Search form

SOERA ZINOENÕ 31

Sinoenõ 31.

I. Fangandrõ fangefa ba zi faʼoedoe. II. Fanoeno faʼeboea dõdõ Lowalangi.

1Chõ doeka wanoenõ andrõ Sinoenõ; chõ Dawido.

2I. Chõoe Jehowa, manõtõna ndraʼodo, bõi manõ beʼe aila ndraʼo; orifi ndraʼo, ba waʼatoelõ dõdõoe andrõ!

3Fondrondrongo chõgoe, taʼitaʼi orifi ndraʼodo! Enaʼõ gowe saw̃ato ndraʼoegõ chõgoe, ba hati saro, ba wangorifi jaʼodo! (Sin. 18, 3).

4Gowe sa ndraʼoegõ chõgoe ba hatigoe, ba õfasao ndraʼo, õʼohe dangagoe, bõrõ dõimõ andrõ. (Sin. 23, 3).

5Õʼefaʼõ ndraʼo ba goeʼõ andrõ, nilaoera chõgoe, nibiniʼõ; baʼabaʼa sa ndraʼoegõ chõgoe. (Sin. 25, 15).

6Ba dangaoe oetooeʼõ nosogoe; õʼorifi ndraʼo, jaʼoegõ Jehowa, Lowalangi si lõ farõi!(Loek. 23, 46).

7Faʼoedoe ndraʼoegõ ba zi olembai adoe faja andrõ, ba jaʼodo, ba sanõtõna chõ Jehowa.

8Enaʼõ maʼiki ndraʼo ba enaʼõ omoeso dõdõgoe, ba waʼeboea dõdõoe andrõ, wa no onehegõ waʼanoemanagoe andrõ, wa no õbeʼe ba dõdõoe waʼatosasa dõdõgoe.

9Lõ niloeloemõ jaʼo ba waʼabõlõ zi fatioe tõdõ chõgoe, no õfonaha gahegoe ba zebolo tanõ. (Sin. 18, 37).

10Hachõsi tõdõ ndraʼo, jaʼoegõ Jehowa, sataʼoe tõdõ sa ndraʼodo! Aokõ hõrõgoe ba waʼaboe dõdõ andrõ, ariri nosogoe ba õsigoe. (Sin. 6, 8).

11Sagõtõ jaʼo saʼae, ba faʼalangoe dõdõ, ha me oega fache ndraʼo, ba fangarõngarõ manõ. Taja waʼabõlõgoe, bõrõ horõgoe, ba no alõ dõlaga, bõrõ zamakao jaʼo andrõ fefoe.

12No tobali niʼoʼaja sibai ndraʼodo ba nawõgoe ba fametaʼoe ba zi faʼila li chõgoe; si faloecha chõgoe baewali, ba moloi. (Sin. 69, 11—13).

13No olifoe niha bõʼõ ndraʼodo, no taja ndraʼo ba dõdõra; no tobali hoelõ mbowoa saboto ndraʼodo.

14Noa sa oerongo wanandraw̃aisi zato: ”Ametaʼoeõ, fasoei!” Mamagõlõ ira ba chõgoe andre, wangaloei famoenoe jaʼodo. (Jer. 20, 10; 46, 5).

15Ba jaʼodo, ba sanõtõna chõoe, jaʼoegõ Jehowa; no oemane: ”Lowalangigoe ndraʼoegõ!”

16Ba dangaoe so lalagoe andrõ. Efaʼõ ndraʼo ba danga zi faʼoedoe chõgoe ba ba zolohi jaʼodo! (Sin. 139, 16).

17Fohaga mbawaoe jaw̃a genonioe, orifi ndraʼo, ba waʼeboea dõdõoe andrõ. (Moz. IV. 6, 25. Sin. 80, 4).

18He Jehowa, bõi beʼe aila ndraʼo! noa sa oeʼangarõfi li ndraʼoegõ. Enaʼõ aila zeboea horõ andrõ, enaʼõ lõ hedehedera saʼae, ba mbanoea tooe.

19Enaʼõ lõʼõ saʼae hedehede mbewe sofaja andrõ, sangosiwawõi satoelõ, ba hochara andrõ ba ba wa lõ ba dõdõ.

20II. Ha lõ abõlõ waʼeboea dõdõoe andrõ, nitenagõoe ba zangataʼoefi jaʼoegõ; niʼoromaʼõoe, ba zanehe niha, ba zanõtõna chõoe andrõ.

21Õbaʼa ira baʼabaʼa bawaoe andrõ, na aechoe niha, õbiniʼõ ira baose, ba wasosota lela andrõ. (Sin. 27, 5).

22Nisoeno Jehowa, me no iʼoromaʼõ chõgoe waʼeboea dõdõnia andrõ, sahõlihõli dõdõ, ba mbanoea saro. (Sin. 17, 7).

23Ba jaʼo, ba oemane, ba waʼatobali dõdõgoe andrõ: ”No tobaʼa ndraʼo ba hõrõoe.” Ba no õfondrondrongo zoei li wangandrõgoe andrõ, me moeʼaodo chõoe. (Sin. 116, 11).

24Miʼomasiʼõ Jehowa, jaʼami, satoelõ tõdõ andrõ chõnia, dozi! Irorogõ Jehowa zi lõ farõi andrõ ba lõ iʼambõsi zoelõ ba zamaʼoea fajaw̃asa.

25Mirara dõdõmi ba miʼabeʼeʼõ, dozi ami, sanõtõna chõ Jehowa. (Sin. 27, 14).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index