Search form

SOERA ZINOENÕ 35

Sinoenõ 35.

I. Fangarõngarõ ba zi lõ sõchi andrõ nilaoe zi faʼoedoe. II. Fangandrõ fangorifi chõ Lowalangi.

Chõ Dawido.

1I. Laoe fasõndra, Jehowa, ba zi fasõndra chõgoe, soewõ zanoewõ jaʼodo.

2Toejoe mbaloese, awõ ndrange, ba faoso, tolo ndraʼodo! (Sin. 7, 13. 14).

3Halõ doho ba baʼa lala fõna zolohi jaʼodo; õmane ba dõdõgoe: ”Fangorifioe ndraʼodo!”

4Enaʼõ aila zangaloei nosogoe, enaʼõ tobali lõ fozoe; enaʼõ tofana foeri ba enaʼõ tehawoe faʼaila zamachai famoenoegoe. (Sin. 40, 15).

5Ja hoelõ goeliho ba nangi ira, na itimba ira malaʼika Jehowa.

6Ja ogõmigõmi lalara ba ja aelo, na igohi ira malaʼika Jehowa.

7Noa sa lalaoe chõgoe goeʼõra, lõ bõrõ, nibiniʼõ, no lacharoe lõsoelõsoe nosogoe, lõ bõrõ. (A. 19).

8Ja gõna ia famakiko, si lõ moedõnadõna, ba ja teʼoeʼoe ia ba goeʼõnia andrõ, nilaoenia, nibiniʼõ, ja alaoe ba wamakiko! (Sin. 9, 16).

9Ba owoeawoea dania dõdõgoe, ba chõ Jehowa, omoeso dõdõgoe, ba wangorifinia andrõ.

10Imane õsigoe fefoe: ”Ha niha zi fagõlõgõlõ chõoe, Jehowa? Sangefaʼõ seboea famakao ba zabõlõ moroi chõnia, ba seboea famakao ba si noemana ba zi anagõi jaʼia.”

11So sasi sofaja; hadia zi lõ oeʼila lasofoe chõgoe.

12Si sõchi lasoelõni chõgoe si lõ sõchi; fa lõ ono goerachagoe. (Sin. 38, 21).

13Ba jaʼo, ba no oeʼonoecha gonigoni, me mofõchõ ira, no oefakao ndraʼo lõ manga, ba fangandrõgoe, ba mangawoeli barõ dotogoe. (Rom. 12, 15. Job. 31, 29).

14Hoelõ na si fahoewoe, hoelõ na talifoesõ waʼaboe dõdõgoe, no oefatoegoe ndraʼo, hoelõ zangeʼesi inania.

15Ba no omoeso dõdõra ba waʼalaoegoe andrõ ba no laʼowoeloi ira chõgoe; niha bõʼõ zangowoeloi jaʼira chõgoe, si lõ oerai mila; lõ mamalõmalõ wanandraw̃ara.

16Laʼigiʼigiʼõ ndraʼodo, laʼoʼajado, wamatangi bohara chõgoe. (Job. 16, 9).

17II. He Soʼaja, heza iroegi, wa õfaigifaigi manõ? Okafoei dõdõgoe, efaʼõ ba wamoefoera andrõ; efaʼõ ba nono zingo zi lõ awõʼawõ andrõ chõgoe. (Sin. 22, 21).

18Daʼoesoeno ndraʼoegõ ba gowoeloa seboea, ba zato niha oeʼeboeaʼõ dõimõ andrõ. (Sin. 22, 23).

19Bõi beʼe omoeso dõdõ chõgoe zi faʼoedoe chõgoe, si lõ bõrõ; bõi beʼe lafamõʼi hõrõra si fatioe tõdõ chõgoe, si lõ bõrõ. (Sin. 25, 19; 19, 5. Joh. 15, 25).

20Tenga sa faʼatoelõ nifatoenõra, ba lafachai waja ba chõ zahonohono ba danõ.

21No lafaboka mbawara chõgoe, lamane: Ha! Ha! No iʼila hõrõda!” (Sin. 40, 16).

22No õʼila, jaʼoegõ Jehowa; bõi zi lõ hedehede ndraʼoegõ! He Soʼaja, bõi arõoeʼõgõ chõgoe!

23Faoso ba fazaw̃aʼõ, ba wamatoenõ hoehoeo andrõ chõgoe, jaʼoegõ Lowalangigoe ba Soʼaja jaʼo, ba wolohe ba lala. (Sin. 44, 24).

24Ohe ba zadõlõ hoehoeo andrõ chõgoe, dali waʼatoelõmõ andrõ, jaʼoegõ Jehowa, Lowalangigoe, ba bõi beʼe omoeso dõdõra chõgoe.

25Bõi tehe lamane dõdõra: ”Ha, daʼõ zomasiga!” Bõi lamane: ”No tafakiko ia!”

26Enaʼõ aila ira, õbeʼe; enaʼõ tehawoe faʼaila, dozi somoeso tõdõ ba waʼaboe dõdõgoe andrõ, enaʼõ baloebaloera waʼaila ba faʼiki niha bõʼõ chõra, jaʼira si fajaw̃a chõgoe. (A. 4).

27Acha owoeawoea dõdõ zomasi na faloechado zatoelõ, acha omoeso dõdõra, enaʼõ lõ mamalõmalõ lamane: ”Ja eboea Jehowa, somasi na aoeri genoninia andrõ.” (Sin. 40, 17).

28Ba ifatoenõ waʼatoelõmõ andrõ lelagoe, ba fanoeno jaʼoegõ, si lõ mamalõmalõ.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index