Search form

SOERA ZINOENÕ 39

Sinoenõ 39.

I. Fangarõngarõ ba wamakao andrõ, si gõna niha. II. Fangandrõ fangorifi.

1Chõ doeka wanoenõ andrõ; chõ Jedoetoeno. Sinoenõ; chõ Dawido. (Ngaʼõt. I. 25, 1. 3).

2I. No oemane: ”Daʼoefaigifaigi lalagoe andrõ, fa bõi oefazõchi horõ lelagoe andre; daʼoedarodarogõ mbewegoe, oefosareʼa, gõtõ wa so ba ngaigoe zeboea horõ andrõ.”

3No lõ hedehedegoe, no ahono ndraʼodo, lõ sihededo, lõ si sõchi chõgoe; ba tesao waʼafõchõ chõgoe. (Sin. 38, 14).

4Aoechoe bacha dõdõgoe, hoemola, ba wamatooetooe andrõ; oemane lelagoe:

5”He Jehowa, ombachaʼõ chõgoe wozoegoe ba ha waʼanaoe nosogoe, enaʼõ oeʼila wa lõ ararā ndraʼodo! (Sin. 9, 12. Job. 14, 5).

6Hiza, nisoeʼa ba laloeʼa mbaw̃agoe andrõ, õbeʼe, ba faʼanaoe nosogoe, ba hoelõ zi lõʼõ, fõnaoe, ha sambalõ angi niha fefoe, gofoe ha waʼabeʼe. (Sin. 90, 5).

7Hoelõ loemõloemõ mowaõwaõ misa niha, fagoeagoea ba zi lõ boto. Lahõna girõgirõ, ba lõ laʼila, ha chõ mõi dania. (Sangomb. 2, 18. 21. Loek. 12, 18—20).

8II. Ba ijaʼe, ba hadia nidõnadõnagoe, jaʼoegõ Soʼaja? Ha chõmõ manõtõna ndraʼodo.

9Efaʼõ chõgoe lalõgoe andrõ fefoe; bõi beʼe niʼoʼaja zowõhõ mowa ndraʼodo.

10Lõ hedehedegoe saʼae, lõ oebokai mbawagoe; jaʼoegõ sa zolaoe. (Sam. II. 16, 10).

11Efaʼõ chõgoe wamakao andrõ chõoe; ba wombambaja dangaoe andrõ ariri ndraʼodo.

12Õhoekoe niha, õʼotoeʼõ ba golalõw̃ania andrõ, ba taja zi sõchi andrõ chõnia õbeʼe, hoelõ niʼā hama; si ndroehoe, angi niha fefoe. (A. 6).

13Fondrondrongo wangandrõgoe, jaʼoegõ Jehowa, beʼe ba dõdõoe weʼaogoe andre! Bõi zi lõ hedehede ndraʼoegõ ba wegeʼegegoe! Niha bõʼõ sa ndraʼo chõoe, si fatewoe, si mane ira toeagoe fefoe. (Moz. III. 25, 23. Sin. 119, 19. Fet. I. 2, 11. Heb. 11, 13).

14Bõi faigifaigido saʼae, enaʼõ okafoe dõdõgoe, fatoea lõ mofanõ ndraʼo, si lõ jaʼodo saʼae! (Job. 10, 20).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index