Search form

SOERA ZINOENÕ 5

Sinoenõ 5.

Fangandrõ chõ Jehowa, ba niha si lõ sõchi andrõ.

1Chõ doeka wanoenõ andrõ, solaoe soeroene. Sinoenõ; chõ Dawido.

2Fondrondrongo ligoe Jehowa, beʼe ba dõdõoe loealoea dõdõgoe andre! (Sin. 17, 1).

3Beʼe mbõrõ dalingaoe ba weʼaogoe andre, jaʼoegõ, razogoe ba Lowalangigoe; chõoe sa mangandrõ ndraʼodo. (Sin. 84, 4).

4He Jehowa, ba zangoehoelõ wongi fondrondrongo ligoe! Oehoelõ wongi oefaʼanõ zoemange chõoe, ba oedõnadõna chõoe wangorifi.

5Tenga sa Lowalangi somasi si lõ sõchi ndraʼoegõ; lõ monaha chõoe niha si lõ sõchi. (Sin. 34, 17).

6Tebai lafaigi mbawaoe si fajaw̃a, ba no faʼoedoe ndraʼoegõ ba zamazõchi si lõ sõchi.

7Solaoe faja, ba õboenoe. Iʼogorofi Jehowa zangeʼengeʼe ba si falimolimo.

8Ba jaʼo, ba tola mõi ba nomooe, bõrõ waʼeboea dõdõoe andrõ, si no fahõna, mangaloeloe ndraʼo ba gosalioe andrõ, niʼamoniʼõ, oeʼataʼoefi ndraʼoegõ. (Sin. 26, 8).

9He Jehowa, ohe dangagoe, ba waʼatoelõ dõdõoe andrõ, ba zi faʼoedoe chõgoe andrõ; adõlõʼõ fõnagoe lala andrõ chõoe.

10Lõʼõ sa hadia ia zi doehoe ba mbewera, tõdõra andrõ, ba famakiko; lewatõ sobawa dõlõtõlõra, ba no alõsõlõsõ lelara. (Rom. 3, 13).

11Otoeʼõ ira, Lowalangi, enaʼõ tobali faja nifachoi dõdõra. Toeliʼõ ira, ba waʼoja lalõra andrõ; samadaõ limõ sa ira andrõ.

12Enaʼõ omoeso dõdõ dozi sanõtõna chõoe, enaʼõ owoeawoea dõdõra, si lõ aetoe. Ba fobelebele ira, enaʼõ maʼiki ira ba chõoe andrõ; sangomasiʼõ tõimõ andrõ. (Sin. 40, 17).

13Jaʼoegõ i, ba õfahowoeʼõ zatoelõ tõdõ, jaʼoegõ, Jehowa, õfobelebele ia faʼeboea dõdõoe, hoelõ nifobaloese. (Sin. 103, 4).

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index