Search form

SOERA ZINOENÕ 29

Sinoenõ 29.

Lachõmi Lowalangi ba weʼoegoeʼoegoe mbanoea.

Sinoenõ; chõ Dawido.

1Mibeʼe chõ Jehowa, jaʼami ono zabõlõ, mibeʼe chõ Jehowa lachõmi ba faʼabõlõ! (Sin. 89, 7; 103, 20).

2Mibeʼe chõ Jehowa lachõmi dõinia andrõ! Miʼangaloeloe chõ Jehowa, ba waʼamoadoe andrõ, niʼamoniʼõ! (Sin. 110, 3).

3Jaw̃a nidanõ terongo li Jehowa andrõ; moeʼoegoeʼoegoe Lowalangi lachõmi andrõ, Jehowa jaw̃a nidanõ seboea. (Job. 37, 2).

4Li Jehowa andrõ, ba sabõlõ, li Jehowa andrõ, ba sihõngõ.

5Ifatõ geresi li Jehowa andrõ, ifatõ Jehowa geresi andrõ ba hili Libano.

6Manoka ira, hoelõ nono zaw̃i, ibeʼe, Libano andrõ ba Siriono andrõ, hoelõ nono gõrõbao. (Moz. V. 3, 8. 9).

7Ifazawili holahola galitõ li Jehowa andrõ.

8Modoeroe danõ si mate ibeʼe li Jehowa andrõ, ifahisi danõ si mate Kadesi andrõ Jehowa.

9Afõchõ hoeloe mbõhõ si alawe ibeʼe li Jehowa andrõ, ba isereï geoe ba gatoea, ba ba gosalinia, ba ha samboea li: lachõmi!

10Jaw̃a nidanõ seboea doemadao mege Jehowa, ba fedadao Jehowa andrõ, ba no fedadao razo, siroegi si lõ aetoe.

11Ibeʼe waʼabõlõ ba mbanoeania Jehowa, ifahowoeʼõ mbanoeania Jehowa, faʼatoelõ. (Sin. 28, 8. 9).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index