”Miʼaloei mbawagoe!” — Bawaoe andrõ, Jehowa, oeʼaloei. (Moz. V. 4, 29).

9Bõi biniʼõ chõgoe mbawaoe; bõi timba genonimõ andre, ba wõnoemõ. No sanolo jaʼo ndraʼoegõ, bõi tiboʼõ ndraʼo ba bõi rõido, jaʼoegõ Lowalangi fangorifigoe!

10Noa sa larõi ndraʼo ira amagoe inagoe, ba ifonaha ndraʼo Jehowa. (Jes. 49, 15).

11Fahaõ ndraʼo Jehowa, ba lala andrõ chõoe ba fatõrõdo ba lala sadõlõ, bõrõ zi faʼoedoe chõgoe andrõ. (Sin. 25, 4; 86, 11; 139, 24).

12Bõi loeloe ndraʼo ba wofõnoe zamakao jaʼo! Noa sa maoso chõgoe sasi sofaja ba sangaloei famoenoe.

13Na lõ fadoehoe dõdõgoe enaʼõ, oeʼila dania waʼeboea dõdõ Jehowa andrõ, ba danõ zaoeri andrõ! (Sin. 142, 6. Jes. 38, 11).

14Dõnadõna chõ Jehowa! Abeʼeʼõ ndraʼoegõ ba bõi boesi dõdõoe, ba dõnadõna chõ Jehowa!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index