Search form

SOERA ZINOENÕ 41

Sinoenõ 41.

I. Famahowoeʼõ sahachõ tõdõ. II. Fangarõngarõ, me farõi zi fahoewoe. III. Fanõtõna ba Lowalangi.

1Chõ doeka wanoenõ andrõ. Sinoenõ; chõ Dawido.

2I. Ja ahowoe zi so ba dõdõ niha si noemana! Na baw̃a wamakao, ba iʼorifi ia Jehowa. (Amaed. 19, 17).

3Irorogõ ia Jehowa ba iʼanaoeʼõ nosonia; ohahaoe dõdõnia ba danõ ba lõ õloeloe ia ba waʼafõchõ dõdõ zi fatioe tõdõ chõnia.

4Itoewoe narõ galogonia Jehowa ba wõchõnia, tooe ba zalo; õtolo ia ba wõchõnia fefoe.

5II. No oemane: Hachõsi tõdõ ndraʼo Jehowa! Fadõhõ wõchõ dõdõgoe; noa sa oefazõchi horõ chõoe. (Sin. 6, 3).

6Si lõ sõchi wehede zi faʼoedoe chõgoe, lamane, ba chõgoe andre: ”Ha waʼara mate ia, ha waʼara taja dõinia.”

7Ba na so zi mõi mamaigi jaʼodo, ba falimosa wehedenia; ihõna wamakiko tõdõnia — mõi ia baero ba ifatoenõ.

8Dozi si fatioe tõdõ chõgoe, ba fangõngõngõngõ ba chõgoe andre, lafachai wamakiko jaʼodo.

9”No itõrõ ia horõ, ba me no alaoe ia, ba lõ maoso saʼae.”

10Ba satoelõ tõdõ chõgoe naʼi, si fadoehoe dõdõgoe, si manga wõfõ gõgoe, ba no ifazaw̃a mbõrõ sisinia chõgoe. (Sin. 55, 14. Joh. 13, 18. Hal. zin. 1, 16).

11III. Ba jaʼoegõ Jehowa, ba hachõsi tõdõ ndraʼo ba foeli fazaw̃ado, enaʼõ oesoelõni chõra!

12Ba daʼõ aboto ba dõdõgoe, wa omasiʼõ ndraʼodo, me lõ tola iherai ndraʼo si fatioe tõdõ chõgoe.

13Bõrõ waʼadõlõ dõdõgoe, wa lõ õbeʼe alaoe ndraʼo, ba no õfataro ba gamaoedoemõ ndraʼodo, si lõ mamalõmalõ.

14Nisoeno Jehowa, Lowalangi Ndraono Gizeraëli, gõtõgõtõ waʼara! Jadoehoe! Jadoehoe! (Sin. 72, 18; 89, 53; 106, 48; 150, 6).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index