Search form

SOERA ZINOENÕ 38

Sinoenõ 38.

Iʼandrõ wangorifi seboea famakao. Sinoenõ.

1Chõ Dawido, ba wamasoegi ba dõdõ.

(Faigi gõi Zin. 6.)

2He Jehowa! bõi hoekoe ndraʼo ba wõnoemõ ba bõi otoeʼõ ndraʼo ba waʼabao dõdõoe andrõ! (Job. 6, 4; Sin. 32, 4).

3Noa sa manga ba nõsigoe nono wana andrõ chõoe, ba no tohare chõgoe dangaoe.

4Lõ hadia ia ba nõsigoe zi lõ socho, ba wõnoemõ andrõ; lõ hadia ia ba dõlagoe zi lõ fõchõ, ba horõgoe andrõ. (Sin. 51, 10).

5Noa sa ihawoei ndraʼo lalõgoe andrõ, hoelõ noro saboea, tebai oeloeʼi saʼae. (Ngen. Jer. 1, 14).

6Abõoe zesocho andrõ chõgoe ba monana, bõrõ me no sowõhõ mowa ndraʼodo.

7No akõi hoeloegoe, tenga ha maʼifoe aõndrõ, mowaõwaõ manõ ndraʼo, aboe dõdõ, maʼʼõmaʼṍchõ.

8Sawai alitõ ngaigoe ba lõ hadia ia ba nõsigoe zi lõ socho.

9Erege dõdõgoe ba no arasa manõ dõlagoe; mangarõngarõ ndraʼo, eboea ligoe, moroi ba li zingo.

10He Soʼaja! Fefoe wehoeloe dõdõgoe, ba no oroma chõoe, ba lõ tobini chõoe wangarõngarõgoe.

11Manoetoenoetoe sibai dõdõgoe, ba no taja waʼabõlõgoe; noemalõ faʼatara ba hõrõgoe, ba lõʼõ.

12Somasi jaʼodo ba si no fahoewoe chõgoe, ba laʼewegõ ira, ba waʼafõchõ andrõ chõgoe. (Sin. 31, 12. Job. 19, 14).

13Ba sangaloei famoenoe jaʼo, ba lalaoe wesoe chõgoe; ba somasi famakaogoe, ba mamagõlõ ba wamakiko, lafachai waja, lõ mamalõmalõ.

14Ba jaʼodo, ba hoelõ zafiso; lõ oerongo; ba hoelõ zi lõ hede, si lõ mamokai bawania. (Sin. 39, 3).

15No tobali hoelõ zi lõ mamondrongo li niha ndraʼodo, si lõ famadaõ ba mbewe.

16Noa sa oedõnadõna chõoe, jaʼoegõ Jehowa, jaʼoegõ zamondrongo ligoe, jaʼoegõ, Jehowa, Lowalangigoe.

17Noa sa oemane: ”Enaʼõ lõ omoeso dõdõra ba chõgoe andre!” Me ahele gahegoe, ba fajaw̃a ira chõgoe.

18Lõ arõoe tõ, ba alaoe ndraʼo, ba lõʼõ manõ dõhõ waʼafõchõ andrõ chõgoe.

19Oeʼombachaʼõ saʼae zalagoe ba aboe dõdõgoe horõgoe andrõ. (Sin. 32, 5).

20Ba aoeri zi faʼoedoe chõgoe, abõlõ ira, ba ato zi fatioe tõdõ chõgoe lõ bõrõ.

21Ba lasoelõni si lõ sõchi zi sõchi, lasoekosoeko ndraʼodo, bõrõ wa oeʼaloei zi sõchi. (Sin. 35, 12).

22Bõi bõhõli ndraʼo, jaʼoegõ Jehowa, Lowalangigoe, bõi arõoeʼõgõ chõgoe!

23Taʼitaʼi tolodo, jaʼoegõ Soʼaja fangorifigoe.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index