Search form

SOERA ZINOENÕ 48

Sinoenõ 48.

I. Banoea razo seboea andrõ. II. Fangandrõ saoha gõlõ ba wangorifi andrõ.

1Sinoenõ; nilaoe Ndraono Gora.

2I. Seboea Jehowa ba nisoeno sibai ba mbanoea Lowalangi andrõ, ba hili niʼamoniʼõ chõnia. (Sin. 46, 5).

3Iʼalaw̃aʼõ ia omasiõ hili Ziona andrõ, faʼomoeso dõdõ nõsi goeli danõ maʼafefoe, tánõ mijõoe, banoea razo seboea andrõ. (Ngen. Jer. 2, 5. Mat. 5, 35).

4No iʼoromaʼõ ia Lowalangi, ba gõdonia andrõ, wa jaʼia mbaʼabaʼania.

5Hiza sa, no owoelo razo, no so ira moroi sa, dozi. (Raz. II. 19).

6Ba ha laʼila, ba tobali dõdõra, tokea ira ba moloi, ataʼoe.

7Ihawoei ira fogichi ba daʼõ ba fanizinizi, hoelõ ba zadono.

8Angi timoe chõoe wamoto nowo Darisi.

9Si mane famondrongoma jaʼia wangilama ba mbanoea Jehowa ngahõnõ andrõ, ba mbanoea Lowalangida; iʼaroʼõ ia Lowalangi, iroegi zi lõ aetoe.

10II. Mafatooetooe waʼeboea dõdõoe andrõ, jaʼoegõ Lowalangi, bacha ba gosali andrõ chõoe.

11Si mane tõimõ andrõ, jaʼoegõ Lowalangi, si manõ gõi waʼaterongo doeriamõ, iroegi ba wondrege danõ; no fahõna waʼatoelõ ba dangaoe kambõlõ.

12Omoeso dõdõ hili Ziona andrõ, owoeawoea dõdõ nono Jakobo alawe, bõrõ wangoehoekoemõ andrõ.

13Mifasoei Ziona andrõ, milili, miʼerai maligenia.

14Minehegõ mbaʼabaʼania andrõ, mifaigi gõdonia andrõ, enaʼõ midoenõdoenõ ba zi sagõtõ niha dania.

15Wa no Lowalangida Lowalangi andrõ, si lõ mamalõmalõ; jaʼia zolohe tangada, iroegi waʼamate. (Jes. 25, 9).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index