Search form

SOERA ZINOENÕ 33

Sinoenõ 33.

I. Fanoeno fa lõ ambõ faʼabõlõ andrõ chõ Lowalangi ba faʼeboea dõdõ ba fa lõ farõi andrõ chõnia. II. Famarooe tõdõ ba wanõtõna chõ Zoʼaja.

1I. Miʼowoeawoeaʼõ dõdõmi, jaʼami satoelõ tõdõ, ba chõ Jehowa andrõ; si nangea ba zadõlõ tõdõ andrõ, ba fanoeno. (Sin. 32, 11).

2Misoeno Jehowa biola nitika zideʼide, milaoe chõnia mbiola seboea, si foeloe sinali!

3Miʼanoenõ chõnia sinoenõ si bohooe; miʼabõlõgõ mitika mbiola, enaʼõ moehõngõ. (Sin. 40, 4; 96, 1. Fam. 5, 9).

4Si doehoe sa daroma li Jehowa andrõ; ba folaoenia fefoe, ba ba wa lõ farõi.

5Somasi ia, ba faʼatoelõ ba hoekoe; ba no anõnõ danõ faʼeboea dõdõ Jehowa.

6Taroma li Jehowa wamazõchi mbanoea si jaw̃a ba eheha mbawania wamazõchi nõsinia fefoe. (Moz. I. 1, 6. 14).

7Iʼowoeloi nasi, hoelõ ba nasoa, ibeʼe ba halasa hooenia. (Sin. 104, 9).

8Jamoeʼataʼoefi Jehowa õsi goeli danõ maʼafefoe, ja manizinizi fõnania dozi sowanoea ba goeli danõ!

9Ha moehede ia, ba itõrõ; iw̃aʼõ, ba no so.

10Ifoefoe Jehowa nichoi dõdõ niha baero; lõ fachai geraʼera soi niha ibeʼe.

11Tõdõ Jehowa andrõ, ba lõ teboelõ, iroegi zi lõ aetoe, ba eraʼera dõdõnia andrõ, ba lõ mamalõmalõ.

12II. Ja ahowoe niha si no mangai Lowalangira Jehowa andrõ, niha nitoetoejoenia tána chõnia! (Moz. V. 33, 29).

13Ifaigifaigi Jehowa moroi ba zoroego, iʼila nono niha fefoe.

14Moroi ba nahania ifaigifaigi, inehegõ fefoe zowanoea ba goeli danõ.

15Jaʼia, samazõchi tõdõra fefoe, si hõrõhõrõgõ nilaoera andrõ fefoe.

16Tenga ba waʼato zabõlõ chõnia mõna razo, ba sabõlõ, ba lõ aoeri ba waʼafahõna waʼabõlõnia. (Sam. I. 17).

17Faja koedo, ba wangorifi, ba lõ iʼorifi niha faʼabõlõnia andrõ. (Sin. 20, 8).

18Hiza, hõrõ Jehowa andrõ, ba iʼila zangataʼoefi jaʼia ba sanõtõna faʼeboea dõdõnia. (Sin. 34, 16. 18).

19Ba wangefaʼõ nosora ba waʼamate, ba wangorifi jaʼira na lofo mbanoea. (Sin. 34, 10. 11).

20Chõ Jehowa manõtona dõdõda fangorifida ia ba baloeseda. (Sin. 3, 4).

21Ba chõnia saʼae omoeso dõdõda, me no manõtõna ita ba dõinia andrõ, niʼamoniʼõ.

22Ja so jaw̃ama waʼeboea dõdõoe andrõ, jaʼoegõ Jehowa, ja itõrõ wanõtõnama chõoe!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index