Search form

SOERA ZINOENÕ 46

Sinoenõ 46.

Hati saro Lowalangida. (Raz. II. 19, 35 b. t.).

1Chõ doeka wanoenõ andrõ; nilaoe Ndraono Gora; dali ba nono alawe andrõ. Sinoenõ.

2Saw̃atõda ba fangabeʼeda Lowalangi, fanolo sabõlõ, ba waʼaboe dõdõ.

3Andrõ lõ ataʼoe ita, he w̃aʼae adoedoe danõ, he w̃aʼae awoeʼa hili, wanaw̃a taloe nasi.

4Hana na moeʼoegoe nasi ba hana na modoeloe, hana na moehisi hili ba wedoeloenia: Jehowa ngahõnõ andrõ nawõda, ba hati chõda Lowalangi Jakobo.

5Boto nidanõ — omoeso dõdõ mbanoea Lowalangi ibeʼe dahadahania; niʼamoniʼõ andrõ, naha Wondrege zalaw̃a. (Sin. 48, 3. Raz. II. 19, 21. Jes. 12, 3).

6Ba daloenia so Lowalangi, tebai mangiwa ia; itolo ia Lowalangi, na moloeo.

7Fagoeagoea soi niha, mangiwa nõri; ifarongogõ linia, alaoe danõ.

8Jehowa ngahõnõ andrõ nawõda, hati chõda Lowalangi Jakobo.

9Miʼaine, mifaigi nilaoe Jehowa, si no mameʼe tobali dõdõ niha ba goeli danõ. (Raz. II. 19, 35).

10Sanenaw̃a fanoewõ iroegi wondrege danõ, samatõ fana, solew̃a totoa doho, sanoenoe alitõ koereta! (Sin. 76, 4).

11Mibato, ba jaʼaboto ba dõdõmi, wa jaʼodo Lowalangi; salaw̃a ndraʼodo, salaw̃a soi niha, salaw̃a ba goeli danõ!

12Jehowa ngahõnõ andrõ nawõda, hati chõda Lowalangi Jakobo.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index