Search form

SOERA ZINOENÕ 34

Sinoenõ 34.

I. Fanoeno Dawido Lowalangi, me no iʼorifi ia. II. Famarooe tõdõ ba wangataʼoefi Lowalangi.

1Chõ Dawido, me iʼosowõhõ ia, chõ Gabimelechi, me ifofanõ ia daʼõ ba me iheta ia. (Sam. I. 21, 14—16).

2I. Oesoeno Jehowa, si lõ mamalõmalõ, bõi ja teboelõ ba mbewegoe wanoeno jaʼia.

3Jamoesoeno ia tõdõgoe, ba chõ Jehowa, ja larongo si noemana, ba ja omoeso dõdõra.

4Mifolachõmi Jehowa, awõgoe; datafaoma taʼeboeaʼõ dõinia!

5Ha me oega oeʼaloei Jehowa, ba ifondrondrongo chõgoe, ba no iʼefaʼõ ndraʼo ba waʼatosasagoe fefoe.

6Ba zamaõga hõrõra chõnia mohaga mbawa, ba alacha lõ afoesi mbawara.

7No moeʼao zi noemana andre, ba no irongo Jehowa, ba no iʼefaʼõ ba waʼatosasania fefoe.

8Ifasoei malaʼika Jehowa zangataʼoefi jaʼia ba iʼefaʼõ ira. (Moz. I. 32, 2. Sin. 91, 11).

9Mitandra ba mifaigi, wa no seboea tõdõ Jehowa, ja ahowoe zanõtõna chõnia! (Fet. I. 2, 3).

10Miʼataʼoefi Jehowa, jaʼami niʼamoniʼõ andrõ chõnia; lõʼõ sa ambõ hadia ia ba zangataʼoefi jaʼia. (Sin. 37, 19).

11Ba nono zingo ambõ gõ ba olofo, ba ba zangaloei Jehowa, ba lõ ambõ, fefoe gofoe hadia. (Sin. 33, 18. 19; 37, 25. Loek. 1, 53).

12II. Miʼaine iraono, mifondrondrongo chõgoe, daʼoefahaõ ami ba wangataʼoefi Jehowa.

13Ha niha zomasi aoeri, somasi faʼanaoe noso, enaʼõ faloecha ia waʼohahaoe dõdõ?

14Taha lelaoe, ba zi lõ sõchi, ba beweoe, fa bõi ilaoe waja! (Fet. I. 3, 10—12).

15Arõoeʼõgõ ba zi lõ sõchi ba laoe zi sõchi; aloei waʼatoelõ, gohi! (Sin. 37, 27).

16Itõngõ Jehowa zamazõchi si lõ sochi, ba wangohori tõira ba goeli danõ.

17Ba ihõrõhõrõgõ Jehowa zatoelõ tõdõ ba ibeʼe mbõrõ dalingania ba weʼaora. (Amaed. 10, 7).

18Moeʼao ira, ba irongo Jehowa ba iʼefaʼõ ira ba waʼaboe dõdõra fefoe.

19Ahatõ Jehowa ba zi no arasa tõdõ ba itolo zi no atata eraʼera. (Sin. 51, 19).

20Oja ngawalõ wamakao ba zatoelõ, ba iʼefaʼõ ia Jehowa ba daʼõ fefoe.

21Irorogõ dõlania fefoe, fa bõi afatõ zara. (Kor. II. 1, 5).

22Seboea horõ andrõ iboenoe boeaboea si lõ sõchi; ba si fatioe tõdõ ba zatoelõ tõdõ, ba gõna hoekoe dania.

23Iʼorifi noso genoninia Jehowa, ba dozi sanõtõna chõnia, ba lõ gõna hoekoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index