Search form

SOERA ZINOENÕ 51

Sinoenõ 51.

Fangandrõ: I. Fangefa horõ, ba II. Eheha, sangehao tõdõ.

1Chõ doeka wanoenõ andrõ. Sinoenõ chõ Dawido, me so Natano andrõ, samaʼeleʼõ,

2me no ihalõ dongania Mbaseba andrõ Dawido. (Sam. II. 12).

3I. He Lowalangi, hachõsi tõdõ ndraʼo, ba waʼeboea dõdõoe andrõ; heta golalõw̃agoe, ba waʼahachõ dõdõoe andrõ, si no eboea. (Loek. 18, 13).

4Haogõ sasai chõgoe zalagoe andrõ, haogõ ndraʼo, heta horõgoe.

5Aboto sa ba dõdõgoe golalõw̃agoe ba lõ teboelõ ba doedoema hõrõgoe andrõ. (Sin. 32, 5).

6Chõoe no mosala ndraʼodo, ha sambalõ chõoe; ba no oelaoe zi lõ omasiʼõ, enaʼõ satoelõ ndraʼoegõ, na moehedeʼõ, ba enaʼõ lõ hadia ia, ba wangoehoekoemõ andrõ. (Rom. 3, 4. 19).

7Hiza, fao zi lõ atoelõ, me toemboe ndraʼo ba fao horõ, me itemado inagoe. (Joh. 3, 6).

8Hiza, omasi ndraʼoegõ zi doehoe, ba dõdõ, ba botochi ba dõdõgoe, ba zi tobini, waʼatoeatoeamõ andrõ.

9Heta horõgoe soefo, enaʼõ aheta zi raʼiraʼiõ. Sasai ndraʼodo, enaʼõ afoesi ndraʼo moroi ba mbetoea. (Moz. III. 14, 6. 7. Jes. 1, 18).

10Farongogõ chõgoe waʼomoeso dõdõ ba faʼowoeawoea dõdõ, enaʼõ maʼiki dõlagoe andrõ, nirasamõ. (Sin. 32, 3. 4).

11Baloegõ mbawaoe, bõi faigi horõgoe, ba heta golalõw̃agoe andrõ, fefoe.

12II. Asogõ chõgoe dõdõ sohaoehaoe, jaʼoegõ Lowalangi, ba eheha si bohooe ba saro, ba dõdõgoe bacha. (Hez. 36, 26).

13Bõi tiboʼõ ndraʼo, fa lõ õfaigido saʼae, ba bõi heta chõgoe Gehehamõ andrõ, niʼamoniʼõ.

14Foeli omoesoiʼõ dõdõgoe fangorifimõ andrõ, ba abeʼeʼõ ndraʼo eheha sedõna tõdõ.

15Ba oefahaõ zolalõ, ba lala andrõ chõmõ, ba lafoeli ira chõoe si so horõ.

16Efaʼõ chõgoe horõ fangeʼe andrõ, jaʼoegõ Lowalangi, Lowalangi fangorifigoe, ba isoeno waʼatoelõmõ andrõ lelagoe.

17Bokai mbewegoe, Soʼaja, enaʼõ itoenõ doeriamõ bawagoe andre.

18Lõʼõ sa omasiʼõ zoemange, oebeʼe sa chõoe enaʼõ, ba soemange nitoenoe, ba lõ ba dõdõoe. (Sin. 40, 7; 50, 8—13).

19Soemange Lowalangi andrõ, ba jaʼia narõ doto si no omboejoe; tõdõ si no arasa ba si no aboto, ba tenga si lõ ba dõdõoe, jaʼoegõ Lowalangi. (Sin. 34, 19).

20Laoe zi sõchi, ba mbanoea Ziona, ba waʼeboea dõdõoe andrõ; aʼazõchi gõli kara andrõ ba Jeroezalema.

21Awena dania omasi ndraʼoegõ zoemange si no atoelõ, soemange nitoenoe ba soemange saʼoi so; ba laʼohe ba naha wameʼe soemange chõoe nono zaw̃i.

Soera Ni’amoni’ö

Soera Ni’amoni’ö, Nias Bible (revised ed.) © 2009, Indonesian Bible Society – Lembaga Alkitab Indonesia More Info | Version Index