Search form

SOERA ZINOENÕ 44

Sinoenõ 44.

I. Famasoegi ba dõdõ fanolo Lowalangi ira ama. II. Fangarõngarõ me lafakao mbanoea Lowalangi si fatioe tõdõ chõra. III. Fangandrõ fangorifi.

(Faigi gõi Sin. 60. Sam. II. 8, 3—14.)

1Chõ doeka wanoenõ andrõ. Nilaoe Ndraono Gora andrõ, Famahaõ.

2I. He Lowalangi! No irongo tõgi dalingama, no latoenõ chõma ira amama, ira toeama zeboea andrõ, nilaoemõ ba gõtõra, ba gõtõ fõna andrõ. (Moz. V. 6, 20—25).

3No õtimba soi niha tangamõ andrõ, ba no õfataro ira (ndra toeama); no õfakiko soi niha, ba no õbologõ ira (ndra toeama).

4Tenga moroi ba wangõnara, wa tola laʼochõgõ danõ, ba tenga moroi ba daʼiora, wa mõna ira, ha moroi ba dangaoe kambõlõ ba moroi ba daʼiomõ ba moroi ba haga mbawaoe andrõ, me no õʼomaiʼõ ira.

5Jaʼoegõ sa razogoe, jaʼoegõ Lowalangi; w̃aʼõ wangorifi Ndraono Jakobo andrõ! (Sin. 74, 12).

6Moroi chõoe, wa maʼila matimba zamakao jaʼaga ba moroi ba dõimõ andrõ, wa mahoendragõ tooe zi faʼoedoe chõma.

7Ba wanagoe lõʼõ sa oedõnadõna, ba siʼõligoe andrõ, ba lõ iʼorifido. (Sin. 20, 8).

8Ha sa jaʼoegõ zangefaʼõ jaʼaga ba zamakao jaʼaga, ba aila zi fatioe tõdõ chõma õbeʼe.

9Ba chõ Lowalangi masoeno ndraʼaga, si lõ mamalõmalõ, ba iroegi zi lõ aetoe masoeno dõimõ andrõ.

10II. Ba noa zoei õtiboʼõ ndraʼaga ba no õbeʼe aila ndraʼaga, ba lõʼõ saʼae fao ndraʼoegõ ba zi mõi fasoewõ andrõ chõma.

11Moloi ndraʼaga ba zamakao jaʼaga õbeʼe, ba no moraboe zi fatioe tõdõ chõma.

12No õloeloe ndraʼaga, hoelõ mbiribiri nitaba õ, ba no õfazawili ndraʼaga ba niha baero.

13No õʼamawa mbanoeaoe, sideʼide bõli, lõ niʼeboeaʼõmõ bõlinia.

14Laherai ndraʼaga si so ba ngaima õbeʼe, irege laʼigiʼigiʼõ ndraʼaga si tefasoei jaʼaga ba laʼoʼajaga. (Sin. 79, 4. Raz. I. 9, 7).

15No õbeʼe amaedola ndraʼaga ba niha baero, awõ wa lafalichõ ira chõma soi niha.

16Lõ mamalõmalõ ba doedoema hõrõgoe waʼailagoe andrõ, no tehawoe ndraʼo faʼaila andrõ, si no gõna ndraʼodo.

17Bõrõ li zangoʼaja jaʼodo, awõ li zanandraw̃aisi jaʼo ba si fatioe tõdõ andrõ, ba somasi folaoe balõ, niʼilaʼila hõrõgoe.

18III. Daʼõ fefoe zanõrõ jaʼaga, he w̃aʼae lõ olifoega ndraʼoegõ, ba he w̃aʼae lõ si falimo ndraʼaga, ba wawoeʼoesa li andrõ chõoe.

19Lõ si fabali dõdõma ba lõ niholeʼõma jaʼaga, wondrõi lala andrõ chõoe.

20Wa no õfoefoe ndraʼaga ba naha nasoe anaʼa andrõ, awõ wa no õhawoei ndraʼaga faʼogõmigõmi.

21Na no olifoega menaʼõ dõi Lowalangima andrõ, na no maʼoroʼõ dangama ba Lowalangi bõʼõ,

22ba hadia, lõ iʼaloei daʼõ Lowalangi? Iʼila sa atṍ zi tobini ba dõdõ. (Sin. 7, 10).

23Bõrõ sa ndraʼoegõ, wa teboenoeboenoe ndraʼaga, si lõ mamalõmalõ, hoelõ mbiribiri nitataba ndraʼaga, ba dõdõ niha bõʼõ. (Rom. 8, 36).

24Faoso! Hana wa mõrõʼõ, jaʼoegõ Soʼaja? Faoso! Bõi tiboʼõ ndraʼaga si lõ foelitõ! (Sin. 35, 23).

25Hana wa õbiniʼõ mbawaoe ba hana wa olifoeʼõ waʼanoemanama ba famakao jaʼaga andrõ? (Sin. 10, 1).

26Noa sa aõndrõ dõdõma, iroegi ba gawoegawoe tooe, no fatõfa ba danõ daloema.

27Fazaw̃aʼõ, ba wanolo jaʼaga ba orifi ndraʼaga ba waʼeboea dõdõoe andrõ!

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index